Բաց նամակ ԵՏՄ նորեկ Ղրղզստանի նախագահ Ալմազբեկ Աթամբաևին
![Բաց նամակ ԵՏՄ նորեկ Ղրղզստանի նախագահ Ալմազբեկ Աթամբաևին](https://hraparak.am/uploads/images/4b7d365ebe6154e6acc9a0db3dad8d78.jpg)
Բարև, շատ բարև մեծարգո Ալմազբեկ ջան
Ինչ էլ լավ անուն ունես... Որ մեր նախագահի հետ լավ լինես, ձեր երկուսից «алмазные серёжки» կստացվի: Հումորի զգացումից ո՞նց ես: Դե լավ:
Ի՞նչ կա, չկա ձեր կողմերում: Լա՞վ եք, տուն, տեղ, երեխա...
ТАСС-ից իմացա, որ նստել, միամիտ-միամիտ կարծում ես, որ Եվրասիական տնտեսական միությանն անդամակցելը խթան կհանդիսանա հանրապետությանդ տնտեսության զարգացման համար: Կարդացի ու մտածեցի մի երկու տող գրեմ, որ ռուսական գործակալություններին սրանից հետո նման միամիտ բաներ չասես: Այդ ռուսները մի հետաքրքիր խոսք ունեն, ասում են՝ «Обещанного три года ждут»: Ռուսերեն կարդում ես, չէ՞:
Ասեմ, բարեկամ, որ մենք քեզ նման մտածում ենք 2013 թվականի սեպտեմբերի 3-ից և մեզ ընդամենը մեկ տարի է մնացել, որ ԵՏՄ-ն խթան հանդիսանա մեր հանրապետության տնտեսության զարգացման համար: Որ ճիշտն ասեմ, այս ընթացքում ոչ թե ԵՏՄ-ն է խթանում մեզ, այլ մենք ու մեր ղեկավարներն են խթանում ԵՏՄ-ին: Ախպեր, մասնագետ են ուզել՝ տվել ենք, քարոզչությո՞ւն է պետք՝ անում ենք, իսկ մեր վարչապետն էլ վիզ է դրել, որ ռուսական ռուբլին չմեռնի: Պատկերացնո՞ւմ ես, գազի դիմաց ռուբլով ենք վճարելու: Թե վերջներս ինչ է լինելու՝ չգիտենք:
Ալմազբեկ ջան, չնեղանաս, բայց նախանձում եմ մեծ լավատեսությանդ: Ասել ես՝ ԵՏՄ-ին անդամակցելուց հետո Ղրղզստանի առաջ բիզնեսի, արտադրության վերակառուցման նոր հնարավորություններ են բացվում։ Լավ կլիներ՝ ոտքդ մի հատ Հայաստան գցեիր ու մեր բիզնեսմենների հալը հարցնեիր ԵՏՄ մտնելուց հետո: Մեռած են թաղած չեն խեղճերը: Մեր արտադրության մասին էլ չեմ խոսում: ԵՏՄ մտնելուց հետո եղածն էլ վերացավ ու հիմա Հայաստանը Ռուսաստանից է լոլիկ ներկրում: Այնպես որ մի քիչ զգույշ եղիր արտահայտություններումդ:
Ժողովուրդդ մեղք է, իզուր հույս մի տուր, թե ձեզ հաջողվելու է ֆինանսական միջոցներ ներգրավել ԵՏՄ-ից և լուծել ֆինանսական ճգնաժամի հարցը: Նման բան չկա ԵՏՄ-ում: Ընդհակառակը, ԵՏՄ-ն է մեզնից միջոցներ ներգրավում: Ինչ ունենք-չունենք տալիս ենք, որ մեր լույսը մեր գլխից չկտրեն, պատկերացնո՞ւմ ես:
Ուրախ եմ, որ Ղրղզստանը «բարենպաստ վայր» է բիզնեսի, արտաքին և ներքին ներդրումների համար: Հուսամ՝ անկեղծ ես ասում: Այլապես մերոնք էլ են ասում, որ Հայաստանը գրավիչ է բիզնեսի և ներդրումների համար... Էդ ի՞նչ է, ձեզ մոտ հարկային չկա՞: Մեր հարկային մարմինները շատ են առաջադիմել և լրիվ սերտաճել են կառավարության հետ: Այդ գծով գերնախարար էլ ունենք: Հիմա իրար հետ են գործ անում: Կառավարությունը գործարար է բերում Հայաստան, տանում գրավիչ վայրեր՝ Գառնի, Սևան, Ծաղկաձոր, համոզում, որ բիզնես դնի: Ու հենց բիզնեսը դնում է, ներդրումներն էլ հետը, կառավարույունը հարկայինին աչքով է անում: Դրանից հետո, արդեն՝ խեղճ բիզնեսմեն: Էլ չեն նայում ազգություն, տարիք, սեռ, այնպես են տկլորացնում, որ հազիվ մի ձեռք շորով իրենց գցում են ինքնաթիռ ու հայդա Հայաստանից: Ուրեմն, ասում ես՝ ձեզ մոտ այդպիսի բաներ չկան, հա՞: Լավ է, ուրախ եմ:
Որախ եմ նաև Ղրղզստանի հավակնոտ ծրագրերի համար, որոնք ԵՏՄ-ից շատ ու շատ ավելի բարձր նշաձող են սահմանում: Ոզում եք, որ ղրղզ գործարարները «բարձր գործնական հեղինակության և ակտիվության համաշխարհային օրինակ» դառնան: Լավ է: Դուք, իհարկե, ուզում եք որ ղրղզ գործարարները այդպիսին դառնան Ղրղզստանում, չէ՞: Դա բնական է ձեր պարագայում, որովհետև դուք մեզ նման սփյուռք չունեք: Սփյուռքի մեր գործարարները աշխարհին հայտնի մարդիկ են, իրենց ոլորտների իսկական օրենսդիրներ: Հուսամ՝ տեղյակ եք: Իսկ ինչ մնում է մեր ներքին նշանակության բիզնեսմեններին, ապա ասեմ, որ ինչ անում, չենք անում, նրանք միջազգային մակարդակի չեն ձգում: Հենց մի քիչ թռփոշանում են, մեկը կա, գալիս, փայ է մտնում նրա բիզնեսում: Միայն մի քանի ընտրյալ ունենք, էն էլ սուպերմարկետից դենը բան չգիտեն: Ինչ ասեմ, ախպեր, աշխատիր այնպես անել, որ ձեր գործարարները, մանավանդ նրանք, ովքեր մենաշնորհներ ունեն, ստվերում չմնան մերոնց պես ու չփտեն:
Իսկ Սահմանադրության մասով ի՞նչ ես մտածում: Ասեմ՝ մի քիչ շառոտ գործ է: Մերոնք ասում են, որ դա վերարտադրության գործիք է: Ճիշտ է, մեր Մարգարիտ Եսայանն այդ մտքից ուղղակի ուշագնաց էր եղել, բայց ընդդիմադիրներն իրենցն են պնդում՝ վերարտադրության գործիք, հա վերարտադրության գործիք, չնայած, որ Սերժի վերարտադրության գործիքին էլ չի էդ ղալմաղալը:
Դե լավ, ժամանակդ շատ չխլեմ: Մաղթում եմ քեզ բոլոր հույսերիդ իրականացում, իսկ ղրղզ ժողովրդին՝ անփորձանք ապագա և բարօրություն ԵՏՄ-ի գրկում:
Հա, Նուրիկին շուտ-շուտ ե՞ս տեսնում: Կբարևես իմ կողմից ու կասես՝ Ալիևի ցնդած նամակները քիչ կարդա և ավելի լուրջ գործով զբաղվի: Այլապես ինչ ԵՏՄ է մտել, անծայրածիր արոտավայրերի երկիր Ղազախստանը սկսել է Բելառուսից կաթ առնել:Թվում է՝ մանրուք է, բայց այնքան էլ հաճելի չէ:
Հարգանքներով՝
Էդիկ Անդրեասյան
Հ.Գ. Հիշեցնենք, որ Ղրղզստանը ԵՏՄ լիիրավ անդամ է դարձել 2015թ. օգոստոսի 12-ից։
Կարծիքներ