Ակցիայի մասնակիցներին չէր բավարարում նախարարը, նրանք ուզում էին հանդիպել վարչապետին. ֆոտո,վիդեո

Այսօր կառավարության հերթական նիստին զուգահեռ կառավարության շենքի բակում տեղի էր ունենում հերթական բողոքի ակցիան: Քաղաքացիները դրսում սպասում էին իրենց ընդունելությանը՝ հույս ունենալով, որ հանդիպելու են վարչապետի հետ: Նրանք պնդում էին, որ չեն ուզում տեսնել իրենց խնդրին համապատասխանող ոչ նախարարության ներկայացուցիչներին, ոչ էլ նախարարին, անձամբ ուզում են հանդիպել Կարեն Կարապետյանի հետ, քանի որ տարիների փորձը ցույց է տվել, որ իրենց խնդիրները, անկախ նախարարի քաջատեղյակ լինելուց, շարունակում են օդում կախված մնալ: Այսօր կառավարություն էին հասել Արարատի մարզի Քաղցրաշեն համայնքի բնակիչները՝ իրենց մթերված խաղողի դիմաց գումարները չվճարելու պատճառով: Ինչպես իրենք նշեցին, ամեն անգամ խոսք է տրվում, որ կվճարեն, սակայն այդպես էլ խնդիրը չի լուծվում: Կառավարության շենքի դիմաց էին նաև տարիներ ի վեր իրենց 40 հազար դրամ հաշմանդամության թոշակի համար պայքարող օդաչուները, ովքեր հաշմանդամություն են ձեռք բերել պետական ծառայության ժամանակ։

Այստեղ իրենց ուրույն տեղը ունեցող, նույն վայրում կանգնող և «Նաիրիտ, վարչապետ» վանկարկող նաիրիտցիները ևս ներկա էին։ Նրանց պահանջը մնում է նույնը՝ Նաիրիտի վերագործարկում։

Տարիներ առաջ զինվորական ծառայության ընթացքում մահացած զինծառայողների մայրերը կանգնած էին կառավարության դիմաց, նրանց միակ պահանջը արդարության վերականգնումն է։ Իրենց խոսքով՝ որդիներին սպանել են հայոց բանակում։

Մանրամասները՝ տեսանյութում։