Պատգամավորներն ու պաշտոնյաները պատվավոր քաղաքացի չեն դառնա
Լոռու մարզկենտրոն Վանաձոր համայնքի ավագանու հերթական նիստի օրակարգային հարցերից մեկը վերաբերում էր «Վանաձորի պատվավոր քաղաքացի» կոչմանն ու դրա տրամադրման ընթացակարգին: Ավագանին վերանայեց պատվավոր քաղաքացու շնորհման կանոնակարգն ու այն անձանց շրջանակը, ում կարելի էր շնորհել այդ կոչումը: Նշենք, որ քաղաքի պատվավոր քաղաքացի կոչումը քննարկվում, սահմանվում եւ որոշվում է տվյալ քաղաքի ավագանու անդամների կողմից: Իսկ ավագանու անդամների վերջին ընտրություններից հետո ձեւավորված Վանաձորի նոր ավագանին հիմնականում երիտասարդներից է կազմված:
Սա նշանակում է, որ պատվավոր քաղաքացու մասին պատկերացումներն ամբողջությամբ փոխվել են, ու նոր սերնդի պատկերացումները բոլորովին այլ են: Շատ հաճախ այս կոչումը տրվում է մարդկանց, ում քաղաքացիների գերակշռող մասը չի էլ ճանաչում:
Ի վերջո, քննարկումներից հետո նոր կանոնակարգ սահմանվեց, համաձայն որի՝ Վանաձորի պատվավոր քաղաքացի այսուհետ չեն դառնալու Ազգային ժողովի պատգամավորներն ու գործող պետական պաշտոնյաները: Բացի այդ, այս կոչումը տրվելու է տարեկան ընդամենը մեկ անգամ եւ մեկ անձի, բացառիկ դեպքերում միայն այդ թիվը կարող է դառնալ 2: Վանաձորի պատվավոր քաղաքացիների ընդհանուր թիվը չի գերազանցելու 30-ը եւ տրվելու է անձին միայն կենդանության օրոք: Վանաձորն արդեն 20 պատվավոր քաղաքացի ունի:
Ըստ նախորդ կանոնակարգերի, որոնք, ի դեպ, փոփոխության են ենթարկվում արդեն չորրորդ անգամ, Վանաձորի բնակիչներին չէր տրվում այս կոչումը, իսկ նոր կանոնակարգի համաձայն՝ այդ սահմանափակումն այլեւս չի գործելու: Հավելենք նաեւ, որ, համաձայն տարածված խոսակցությունների, պատվավոր քաղաքացու կոչում շնորհելու պայմանները փոխվեցին Լոռու նախկին մարզպետ Հենրիկ Քոչինյանին այդ կոչումը շնորհելու համար միայն: Ի դեպ, այս հարցը եւս եղել է ավագանու հերթական նիստերից մեկի քննարկման առարկա: Հավելենք, որ Հենրիկ Քոչինյանն ու Վանաձորի քաղաքապետ Սամվել Դարբինյանը բավականին մտերիմ հարաբերություններ ունեն:
Վանաձորի պատվավոր քաղաքացի կոչումը շնորհվելու է փակ, գաղտնի քվեարկության արդյունքների հաստատումից հետո միայն, երբ ավագանու անդամների առնվազն 2/3-ը կողմ կքվեարկի այդ որոշմանը:
Շուշաննա ԳՐԻԳՈՐՅԱՆ
Լոռու մարզ
Կարծիքներ