Ուրախ կլինեի, որ մեզ ֆինանսավորեին անշահախնդիր՝ Կառլոս Պետրոսյանը լիներ, թե Գագիկ Ծառուկյանը

Հարցազրույց ազատամարտիկ, լրագրող, սցենարիստ Սուրեն Սարգսյանի հետ

-Դաշտային հրամանատարների խորհուրդը, սկսած ամռանից, ամեն հինգշաբթի հանրահավաք էր անում Ազատության հրապարակում: Կարծես վերջին շրջանում դադարել են դրանք, անիմա՞ստ եք համարում հրապարակային պայքարը:

- Այս հինգշաբթի մենք դադարեցրինք, որովհետեւ հերթական կլոր սեղանի նախապատրաստական աշխատանքների մեջ ենք՝ հանդիպումներ կուսակցությունների ներկայացուցիչների հետ, մտքեր հավաքել, առաջարկություններ եւ մի շարք խնդիրներ, իսկ հաջորդը՝ նոյեմբերի 7-ին, մեր հերթական հանրահավաքը կլինի: Քաղաքապետարանում հայտն իջեցված է, ի գիտություն ընդունված է, եւ որեւէ խնդիր չկա:

- Ի՞նչ հանդիպումներ ու առաջարկություններ են, հատկապես ո՞ր կուսակցությունների հետ: Ի՞նչ կլոր սեղանի մասին է խոսքը:

- Արդեն մեկ կլոր սեղան ունեցել ենք կուսակցությունների հետ, որը մի քիչ նախապատմություն ունեցավ, քանի որ իշխանություններն իրենց հերթական ստորությունն արեցին: Վերջին օրով պարզվեց, որ մենք «Մետրոպոլ» հյուրանոցում չենք կարող կլոր սեղան անել. հյուրանոցի տնօրինությունը հայտարարեց՝ ապեր, դե ինձ ասել են, որ չպիտի լինի: Նույն օրը ես զանգահարեցի կուսակցություններին, խնդրեցի, որ գան Սայաթ-Նովայի վրա գտնվող «Տիգրան Մեծ» աշխարհազորայինի շտաբ: Մի փոքր սենյակի մեջ հավաքվեցինք շուրջ 15 կուսակցությունների ներկայացուցիչներ, ուս-ուսի կպած նստեցինք, եւ մեր առաջին խնդրանքն էր կուսակցություններին, որ իրենց գնահատականը տան երկրի իրավիճակին: Մենք հայտարարություն կտարածենք, երբ ընդհանուր հայտարարի գանք: Ես հիմա միայն կարող եմ ասել, որ բոլորի գնահատականը բացասական էր, որ իրավիճակը կայուն չէ, վատ է, եւ այսպես չի կարելի շարունակել: 

- Ո՞ր կուսակցություններն էին ներկայացուցիչներ  ուղարկել: Արդյո՞ք հանդիպմանն առաջին դեմքերն էին մասնակցում:

- ՀԱԿ-ը ներկայացնում էր Սամվել Աբրահամյանը, «Ժառանգությունը»՝ Արմեն Մարտիրոսյանը, «Բարգավաճ Հայաստանը»՝  Տիգրան Ուրիխանյանը: Մասնակցում էին նաեւ «Ազատությունը», ՀԱՍԿ-ը, ՀԺԿ-ն, ՍԴՀԿ-ն եւ մյուսները: Խնդիրն այստեղ առաջին դեմքերը չեն, պարզ է, որ կուսակցության ներկայացուցիչը գալիս է առաջին դեմքի հրահանգով, իսկ երբ կարիք լինի առաջին դեմքերի՝ մի վերջնական ամփոփման, մենք կհրավիրենք: Իսկ առաջիկա մեր կլոր սեղանին, որ կայանալու է նոյեմբերի 1-ին, մենք պետք է քննարկենք, թե երկիրը ծանր վիճակից դուրս բերելու ինչ ելքեր են առաջարկում կուսակցությունները: Ես կարծում եմ, որ դա մի կլոր սեղանի թեմա չէ, մի քանիսը կունենանք, մինչեւ որ ընդհանուր հայտարարի գանք եւ որոշում կայացնենք, որը կդնենք իշխանությունների սեղանին, որ շտապ պիտի կատարվի: Ես դեռ չգիտեմ, թե ինչպիսին կլինի որոշումը, գուցե վերջնական որոշումը լինի Սերժ Սարգսյանի հրաժարականը, ես առայժմ չեմ կարող ասել: Մենք կողմ ենք, որ ամեն ինչ լինի անցնցում, խաղաղ, բայց հուսով ենք, որ իշխանությունն այս մեր բարի կամքը կհասկանա եւ իրեն կպահի իշխանության պես, ոչ թե մարտի 1-ի ստահակի պես: Իսկ եթե կփորձի այդպես պահել, ուրեմն այս իշխանությանը պետք է ճանապարհել բոլոր միջոցներով: Մեր նպատակն է՝ ազատամարտիկներով դառնալ կուսակցություններին համախմբող մերանը՝ երկիրն այս վիճակից դուրս բերելու համար, եւ այդ հարցը պարտադիր պետք է լուծվի: Մենք կուսակցություն չենք, քաղաքական ուժ չենք, մենք տղերք ենք, ովքեր հանուն հայրենիքի թշնամու ուղղությամբ փամփուշտ են կրակել:

- Բայց շշուկներ կան, որ ուզում եք կուսակցություն դառնալ: Նման ծրագիր կա՞ հեռանկարում:

- Այս պահին նման նպատակ չկա մի պարզ պատճառով, որ մենք գործոն ենք առաջին հերթին, մենք հաղթած եւ պահանջատեր զինվոր ենք, մեր կուսակցություններին դիմեցինք՝ բոլորն էլ ըմբռնումով մոտեցան, բոլորի հետ էլ մենք հանդիպեցինք: Այսինքն՝ մենք այլեւս գործոն ենք, մենք կուսակցություն դառնալու խնդիր չունենք ոչ այսօր, ոչ էլ վաղը, սկզբունքորեն այդպիսի հարց չի քննարկվել:

- Իսկ, ասենք, Արտաշես Գեղամյանի կուսակցությանն ինչո՞ւ չեք հրավիրել կլոր սեղանի:

- Մուտանտ կուսակցություններին, ժողովրդի հավատը ծախած կուսակցականներին մենք չենք կանչում: Արտաշես Գեղամյանը ծախեց ժողովրդի հավատը, ժողովրդի հավատը ծախեց նաեւ Արթուր Բաղդասարյանը, երկուսն էլ, հայհոյելով իշխանություններին, ձայն ստացան ժողովրդից, երկուսն էլ այդ ձայները տրամադրեցին Սերժ Սարգսյանին: Մենք դավաճանների հետ չենք նստում սեղան:

- Իսկ Հանրապետականի հետ փորձե՞լ եք հանդիպել:

- Նախ մենք պիտի հանդիպեինք Սերժ Սարգսյանի հետ, առաջարկեցինք, մեր խնդիրը մեկն էր, ինչը ես այս պահին ներկայացնում եմ, նույնը պետք է ներկայացնեի Սերժ Սարգսյանին, բայց նրա կողմից՝ ձայն բարբառո հանապատի: Ինչպես հայտնի ֆիլմում է ասում. եթե ասում եմ ես, ուրեմն Արուսը հետս ա: Սերժի «Արուսներն» էլ Գալուստ Սահակյանը-բանն են, այնպես որ, առանց Մուրադի Արուսը ո՞նց գա, իսկ Մուրադին չտեսանք՝ պատկերավոր ասած: 

- Ձեզ մեղադրում են, որ սեւեռվել եք Սերժ Սարգսյանի հրաժարականի պահանջի վրա, գործնականում ոչինչ չեք անում:

- Ես հիմա էլ չեմ ասում, թե Սերժ Սարգսյանի հրաժարականն ենք պահանջում, մենք ուզում ենք աջակցել, ժողովրդին մոբիլիզացնել, կուսակցությունների հետ նստենք զրուցելու, որպեսզի անկեղծ գնահատենք իրավիճակը: Որոշենք՝ այ, էս է պետք, եւ դնենք իշխանությունների սեղանին, ասենք՝ արեք: Կանեն՝ ուրեմն կշարունակեն աշխատել, չե՞ն անի՝ ռադ են լինելու: Մենք ուզում ենք ստեղծել համագործակցային կառավարման մեխանիզմ, մենք ուզում ենք միասին համատեղ կառավարել, սա մեխանիզմ է, որը կարող է դառնալ Հայաստանի ապագա կառավարման մեխանիզմը:

- Վերջերս Մեքենա ներկրողների միավորման հետ համատեղ ասուլիս տվեցիք: Համագործակցո՞ւմ եք նրանց հետ:

- Այդ տղաները եկան, մեզ դիմեցին, թե մենք խնդիրներ ունենք, մեզ օրինական չեն գրանցում, հետո միասին ասուլիս տվեցինք, այդ ժամանակ իրենք խոսեցին մեր սոցիալական խնդիրների մասին, թե մենք եթե լավ աշխատենք, ազատամարտիկների սոցիալական խնդիրները կլուծենք, որը մեզ համար անընդունելի է: Այնպես որ, համարենք չստացված համագործակցություն, այլ խնդիր չկա:

- Իսկ ո՞վ է ձեզ ուղղորդողը, ձեր շարժման «ուղեղը»: Աշոտ Մանուչարյանի անունն են տալիս:

- Որպես քաղտեխնոլոգներ, դիմել ենք ոչ միայն Աշոտ Մանուչարյանին, այլեւ Վարդան Խաչատրյանին եւ մեր գիտնականներին, մենք բոլորի հետ հանդիպում ենք, մենք իրավունք չունենք սխալ քայլեր անելու: Այդ ենթատեքստի մեջ, այո, հանդիպում ենք եւ ուրախ կլինեինք, որ Աշոտ Մանուչարյանն անվերապահ նվիրվեր այս գործին եւ մեզ ղեկավարեր նաեւ, բայց, ցավոք, էդպես չի, ընդամենը ճշտում ենք մեր քայլերը, խնդրում ենք մեր իմացածին ավելացնել իրենց իմացածը, որ շատ բնական երեւույթ է. թե հիմա ով ինչ կասի՝ իր գործն է: Այդուհանդերձ, մենք ամեն անգամ սիրով խոսք ենք տալիս Աշոտ Մանուչարյանին մեր հանրահավաքներին:

- Ասում են նաեւ, որ ձեզ ֆինանսավորում է ԱԱԾ նախկին պետ Կառլոս Պետրոսյանը:

- Ես ուրախ կլինեի, որ մեզ ֆինանսավորեին անշահախնդիր, Կառլոս Պետրոսյանը լիներ, թե Գագիկ Ծառուկյանը, քանի որ տղերքս նեղվում ենք, երբ գնում ենք շրջաններ, հավաքվում ենք՝ ով ինչ ունի, մի կերպ ճամփորդում կամ մեր տաքսիստ ընկերների մեքենաներով: Ասեմ, թե ինչու են Կառլոս Պետրոսյանի անունը կապում իմ անվան հետ. ես մոտ մեկ տարի Մոսկվայում էի գտնվում, այնտեղ ընդհանուր ընկերներ կային, մեզ ծանոթացրին, եւ հաճույքով հետը մի բաժակ խմում էի, ինքը հետաքրքիր զրուցընկեր է, իսկ մինչ այդ միայն նկարով էի տեսել: Ընդամենը այդքանը: Մի գարշելի երեւույթ կա. մեր երկրի հատուկ ծառայությունները՝ Գորիկ Հակոբյանի գլխավորությամբ, բացի «ժուչոկ» դնելուց այլ գործով չեն զբաղվում, իսկ եթե խոսել եմ Կառլոս Պետրոսյանի հետ, ուրեմն լսած պիտի լինեն: Գուցե Գորիկ Հակոբյանը վախենում է, որ Կառլոս Պետրոսյանը ետ կգա, եւ ԱԱԾ-ն տարածում է նման հերյուրանքներ:    

Ֆելիքս ԵՂԻԱԶԱՐՅԱՆ