Կարգադրել են մերժել դիմումները

Շուտով կլրանա ապրիլյան պատերազմի մեկ տարին, եւ նրանք, ովքեր հրաշքով ողջ մնացին ու ետ եկան, կշարունակեն պայքարել՝ այդ կռվին իրենց մասնակցությունն ապացուցելու համար: Պատերազմի ծանրությունն իրենց ուսերին տարած երիտասարդ զինվորները, որոնց ականջներում դեռ չեն լռել մարտադաշտի ահեղ ձայները, ըստ անմեկնելի տրամաբանության, կամ ստում են, կամ գլուխ գովում, թե կռվել են պատերազմում:

Աստիճանաբար զավեշտի է նմանվում քառօրյային մասնակցած զինվորների նկատմամբ պետության ու բանակի կամայական վերաբերմունքը: «Ապրիլյան պատերազմին մասնակցել են միայն զոհվածնե՞րը» հոդվածով «Հրապարակն» անդրադարձել էր Ջաբրայիլում մարտական գործողություններին մասնակցած հակատանկային գումարտակի զինվոր Գեղամ Գաբրիելյանին, ում զինգրքույկում այդ մասին հրաժարվում են գրել: «Ստացվում է, թե տղաս չի՞ կռվել»-հարցնում է Գեղամի հայրը՝ Մնացական Գաբրիելյանը:

Էջմիածնի զինվորական կոմիսարիատից օրերս Մնացականին հրավիրել եւ ՀՀ կենտրոնական զինկոմիսարիատից ստացած մի ցուցակ են ներկայացրել, որում իր որդու անունը չի եղել: «Գրանցման բաժնում Գրիգորյան ազգանունով մեկն ասաց, որ մարտական գործողություններին այդ երեքն են մասնակցել, իսկ իմ տղան միայն մարտական հերթապահություն է իրականացրել: Եթե տղաս հակատանկայինում է ծառայել եւ 100 օր դիրքերից չի իջել, ո՞նց կարելի է հավատալ, թե նրան խնայել ու միայն հերթապահություն են վստահել: Բա ոտքի բեկորային վնասվածքը որտե՞ղ է ստացել»:
Էջմիածնի զինկոմիսարիատում Մնացական Գաբրիելյանին եւ մյուս ծնողներին ասել են նաեւ, որ այլեւս դիմումներ չգրեն, որովհետեւ իրենք դիմումներ չընդունելու կարգադրություն են ստացել վերեւներից:

Նկատենք, որ Գեղամ Գաբրիելյանը ԵՊՀ ուսանող է: Եթե մարտական գործողություններին նրա մասնակցության մասին ամրագրվի զինգրքույկում, ուսման վարձը կիսով չափ կզեղչվի: «Ես հողագործ մարդ եմ, աշխատանքից չեմ վախենում, պատրաստ եմ գիշերներն էլ աշխատել ու տղայիս ուսման վարձը տալ: Հարցը փողի մեջ չէ: Ես արդարություն եմ պահանջում: Եթե պիտի չգրվի, ուրեմն թող ոչ մեկինն էլ չգրվի, թե չէ էս ի՞նչ ջոկողություն է»:

Մնացական Գաբրիելյանի կարծիքով, այս «թյուրիմացությունը» գալիս է հրամկազմից: «Կամ դիտավորություն է, կամ թափթփվածություն»,- ասաց նա: Պատրաստվում է խնդրով դիմել ՄԻՊ գրասենյակ:

Սերոբ ՄԱՐՈՒԹՅԱՆ