Քաղաքացիական դաշտից տեղափոխվում եմ քաղաքական դաշտ

Հարցազրույց  ԱԺ պատգամավոր Էդմոն  Մարուքյանի հետ.



-Պարոն Մարուքյան, առաջադրվելով եւ ընտրվելով ԱԺ պատգամավոր, երեւի մտածել եք, որ կան այնպիսի օրենսդրական բացեր, որոնք հենց Դուք պետք է լրացնեք: Ո՞րն է լինելու Ձեր առաջին նախաձեռնությունը:



- Այդպիսի բազմաթիվ օրենսդրական նախաձեռնությունների մտադրություններ ունեմ եւ արդեն գիտեմ, թե ինչ եմ անելու: Կարծում եմ՝ առաջին հերթին պետք է ներկայացնեմ Ընտրական օրենսգրքի հետ կապված փոփոխությունների փաթեթ, քանի որ այդ փոփոխությունների անհրաժեշտությունը քննարկվում է հասարակական սեկտորում, իսկ ես, լինելով հասարակական սեկտորի ակտիվ ներկայացուցիչ, նաեւ իմ փորձից առաջացած նախաձեռնությունները կներկայացնեմ խորհրդարան:



Մյուսը, ինչպես գիտեք, նախապատրաստվում է «Քրեական դատավարության մասին» նոր օրենսգիրք, որտեղ արմատական փոփոխություններ են առաջարկվում, եւ ես, լինելով Փաստաբանների պալատի ներկայացուցիչ, իմ մասնակցությունն եմ ունենալու դրա ընդունմանը: Ես հիմնականում զբաղվել եմ մարդու իրավունքների պաշտպանությամբ եւ իմ օրենսդրական գործունեության ընթացքում փորձելու եմ յուրաքանչյուր օրենքում տեսնել մարդու իրավունքների պաշտպանության հարցը: Այդ հարցն իմ գործունեության մեջ լինելու է առաջնային:



- Քաղաքական դաշտը բաժանվում է երկու մասի՝ իշխանության եւ ընդդիմության: Քանի որ ընտրություններում Դուք հանդես եք եկել ընդդիմադիր հռետորաբանությամբ եւ հաղթել եք իշխանության թեկնածուին, կարելի՞ է ենթադրել, որ խորհրդարանում համալրելու եք ընդդիմության շարքերը:



- Խորհրդարանական ընտրությունների քարոզարշավի ժամանակ որեւէ իշխանական կուսակցության, որեւէ իշխանական գործչի հասցեին իմ կողմից քննադատական խոսք չի հնչել, նույնիսկ իմ օպոնենտ Վիկտոր Դալլաքյանի հասցեին ես որեւէ քննադատական խոսք չեմ ասել: Ամենասուր քննադատությունը, որ ես ասել եմ, դա եղել է այն, որ փոփոխությունների ժամանակն է, նոր սերնդին հնարավորություններ տալու ժամանակն է: Ուզում եմ ասել, որ ես հանդես չեմ եկել որպես ընդդիմադիր թեկնածու, ես հանդես եմ եկել որպես քաղաքացիական հասարակության ներկայացուցիչ.



իմ քննադատությունը չի տարբերվել է որպես իրավապաշտպանի արած իմ հայտարարություններից: Ես երբեք չեմ ասել, թե այսինչ անձը կամ այսինչ ուժը պետք է հեռանա, կամ այսինչ բանը պետք է արվի: Ես քննադատել եմ երեւույթները. օրինակ ասել եմ, որ կա կոռուպցիա, մեխանիզմներ եմ առաջարկել դրա դեմ պայքարելու համար:



- Բայց չե՞ք համարում, որ եթե կա կոռուպցիա, դրա պատասխանատուն իշխանությունն է, դրանում ներգրավված կոնկրետ անձինք:



- Ես դրա պատճառները փնտրում եմ ոչ թե անձերի, այլ համակարգային խնդիրների մեջ: Չեմ կարող ասել, որ իշխանությունները դրանում որեւէ մեղք չունեն, բայց չեմ էլ ասի, թե նրանք միակ մեղավորն են: Օրինակ, բազմաթիվ օրենքներում կան կոռուպցիոն ռիսկեր, բացեր, ասել, որ դրա մեղավորն այսօրվա իշխանությունն է, ճիշտ չէ, քանի որ օրենքներ կան, որ ընդունվել են 1990-ականներին կամ որ ընդունվել են 2000-ականներին: Դրա համար ես ասում եմ, որ կան օրենքներ, որոնք թույլ են տալիս այս կամ այն չինովնիկին փող աշխատելու, եւ առաջարկում եմ փակել այդ բացը: Բացի այդ, պետք է հորդորել իշխանությանը, որ իրավակիրառական պրակտիկայում օգտագործեն օրենքները, վերացնեն բացերը:



- Ասում են, որ խորհրդարանական ընտրությունների ժամանակ Ձեզ աջակցել են նաեւ Լոռու մարզպետը եւ Վանաձորի քաղաքապետը: Որպես ապացույց, ներկայացվում է այն փաստը, որ ՀՀԿ-ին ձայն տված հազարավոր ընտրողներ ընտրել են Ձեզ: Վիկտոր Դալլաքյանը ստացել է 9 հազար 700 ձայն, իսկ ՀՀԿ-ն՝ 13 հազար: Այսինքն, ՀՀԿ-ին ձայն տված 3 հազարից ավելի ընտրող քվեարկել է Ձեր օգտին:



- Ոչ, նման բան չկա: Տեղական իշխանությունները կատարել են ՀՀԿ ղեկավարության որոշումը՝ պաշտպանել Վիկտոր Դալլաքյանին, եւ Ձեզ ուզում եմ վստահեցնել, որ եւ մարզպետը, եւ քաղաքապետը աշխատել են Վիկտոր Դալլաքյանի համար: Ինձ ընտրել են նաեւ ԲՀԿ-ականներ, ՕԵԿ-ականներ, ովքեր ասել են, որ իրենք թեկնածու չունեն եւ նախընտրում են ինձ:



Գիտե՞ք իմ ընտրությունն ինչու է այսքան խառնաշփոթ առաջացրել. քանի որ չի համապատասխանում որոշ ուժերի հռետորաբանությանը, ըստ որի՝ առանց իշխանության աջակցության հնարավոր չէ ընտրություններում հաջողության հասնել, ես էլ ասում եմ, որ հնարավոր է: Օրինակ ինձ ասում են, թե ինչո՞ւ Երեւանում այսինչ ընդդիմադիր թեկնածուն պարտվեց, իսկ Դուք հաղթեցիք: Ես այդ հարցի պատասխանը չգիտեմ:



Օրինակ են բերում Նիկոլ Փաշինյանին, բայց նա էլ մեծ թվով ձայներ է հավաքել: Ես թիվ 30 ընտրատարածքում եղել եմ այլընտրանքային թեկնածու, հնարավոր է, որ եթե ես էլ լինեի ընդդիմության թեկնածու, ես էլ պարտվեի:



- Ասում են նաեւ, որ Դուք չնայած մեկ տարուց ավելի ապրել եք ԱՄՆ-ում, սակայն Ձեզ մշտական բնակության փաստաթուղթ են տվել:



- Ես բազմաթիվ տեղեր եմ սովորել, իսկ վերջին ուսումնառության վայրը եղել է Մասաչուսեթսի համալսարանը, որտեղ ես ստացել եմ ակադեմիական կրթություն, մագիստրոսի գիտական աստիճան: Բայց այդ ընթացքում Հայաստանից մշտապես չեմ բացակայել. գնացել-եկել եմ: Բացի այդ, երբ ես տեղեկանք էի ստանում, Խաչատուր Սուքիասյանը նման վեճ ունեցավ, եւ բոլորի տեղեկանքները մանրամասն ստուգվել են:



Իսկ ինչո՞ւ դա հիշեցին ընտրություններից հետո. դա ինտրիգային կետ էր, որ փորձ արվի ստվեր ձգել իմ ընտրության վրա: Բացի այդ, հանձնաժողովը կրկին անգամ լսեց բողոքը եւ այն մերժեց: Եթե հանձնաժողովը վճիռ կայացներ ոչ իմ օգտին, ապա ես դիմելու էի Սահմանադրական դատարան:



- Ասում են, որ այդ վեճը չի հասել ՍԴ, քանի որ այն օրը, երբ հանձնաժողովը քննելու էր Դալլաքյանի դիմումը, Դուք եղել եք նախագահական նստավայրում եւ կարգավորել եք Ձեր հարցերը:



- Ես այդ հարցին արդեն պատասխանել եմ:



- Հնարավո՞ր է, որ այդ այցի արդյունքում հայտարարեցիք, թե համագործակցելու եք ՀՀԿ-ի հետ:



- Նախ ես հայտարարել եմ, որ համագործակցելու եմ բոլոր ուժերի հետ: Բայց ընտրություններից հետո երկրում ստեղծվել է նոր քաղաքական իրավիճակ, որի հետ պետք է հաշվի նստել: ԱԺ-ում կա ձեւավորված ամենամեծ խմբակցությունը, առանց որի քվեարկության հնարավոր չէ որեւէ հարց լուծել, եթե անգամ մնացած բոլոր ուժերը միավորվեն: Ես ռեալ պոլիտիկի, իրականության ռեալ ընկալման կողմնակից եմ. եթե ուզում ես որեւէ հարց անցկացնել, որի համար պետք է քվեարկի 66 պատգամավոր, ապա պետք է համագործակցես նաեւ ամենամեծ խմբակցության հետ. դա միանշանակ է: Թե ՀԱԿ-ը, թե ՀՅԴ-ն, «Ժառանգությունը» եւ ԲՀԿ-ն առանց ՀՀԿ-ի հետ համագործակցության չեն կարող որեւէ հարց լուծել:



- Դալլաքյանը ՀՀԿ-ական էր, Դուք համագործակցելո՞ւ եք ՀՀԿ-ի հետ. թիվ 30 ընտրատարածքի ընտրողի համար ի՞նչ փոխվեց Դալլաքյանին Ձեզնով փոխարինելու արդյունքում:



- Քաղաքացիական հասարակությունն ուներ ակտիվ ներկայացուցիչ, փաստաբան, հասարակական կազմակերպություններում ակտիվ գործունեություն ծավալող մարդ, ում ցանկացավ տեսնել խորհրդարանում: Ես քաղաքացիական դաշտից հիմա տեղափոխվում եմ քաղաքական դաշտ, քանի որ ԱԺ-ն հենց այդպիսին է: Հետեւաբար, քաղաքական դաշտը, ի դեմս ինձ, նոր մարդ է գտել, եւ քաղաքացիական հասարակությունը մի նոր մարդ է պատվիրակել քաղաքական դաշտ:



Հունիսի 1-ից Վանաձորում գործում է Էդմոն Մարուքյանի պատգամավորական գրասենյակը, որտեղ յուրաքանչյուր մարդ կարող է գալ, տարբեր խնդիրներ ներկայացնել, ԱԺ պատգամավորի լիազորություններից բխող հարցեր տալ: Եթե որպես պատգամավոր էլ չկարողանամ այդ հարցը լուծել, ապա կմիջնորդեմ այլ պետական ատյանների:



Մի բան, որ մինչ այս չի եղել թիվ 30 ընտրատարածքում: Ես եկել եմ ԱԺ՝ աշխատելու, ես չեմ եկել դեստրուկտիվ գործունեություն ծավալելու: 2004թ. քրեակատարողական հիմնարկներում վերահսկողություն եմ իրականացնում եւ իմ գործունեությամբ ցույց եմ տվել, թե ես ով եմ: Իմ փաստաբանական գործունեությամբ եմ ապացուցել իմ ով լինելը, այնպիսի գործեր եմ վերցրել, որ ոչ ոք չէր վերցնի: Այժմ էլ եմ ասում. իմ մասին թող դատեն իմ աշխատանքով, ոչ թե ասեն՝ սրա հետ համագործակցեց, նրա հետ համագործակցեց, ու նման բաներ:



 Ավետիս ԲԱԲԱՋԱՆՅԱՆ