«Ամոթ» վանկարկելով ճանապարհեցին Օսիպյանին. նա առարկեց «Ծռերին» համաներելու դեմ
«Սասնա ծռերի» տասը անդամի գործով դատական նիստին որպես տուժող դատարանում ցուցմունք տվող Վալերի Օսիպյանին ամբաստանյալներից Պավլիկ Մանուկյանը հարցրեց՝ ինչպե՞ս է եղել իրենց վերաբերմունքը նրանց նկատմամբ, վերաբերվե՞լ են որպես արժանապատիվ սպաների: Օսիպյանը պատասխանեց. «Ուղղակի պիտի արտահայտվեմ, չեմ կարող չարտահայտվել. սպային վայել ձեւով դուք կազմակերպեցիք, դա շոու էր ընդամենը, ես տեսա հետեւեցի նկարահանում էի, ես պահանջեցի ՝ չնկարահանեն, ես մինչեւ այդ ձեզ խնդրեցի՝ թույլ տվեք իմ ընկերն ա, ես գնամ, մասնակցեմ հուղարկավորությանը, ես կվերադառնամ, դուք թույլ չտվեցիք: Վերաբերմունքը իմ հանդեպ վիրավորական չի եղել ձեր կողմից, վիրավորական եղել ա, բայց ոչ բոլոր տղաների կողմից»:
Պավլիկ Մանուկյանը հնչեցրեց հաջորդ հարցը. «Պարոն գնդապետ, մենք մտերմիկ զրուցել ենք, ձեր տեղեկություններով՝ Սաշիկը քցել էր ախպորդ, որ դուրս եկաք գնդից, քցածը ետ վերադարձրե՞ց»:
Դատավորը հանեց այդ հարցը, քանի որ այն չէր առնչվում քրեական գործին: Նախագահող դատավոր Մեսրոպ Մակյանը հարց տվեց Օսիպյանին սպանված ոստիկան Յուրի Տեփանոսյանի հետ կապված, թե նրան որտեղի՞ց տեղեկություն, որ Տեփանոսյանին սպանել է ամբաստանյալ Սմբատ Բարսեղյանը, ոստիկանապետն արձագանքեց. «Ականատես չեմ եղել, լրատվամիջոցներից, իրավապահներից, ովքեր խոսում էին, այնուհետեւ գործի հանգամանքներից»: Դատարանը նաեւ հետաքրքրվեց նրանից՝ թե արդյոք ի՞նչ դիրքորոշում ունի «Սասնա ծռերի» նկատմամբ համաներում կիրառելուն:
«Ես կորցրել եմ ընկերներ, եթե չլինեին կորցրած իմ գործընկերները, միգուցե իմ դիրքորոշումն այլ լիներ: Կարծում եմ՝ յուրաքանչյուրը օրենքով նախատեսված իր պատիժը պետք է կրի, դատաքննությունը պետք է շարունակվի»,-եզրափակեց նա:
Դրանից հետո նիստի ներկաները «ամոթ» վանկարկեցին, այդպիսով Օսիպյանը հարցաքննությունն ավարտվեց: Իսկ արդեն դատարանի բակում նրան կրկին «ամոթ» վանկարկելով ճանապարհեցին: Ոստիկանապետը նաեւ չցանկացավ պատասախանել լրագրողների հարցերին, միայն կրկնեց, որ օրենքով խստագույնս պատիժ պետք է կրեն:
Կարծիքներ