«Հրապարակ». Ոչ թե «Հանրապետություն»-ՔՊ հուշագիրն է մտահոգիչ, այլ՝ «Հանրային ձայնի» օգնությունը

«Հանրապետություն» կուսակցության հնաբնակներից մեկը` Նորիկ Եղիազարյանը, հոկտեմբերի 10-ին Երեւան քաղաքի ավագանու նիստից ժամեր առաջ հայտարարեց, որ դադարեցնում է անդամակցությունը կուսակցությանը, որի երկարամյա անդամն էր նա: Եղիազարյանը «Հրապարակի» հետ զրույցում ասում է, որ «Հանրապետություն» կուսակցության հետ չունի որեւէ գաղափարական տարաձայնություն, կուսակցությունից հեռանալու պատճառը, ըստ նրա, օրենքների կատարման եւ ներկուսակցական ժողովրդավարության հետ կապված մի շարք հարցերում կուսակցության ղեկավարության ու իր միջեւ վաղուց ի վեր առկա, չլուծված էական տարաձայնություններն են: 

- Ի՞նչ տարաձայնությունների մասին է խոսքը: Ինչո՞ւ առավել հստակ չեք ասում «Հանրապետություն» կուսակցությունից հեռանալու պատճառը:

- Թույլ տվեք ասածիս սահմանագծերից դուրս չգամ: Ավելի կոնկրետ` չեմ կարող ասել, դրանք մեկ կամ երկուսը չեն, գոյացել են տարիների ընթացքում: Կուտակվեցին, կուտակվեցին, եւ ես եկա այդ եզրակացությանը:

- «Հանրապետություն» կուսակցությունը մշտապես հարել է իշխող ՔՊ-ին, իսկ Երեւանի ընտրությունից հետո արդեն բացահայտորեն է գործարքի գնացել իշխող թիմի հետ: Դուք կուսակցությունից հեռացաք ավագանու նիստից մեկ օր առաջ: Գուցե սա՞ է նաեւ պատճառ հանդիսացել, որ հեռանաք:

- Չէ, եթե լավ նպատակով են համագործակցում, երկիրն այս ճգնաժամային իրավիճակից հանելու համար, ապա ես գովելի եմ համարում միասնությունը:

- Այսինքն` գովելի՞ է, որ ՔՊ-ն «Հանրապետություն» կուսակցության ձայների հաշվին քաղաքապետ ընտրեց:

- Գովելի է, թե ոչ, դա հստակ ընտրության արդյունք է: Չես կարող դրանից խուսափել, չնայած ես ուզում էի, որ իշխող թիմն իր հարաբերությունները կարգավորեր «Ազգային առաջընթաց» կուսակցության հետ, քանի որ նրանք ամենասկզբում նույն թիմից էին…. Ինչը չեմ կարող ասել Դոգի մասին: Կարծում եմ, որ ոչ թե «Հանրապետություն» եւ «Քաղաքացիական պայմանագիր» կուսակցության հուշագիրն է ավելի մտահոգիչ, այլ այն, որ դա տեղի ունեցավ «Հանրային ձայն» կուսակցության օգնությամբ ու միջոցով: Մոտ ժամանակներս պետք է սպասել, որ Արտակ Գալստյանի ու Վարդան Ղուկասյանի դեմ հարուցված քրեական գործերը կկարճվեն: «Հանրապետություն» կուսակցությունը միշտ էլ հիմնական հարցերում կանգնել է ՔՊ-ի կողքին, ես դա համարում եմ դրական:

- Բայց երբ կուսակցությունն իրեն հռչակում է ընդդիմադիր` ձայն է ստանում հանրությունից, որքանո՞վ է ազնիվ ու բարոյական, որ հետո աջակցում է իշխանություններին: Արտակ Զեյնալյանն իր հստակ աջակցությունը հայտնեց Նիկոլ Փաշինյանին: Այստեղ խոսքն ի՞նչ ընդդիմադիր լինելու մասին կարող է լինել: Մի՞թե սա ազնիվ է իրենց քվե տված քաղաքացու նկատմամբ: Գուցե միանան, դառնան ՔՊ-ի անդամ, ու այլեւս հարցեր չառաջանան այս առումով….

- Ամենասկզբից էլ մենք դաշինքով` բոլորս միասին, պայքարի էինք դուրս եկել` «Հանրապետություն», ՔՊ եւ «Լուսավոր Հայաստան»: Ես ակտիվ դերակատարում եմ ունեցել այդ պայքարում: Ինչի՞ համար եմ ասում սա, որ հստակ լինի՝ այդ միասնությունը դեռ այն ժամանակվանից է սկսվել: «Հանրապետություն» կուսակցությունն ասում է, որ ինքը կառուցողական ընդդիմություն է: Այն բաները, որ լավ են, գովելի են, ընդունելի են կուսակցության համար, իսկ որոնք սխալ են` ոչ, բնականաբար: Գուցե Ձեր ասածի մեջ էլ կա ճշմարտություն, բայց դա է պատկերը:

- Իսկ ի՞նչ դրական քայլեր է իրականացրել ՔՊ-ն: Զեյնալյանն ասում է, որ չի կիսում այն տեսակետը, որ Փաշինյանն է հանձնել Արցախը: Դուք ի՞նչ եք կարծում այս առումով:

- Ես այն կարծիքին եմ, որ, ինչպես Փաշինյանն է ասում` ինքը մեղավոր է, պատասխանատու, բայց ոչ առաջնային մեղավորն ու պատասխանատուն: Չեմ կարող ասել, թե այդ «խոհանոցում» ինչ է կատարվել, բայց կարծում եմ` մեղավոր ենք բոլորս: Ամեն մեկս՝ մեր չափով: Կան հարցեր, որոնց մասին չեմ խոսում, օրինակ` արտաքին քաղաքականության հետ կապված: Ես երբեմն իշխանություններին քննադատում եմ հապաղելու եւ կրիայի նման դանդաղ առաջ շարժվելու համար, բայց մի կողմից էլ մտածում եմ, որ գուցե բաներ կան, որոնց մասին չգիտեմ, եւ պետք չէ շտապել հետեւություններ անելու համար:

- Օրինակ՝ ի՞նչ:

- Հիմնական պատճառը, որի համար ես աջակցում եմ գործող իշխանություններին` Հայաստանը Ռուսաստանի ստրկացնող լծից ազատագրելն է: Չնայած դանդաղ, բայց քայլեր արվում են, իշխանություններն այդ ճանապարհով են գնում: Փորձում են պետականությունը պաշտպանել:

- Հայաստանն իր պետականությունը կորցնելու վտանգի առաջ է կանգնել:

- Այնքան էլ համաձայն չեմ, հակառակը` ես լավատես եմ, գտնում եմ, որ պետք է կամք դրսեւորել եւ ճիշտ գիծ առաջ տանել: Լարախաղացությունը սխալ է: Ես մեր հետագան քաղաքակիրթ Արեւմուտքի հետ եմ տեսնում, մենք գեներով էլ ենք ավելի շատ այդ քաղաքակրթությանը մոտ: Ես մի գիրք եմ գրել` «Ծնվել կեսօրին եւ մայրամուտից առաջ», այնտեղ հանգամանալից խոսել եմ այդ ամենի մասին:

- Եթե բոլոր առումներով կիսում եք «Հանրապետություն» կուսակցության գաղափարները, ինչո՞ւ հեռացաք:

- Ավելին այդ մասին մի հարցրեք:

- Իսկ հնարավո՞ր է դառնաք ՔՊ-ի անդամ:

- Ոչ, ես նրանց էլ հարկ եղած դեպքում քննադատում եմ, կուսակցական չեմ ցանկանում լինել: