Ռաքքայից հյուսիս քրդերը եւս չորս գյուղակ են ազատագրել

Սիրիական Դեմոկրատական ուժեր խմբավորումը, որի առանցքը կազմում են քուրդ աշխարհազորայինները, վերջին քսանչորս ժամերի ընթացքում Ռաքքայի հյուսիսում եւս չորս փոքրիկ գյուղեր են ազատագրել: Այս մասին հայտնում է Firat լրատվական գործակալությունը` հավելելով, որ շարունակվում են նաեւ Թաբկա քաղաքի ազատագրման գործողությունները: Ազատագրվել են Ում-Թենեք, Բիր-Քիրբա, Չերվա եւ Հեթաշ գյուղակները: ԻՊ գրոհայինները հեռացել են Ռաքքա՝ նահանջելով այդ գյուղակներից: Գյուղակների խաղաղ բնակչությունը տարհանվել է: Արդեն Թաբկա քաղաքում շարունակվում են մարտական գործողությունները քրդերի եւ ԻՊ զինյալների միջեւ` քրդերի իրականացրած «Եփրատյան զայրույթ» օպերացիայի շրջանակներում, որի նպատակն է նաեւ ազատագրել Ռաքքան: Օրերս քրդերը հայտարարել էին, որ ստեղծում են Ռաքքայի քաղաքացիական համաժողովը, ազատագրումից հետո քաղաքն ու համանուն մարզը կառավարելու համար: