Անգամ երգիչ չենք կարողանում ընտրել
hraparak
2 Ապրիլ 2013 | 06:25
0
Հարգելի խմբագրություն, հետեւելով «Հայաստանի ձայն» երաժշտական նախագծին, ես հասկացա, որ մենք ոչ մի ընտրություն չենք կարողանում մաքուր անել՝ անգամ երգիչների ընտրությունը կեղծում ենք: Այդ մրցույթի վերջին փուլում մենք՝ չորս ընկերներով, որոշեցինք մասնակցել քվեարկությանը: Երեքս SMS ուղարկեցինք Նարեկ Մակարյանին, մեկս՝ Գայանե Արզումանյանին: Գայանեին ուղարկած SMS-ին անմիջապես պատասխան ստացանք՝ շնորհակալություն քվեարկությանը մասնակցելու համար, ինչը նշանակում էր, որ այն տեղ է հասել, իսկ Նարեկին ուղարկած երեք SMS-ներից ոչ մեկին արձագանք չեկավ, քվեարկությունն էլ ավարտվելուց հետո մեկիս պատասխան եկավ, որ «քվեարկությունն արդեն ավարտվել է»՝ այսինքն, մեր ձայնը տեղ չի հասել: Մի բան պարզ էր, որ մրցույթի հենց առաջին փուլում ոմանք արդեն որոշել էին, որ Մերի Մնջոյանն է հաղթելու, եւ միայն դրանով էր բացատրվում ժյուրիի անդամ Սոնայի բացասական վերաբերմունքն Արտո Թունջբոյաջյանի եւ նրա գնահատականների նկատմամբ:
Իսկ Արտոն իսկական երաժիշտ է, նա ողնաշարով է զգում տաղանդներին եւ, որպես Արեւմուտքում կրթված ու դաստիարակված մարդ, տանել չի կարողանում կեղծիքը: Մենք էլ էինք առաջին փուլերում ոգեւորված Մաշայի երգով, բայց աչքներիս առաջ շատ կարճ ժամանակում նա վերածվեց Սոնայի անհաջող կրկնօրինակի: Ամեն ինչ արին այդ աղջկան ժամանակից շուտ մեծացնելու, արհեստական շուք տալու համար: Փչացնելու մեծ տաղանդ ունենք մենք, այս պարագայում՝ տաղանդը փչացնելու մեծ տաղանդ: Դրա համար էլ չքվեարկեցինք այդ աղջկա համար: Եվ մի բան էլ. համոզված եմ, որ Հայաստանի ձայնը պետք է հայերեն երգի, հայի համար երգի, հայ երգիչ լինի: Նարեկն արժանի էր այդ կոչմանը: Իսկ Մերիին, ինչպես լսեցինք, ռուսացած մեր երգչուհին՝ Սոնան, արդեն իսկ որոշել է տանել Մոսկվա ու դարձնել ռուսական պապսա երգող շարքային «աստղիկ»: Ափսոս:
Անի ՍՈՂՈՄՈՆՅԱՆ
Կարծիքներ