Սև լճի հատվածում իրադրության էական փոփոխություն չկա, այն ճգնաժամային է. Փաշինյան

Նիկոլ Փաշինյանն այսօր կառավարության նիստը մեկնարկեց՝ անդրադառնալով Սյունիքի մարզում, մասնավորապես՝ Սև լճի հատվածում երեկվանից ստեղծված իրավիճակին: Նա խոստովանեց, որ իրավիճակը երեկվանից չի փոխվել, իրադրության էական փոփոխություն տեղի չի ունեցել, ադրբեջանական զորքերը շարունակում են գտնվել Սև լճի տարածքում, այնտեղ կա նաև հայ զինվորների ներկայություն:

Նրա խոսքով` այս պահին տարվում են բանակցություններ, որպեսզի ադրբեջանցիները վերադառնան իրենց դիրքերը, այս պահին իրավիճակը ռազմական էսկալացիայի չի հասել, այսինքն` փոխհրաձգություն տեղի չի ունեցել:

Ըստ Փաշինյանի` տեղի է ունեցել ադրբեջանական զինուժի կողմից նախապես պլանավորված սադրանք, քանզի կեղծ քարտեզներով եկել փորձել են ապացուցել, որ դա իրենց տարածքն է:

Նա նաև անդրադարձավ նրան, որ երեկ ասում էին` ՊՆ-ն ու ԱԱԾ-ն հերքում էին, հետո հաստատեցին` նշելով, որ ՊՆ-ն և ԱԱԾ-ն հերքել են մարտական գործողությունների վերաբերյալ լուրերը, ոչ թե բուն եղելությունը: