«Վարչապետն էլ համաձայն է, որ իր փեսան փոխնախարար լինի նույն կառավարությունում». Անահիտ Բախշյանը՝ Կարեն Կարապետյանին
Կառավարության երեկվա նիստում վարչապետը հանձնարարություններ տվեց կրթության և գիտության նախարարին, մարզպետներին, Երեւանի քաղաքապետին՝ հանձնարարելով 7-օրյա ժամկետում մշակել ու ներկայացնել առաջարկություններ հանրակրթական հաստատությունների ընտրության գործընթացում, ազգակցական կապերի, հովանավորչության եւ շահերի բախման երեւույթների ուղղությամբ: «Ինչի մասին է խոսքը, բոլորդ շատ լավ հասկանում եք` մայր եւ աղջիկ, եւ այլն: Ես չեմ բացառում, որ նման դեպքեր կլինեն, պետք է տարբերակել՝ որտեղ է օբյեկտիվ», -ասաց վարչապետը։
Ազգակցական կապերը առավել ցայտուն են դրսևորվել պետական ապարատում: Օրինակ՝ ԱԺ պատգամավորների զգալի մասը վճարովի հիմունքներով հենց իրենց երեխաներին են տեղավորել աշխատանքի, ինչ մասին բազմիցս գրվել է մամուլում:
«Հովանավորչության ու շահերի բախման առթիվ եթե օբյեկտիվ և սուբյեկտիվ դեպքերը որոշողը դպրոցի տնօրենն է և եթե ինքն իր աղջկան վերցնում է իր մոտ աշխատանքի, ոչ մի օրենք, հանձնարարական թեկուզ վարչապետի տեղին չի, քանի որ դա օրենքը չի արգելում»,-մեզ հետ զրույցում ասաց Երևանի «Բարև Երևան» խմբակցության անդամ Անահիտ Բախշյանը՝ հավելեով. «Ճիշտ այնպես, ինչպես հենց ինքը՝ վարչապետը փաստորեն համաձայն է, որ իր փեսան լինի փոխնախարար կառավարությունում: Օրենքը չի արգելում ոչ մեկը, ոչ մյուսը»: Նշենք, որ վարչապետ Կարեն Կարապետյանի փեսան՝ Հայկ Հարությունյանը, ով նաև ԱԱԾ պետի տեղակալի տղան է, էներգետիկայի և բնական պաշարների փոխնարար է:
Կառավարման տեսակետից, սակայն, ըստ Բախշյանի, բոլորովին նպատակահարմար չէ, երբ ընտանիքի մի անդամը մյուսի իրավասության ներքո է աշխատում, որովհետև այդ դեպքերում այն, ինչ կարելի է լինում ընտանիքի անդամին, արգելված է լինում կոլեկտիվի մյուս անդամներին:
«Դա անարդարության ֆոն կստեղծի թե դպրոցում, թե կառավարությունում: Էդ երևույթին պետք է բարոյականության ու արդարության տեսանկյունից նայել, որովհետև գիտենք, որ պատգամավորի ընտրանիքի որ անդամը որտեղ է աշխատում, որ նախարարի ընտանիքի անդամն է իր ձեռքի տակ աշխատում և նրանք արտոնյալ չպետք է լինեն»,-ասաց Բաշխյանը:
Դպրոցի նախկին տնօրեն Անահիտ Բախշյանի տպավորությամբ՝ վարչապետի ասածը այլ ենթատեքստ ունի. «Կարծես ինքը խոսում է այն դեպքերի մասին, երբ դպրոցի տնօրինությունը ժառանգաբար փոխանցվում է աղջկան, հարսին, բարեկամին: Եթե ուղղակի աշխատում է ու լավ մասնագետ է, ես ոչինչ չունեմ դրա դեմ, բայց ինձ մոտ հակակրանք է առաջացնում այն երևույթը, որ նույն կառույցում ազգակցական կապեր ունեցող մարդիկ հովանավորում են միմյանց՝ սովորաբար գործի հաշվին, քանի որ արդյունավետ աշխատանք չի կարող լինել»:
Անի Առաքելյան
Կարծիքներ