ՀԱԿ-ը ռեստարտ անելու կարիք ունի
hraparak
6 Նոյեմբեր 2012 | 07:17
0
Առաջին նախագահ Լեւոն Տեր-Պետրոսյանի գլխավորած արմատական ընդդիմությունը համախոհների մեծ բանակով ավելի քան չորս տարի այս իշխանության դեմ փողոցային պայքար մղեց հանրահավաքների տեսքով: Իշխանությունից դժգոհ զանգվածը թեեւ ԲՀԿ-ի հետ առնչվող զարգացումներում նոսրացավ, սակայն մի կայուն զանգված ինչ-որ բան փոխելու հույսով դեռ շարունակում է սպասել ՀԱԿ միտինգներին: Խորհրդարան մտնելուց հետո անգամ նույն արմատական ուժը խոստացավ շարունակել ռեժիմի դեմ պայքարը խորհրդարանի հարթակին զուգահեռ Ազատության հրապարակի հարթակում եւս, բայց արդեն վեց ամիս է անցել՝ չկան հանրահավաքներ: Առավել եւս, որ մի քանի ամսից էլ մեկնարկում են նախագահական ընտրությունները: Ի՞նչն է պատճառը, արդյո՞ք ասելիքի բացակայությունը, թե՞ ԱԺ խորհրդարանական ամբիոնն ամբողջությամբ բավական է ավազակապետության փլուզումն ապահովելու համար: Այս հարցերն ուղղեցինք վերջին օրերին իշխանական բուրգի առանցքային մարմիններից մեկի` գործադիրի դեմ գերակտիվ, գրեթե մենակ պայքարի դուրս եկած ՀԱԿ խմբակցության պատգամավոր, տնտեսագետ Հրանտ Բագրատյանին:
- Պարոն Բագրատյան, Հայ ազգային կոնգրեսը ժողովրդին վստահեցնում էր, որ խորհրդարան մտնելուց հետո էլ կշարունակի փողոցային պայքարը հանրահավաքների տեսքով: Բայց կարծես պայքարն ամբողջությամբ տեղափոխվել է ԱԺ հարթակ:
- ՀԱԿ-ի մասով հարցրեք համակարգողին, իսկ ես իմ մասով ամեն ամսվա 1-ին օրը հավաքում եմ ժողովրդին նույն Ազատության հրապարակում եւ լսում նրանց հուզող հարցերը: Բացի այդ, մշտապես հավաքվում ենք Սարյանի արձանի մոտ, ինչպես նաեւ հաճախակի ակցիաներ կազմակերպում։
- ԱԺ հարթակից սուր ու դիպուկ հարցադրումներ անելով, խնդիրները հնչեցնելով` ազդեցություն ունենո՞ւմ եք կառավարության գործողությունների վրա, առաջընթաց տեսնո՞ւմ եք:
- Ես տեսնում եմ, որ եթե մենք չլինեինք, տասն անգամ ավելի վատ էր լինելու, տնտեսական մասով մենք բացահայտում ենք ամեն ինչ: Ես էն տպավորությունն ունեմ, անհամեստ չհնչի, կարծես մի քանի հոգով ավելի շատ ենք անում, քան կառավարության հինգ հազար հոգանոց աշխատակազմը: Հիմա համեստ չի, որ ես դա ասեմ: Ահա, խնդրեմ, 51,7 տոկոս ստվերային տնտեսություն է, երբ որ Dooing business-ի միակ ցուցանիշը լավանում է, աշխարհով մեկ են լինում, բա էս ստվերի համար ո՞վ պետք է պատասխան տա…
- Կարծես այսօր քննադատության թիրախը միայն Տիգրան Սարգսյանն է, Ձեր կարծիքով, միայն նրան փոխելով` բարձրացված խնդիրները կլուծվե՞ն:
- Մենք քննադատում ենք իշխանությանը` Սերժ Սարգսյանով սկսած: Էդպիսի բան չկա: Ավելին, մի ժուռնալիստ էլ օրերս գրել էր` Դուք ԲՀԿ-ի պատվերն եք կատարում: Էդ էր պակաս. ԲՀԿ-ն երեք-չորս ամիս է կառավարությանն անդրադառնում, մենք տասը տարի է, երբ Տիգրան Սարգսյանը բանկում էր: Երեկ բերել ենք տվյալներ գործադիրի մասին՝ ՀՀԿ-ի ողջ իշխանության տարիների գործադիրի մասին: Մենք էսօր խոսում ենք, որ իշխանությունները մեզ ձեռ են առնում, խոսքը վերաբերում է եւ նախագահին, եւ Ազգային ժողովին, եւ Տիգրան Սարգսյանին, եւ նախարարներին. այդպիսի բյուջե չի լինում: Մենք ոչ մի հարցի պրոֆեսիոնալ պատասխան չենք տեսնում: Հաճախ պարզապես սուտ են ասում: Ֆինանսների նախարարը բյուջեի քննարկման օրը ստեց ու թողեց-գնաց: Ներողություն էլ մինչեւ հիմա չի խնդրել:
- Ի՞նչ եք անելու:
- ՀՀ կառավարության անդամը սուտ չպիտի ասի, եթե թիվը չգիտի, թող ասի, որ չգիտի, ոչ թե տեղում փորձի ֆռռացնել: Կարող է ֆռռացնել այս Ազգային ժողովում, թող ոչ մեկն ինձնից չնեղանա՝ ցանկացած մարդու, բացի Հրանտ Բագրատյանից` տնտեսական հարցերում:
- Պարոն Բագրատյան, ՀԱԿ-ի քաղաքական համախոհը համարվող ԲՀԿ-ի պայքարն այս կառավարության դեմ համընկնո՞ւմ է ՀԱԿ-ի մղած պայքարին: Նրանք կարծես կոնկրետ անձի` Տիգրան Սարգսյանի դեմ են պայքարում:
- Ոչ, մեզ համար կա իշխանափոխության խնդիր: Մենք գտնում ենք, որ դա էլ կա, բայց կա նաեւ իշխանափոխության խնդիր, ես այդպես եմ կարծում:
- Կարծիք կա, որ իշխանությունը ԲՀԿ-ին արհեստական ընդդիմություն դարձրեց` ՀԱԿ-ին ստվերելու համար, Ձեր գնահատմամբ, դա հաջողվե՞ց իշխանությանը:
- Հնարավոր է` այո, հնարավոր է` չէ, ես դժվարանում եմ ասել: Ես ուզում եմ Ձեզ ասել, որ ես ոչ իշխանական ուժի դեմ ոչ լավ, ոչ վատ չեմ խոսի: Հիմա եթե ես ասեմ` հա, կստացվի, որ ես խոսեցի ԲՀԿ-ի դեմ, եթե ասեմ` չէ, չստացվեց իշխանությանը, կստացվի` ես խոսում եմ ԲՀԿ-ին կողմ: Պետք է զգույշ լինել, չէ՞: Դրա համար այն ուժը, որն իշխանության մեջ չէ, չենք խոսում նրանից:
- Պարոն Բագրատյան, Ձեր կարծիքով, խորհրդարանական ուժ դառնալուց հետո ՀԱԿ-ը որքա՞ն համախոհներ կունենա 2013-ի նախագահական ընտրություններում:
- ՀԱԿ-ն այսօր ունի խնդիր, իմ կարծիքով: Միասնականության խնդիր: Գնալով խնդիրները կոնկրետանում են, եւ մենք տեսնում ենք կուսակցությունների մոտեցումների տարբերություններ: ՀԱԿ-ը ռեստարտ անելու խնդիր ունի…
Այն ժամանակ նպատակն էր Սերժ Սարգսյանին իշխանությունից հեռացնելը, հիմա մենք մտել ենք ավելի երկարատեւ պայքարի մեջ, մենք ունենում ենք կոնկրետ խնդիրներ եւ կոնկրետ խնդիրների շուրջ տեսնում ենք տասնապատիկ վերաբերմունքներ: ՀԱԿ-ը ռեստարտ անելու կարիք ունի, ղեկավարման ու համակարգման այս ձեւը թույլ չի տալիս ավելացնելու մեր հետեւորդներին, այլ՝ ընդհակառակը:
- Կարելի՞ է ասել` 2013-ի ընտրություններով դեռ չի հաջողվի այդ ռեստարտն իրականացնել:
- Ո՞վ ասաց, կարող է եւ ստացվի:
- Իսկ այն կուսակցությունները, որոնք դուրս եկան ՀԱԿ-ից, ինչպե՞ս կազդի ռեստարտի վրա:
- Չէ, դա արդեն իմ ասածի հետեւանքներն են, երբ որ սկսում են կոնկրետանալ խնդիրները, արդեն պարզվում է, որ տարբեր պատկերացումներ կան: Մենք պետք է հասկանանք` որն է խնդիրը, առաջնային է համարվում ավազակապետության քանդումը: Էդ դեպքում պետք է շատ զգույշ արտահայտվել հնարավոր համագործակցող կողմերի մասին: Պետք է մաղով անցկացնել բոլորը, անխտիր, որովհետեւ ազնվությունն ու բարոյականությունն այն հատկություններից են, որ որակական են` կարդինալ, բարոյական լինում են կամ չեն լինում, մի քիչ բարոյական չեն լինում, մինչդեռ կարելի է մի քիչ սիրուն լինել: Ահա սա ՀԱԿ-ն ինչ-որ տեղ ձեռքից բաց է թողել: Առաջ ավազակապետության պայքարի ներքո մեր համախոհները հարյուր հազարավորներ էին, հիմա դրանց մի մասը չկա: Երկրորդն էլ. մարդկանց մի զգալի մասը հարց է դնում` այդ թեզը մնո՞ւմ է, թե՞ չէ, որը չի կարող անընդհատ մնալ, պետք է նաեւ ձեւափոխել ըստ պահանջի:
- Պարոն Բագրատյան, ի՞նչ եք կարծում, միայն ՀԱԿ-ի իշխանության գալով` Ձեր բարձրացրած խնդիրներին լուծում տալ կհաջողվի՞:
- Ես իմ գործն եմ անում, չգիտեմ, ես տեսնում եմ, որ պետք է պայքարել այս ձեւի իշխանության ու կառավարության դեմ:
Կարծիքներ