Ես չէի ուզենա, որ Գագիկ Ծառուկյանի հետ պատահեր այն, ինչ պատահեց

ԲՀԿ-ի բացակայությունը երեկ ուրախ-զվարթ տրամադրություն էր բերել ՀՀԿ-ականներին, պատգամավորները միջանցքում բարձրաձայն հումորներ էին անում, թե աշխատանքներն առաջ չեն գնում առանց ԲՀԿ-ի, ոմանք սպառնում էին հետեւել ԲՀԿ-ի քայլին: Սակայն քչերն էին ԲՀԿ-ՀՀԿ հակամարտության մասին ձայնագրիչների մոտ խոսելիս նույնչափ աշխուժություն դրսեւորում եւ հորդորում էին մեկնաբանություններ վերցնել ԲՀԿ-ականներից: ՀՀԿ տարեցներից Համլետ Հարությունյանը նույնպես «անցողիկ» համարեց երկու ճամբարների վեճը եւ պատասխանեց մի քանի հարցերի:

- Գագիկ Ծառուկյա՞նն է միայն խայտառակում ռեսպուբլիկան, նա՞ է միակ ապաքաղաքական տարրը, ֆեոդալիզմի ներկայացուցիչը:

- Չէ, բայց ո՞վ ասաց, որ մենակ ինքն է, ուղղակի իր մասին է խոսքը եղել, իր մասին է ասվել:

- Իսկ կթվարկե՞ք անուններ, թե էլ ովքեր են խանգարում:

- Ես կարծում եմ, որ ֆեոդալներ շատ կան:

- Ձեր թիմում էլ կան:

- Կարող ա եւ կան, բայց ես կարծում եմ, որ խոսքն ընդհանուրի մասին է: Ընդհանրապես, օլիգարխիան քաղաքականությունից պետք է դուրս գա, իսկ նախագահն էլ այդ մասին է ասել:

- Իսկ ինչո՞ւ է հայտնվել քաղաքականության մեջ եւ նախեւառաջ ձեր կուսակցության, ինչո՞ւ նախ չեք հանում ձեր կուսակցությունից:

- Ես ասացի՝ ընդհանրապես, խոսքն այդ մասին է: Սա թիմային խաղ չէ, նախագահը, երբ որակումներ է տալիս, ընդհանրացնում է, ես եմ կարծում, որ օլիգարխները պետք է քաղաքականության հետ կապ չունենան:

- Իսկ Դուք կիսո՞ւմ եք Ձեր ղեկավարի կարծիքները, որ Ծառուկյանը տկարամիտ է, շատ բան չի հասկանում…

- Ոչ, ոչ, նորից Ծառուկյանի հարցը մի մեջբերեք, Ծառուկյանին ինչո՞ւ եք ուզում դուք դարձնեք քավության նոխազ, ամեն ինչ կապեք Ծառուկյանի հետ:

- Բայց չէ՞ որ ճնշումներ կան, հենց նրա անունն են Ձեր կուսակիցները տվել:

- Իսկ ո՞վ է ասել, թե ճնշումներ են լինում, ԲՀԿ-ն այստեղ կա, ուղղակի բոյկոտ է արել, ի՞նչ ճնշումների մասին է խոսքը:

- Եթե ճնշում չլիներ, նրանք հետ չէին կանգնի հանրահավաքից, որով խոստանում էին ձեր իշխանության վերջը տալ: Իրենք ասում են, որ տոտալ ճնշումներ են եղել:

- Դե, դա իրենց կարծիքն է, օրինակ, ո՞վ է խանգարում, որ գնան միտինգ անեն, հենա՝ մարտի 1-ին են անում:

- Իշխանության հույսը ճնշումնե՞րն են, հնարավո՞ր է մի ամբողջ ժողովրդի ճնշել, որոնք դուրս կգան իշխանության դեմ:

- Բայց ինչի՞ եք ամեն ինչ խառնում, եւ այստեղ հերոսացնել մեկին, խառնել ժողովրդի հետ, տեղին չէ: Ի՞նչ է եղել, կա ԲՀԿ, կա այդ ֆրակցիան, եւ այն կարծիքին եմ, որ կմնա քաղաքական դաշտում: Ես չգիտեմ՝ ինչից առաջացավ այս ամեն ինչը, ես այն, ինչին խորքային չեմ տիրապետում, չեմ կարող ասել: Ինչու. չեմ կարող երեւակայությանս զոռ տալ:

- Օրինակ Սերժ Սարգսյանն ասում էր, որ համբերության բաժակը լցվել է, հոգնել են «այբ»-ը «բեն»-ից չտարբերողներից, Աշոտյանն էլ ասում էր, թե «Վարդանանք»-ը չի կարդացել, Պյութագորասի թեորեմ չգիտի ու իրավունք չունի քաղաքական լուրջ հայտ ներկայացնել:

- Հարցրեք Աշոտյանից, ես իսկապես չգիտեմ՝ «Վարդանանք»-ը կարդացել է, թե ոչ, թեորեմ լուծել գիտի, թե ոչ, Աշոտյանը կրթության նախարար է, գուցե ինքը քննել ա էդ մարդուն, գիտի: Ես երբ շփվել եմ Գագիկ Ծառուկյանի հետ, իմ վրա թողել ա նորմալ, կիրթ, քաղաքավարի մարդու տպավորություն: Ես չեմ կարող ոչ նրա կրթական ցենզի մասին խոսել, ոչ նրա հարստության, ես որպես գործընկերոջ կարող եմ ասել, որ նա միշտ իմ վրա դրական տպավորություն է թողել:

- Այդ դեպքում տարօրինակ չե՞ն Ձեր թիմակիցների որակումները Ծառուկյանի վերաբերյալ, օրինակ, ինչո՞ւ Դուք չհակադարձեցիք նրանց, եթե այլ կարծիք ունեք:

- Իրենք թող պատասխանեն, ես իմ գործընկերների, կուսակիցների արածների համար ոչ մի պատասխանատվություն չունեմ, մարդկայնորեն կարող է ինձ դուր չի եկել, բայց ես իմ ասածներին եմ պատասխանատու: Նրանք իրենց քաղաքական հաշվարկներն ու նպատակներն ունեն, ես առաջնորդվում եմ ավելի շատ մարդկային հարթության մեջ, ես չէի ուզենա, որ Գագիկ Ծառուկյանի հետ պատահեր այն, ինչ պատահեց:

- Իսկ Դուք կո՞ղմ եք Ծառուկյանին մանդատից զրկելուն:

- Հարցը դեռ քննարկման դրված չէ, դեռ վերջնական լուծում չկա, եւ հնարավոր է, որ չզրկվի, որովհետեւ բացակայությունների մեծ մասը եթե հարգելի համարվի, նա չի զրկվի:

- Հիմա Ծառուկյանն իրավունք ունի՞, թե՞ չունի քաղաքականությամբ զբաղվելու:

- Ես չեմ կարծում, որ այդ հարցը ես պետք է որոշեմ:

- Ձեր գործընկերները, Դուք նույնպես պահանջում եք, որ գործարարը գործարարությամբ զբաղվի, որովհետեւ այդ մարդիկ իրենց առջեւ դրված տեքստերն անգամ չեն կարողանում նորմալ ընթերցել, ուր մնաց մեծ քաղաքականությամբ զբաղվեն:

- Գիտեք, ինձ շատ դժվար դիլեմայի առաջ եք դնում… Բայց կարդում էր, չէ՞, մարդը, գուցե իմ գործընկերները մի քիչ չափազանցացրել են, բայց ես տեսել եմ, որ լավ էլ կարդում է:

- Այդ դեպքում հնարավո՞ր է ԲՀԿ-ին ու Ծառուկյանին իսկապես իշխանության այլընտրանք տեսաք, որ ճնշեցիք, վախեցաք նրանից:

- Անկեղծորեն եմ ասում. այսօր ավելի շատ քաղաքական շոուներ են կազմակերպում, քան ռեալ ուժ ունեն իշխանությունը վերցնելու համար, այսօր չկան այդ նախապայմանները, այդ հեղափոխական վիճակը ես չեմ տեսնում: ՀՀԿ-ն այսօր իր կառույցներով ու ղեկավարությամբ ավելի հզոր կուսակցություն է, քան բոլորը: Ես կարծում եմ, որ քաղաքական իրավիճակից վախենալու խնդիր չկար, այլ ավելի շատ՝ երկրի ներքին անվտանգության եւ արտաքին անվտանգության: Եթե ներքին վայրիվերումներ կան, ապա մեզ լսում են, չէ՞, դա ունենում է արտաքին վտանգ: