«Հայ ժողովրդի ցեղասպանութունը. պատմություն, դասեր, իրականություն». շնորհանդես Մոսկվայում

Մարտի 11-ին ՌԴ-ում ՀՀ դեսպանության աջակցությամբ Մոսկվայի «Բիբլիո-գլոբուս» գրախանութում կայացել է Ռուսաստանի լրագրողների միության անդամ, գրող և պաշտոնաթող գնդապետ Ջոն Ակոպովի և Անվտանգության ու կոնֆլիկտաբանության եվրոպական ակադեմիայի նախագահ, իրավաբանական գիտությունների դոկտոր-պրոֆեսոր Իգոր Բոնդարենկոյի համահեղինակությամբ հրատարակված «Հայ ժողովրդի ցեղասպանութունը. պատմություն, դասեր, իրականություն» գրքի ռուսերեն և անգլերեն տարբերակների շնորհանդեսը:

Շնորհանդեսին մասնակցել են հասարակական-քաղաքական գործիչներ և մշակույթի ոլորտի ներկայացուցիչներ, Մոսկվայի հայ համայնքի ներկայացուցիչներ, դիվանագետներ, լրագրողներ, ուսանողներ:

Ներկաներին ուղղված իր խոսքում գրքի համահեղինակ Ջոն Ակոպովն անդրադարձել է հրատարակության պատմագիտական և քաղաքագիտական նշանակությանը՝ ընդգծելով, որ ներկայացված գիրքը հանդիսանում է երկու համահեղինակների երկարատև տարիների ուսումնասիրության արդյունքը: «Գրքում ընդգրկված են բազմաթիվ պատմական փաստեր, որոնք վկայում են 1915թ. Օսմանյան կայսրությունում հայերի նկատմամբ իրականացված ցեղասպանության մասին: Այս գրքի միջոցով ռուսաստանյան հասարակության լայն շերտերի ուշադրությանն են ներկայացվում բազմաթիվ արխիվային փաստաթղթեր, որոնք վերստին վկայում են այն մասին, որ հայերի նկատմամբ իրագործված զանգվածային խոշտանգումները եղել են նախապես ծրագրված Օսմանյան իշխանությունների կողմից և սոսկ հետապնդել հայերին ոչնչացնելու նպատակ», – նշել է Ջոն Ակոպովը:

Գրքի մյուս համահեղինակ Իգոր Բոնդարենկոյի խոսքով` նշյալ հրատարակությունը նպատակ ունի հակազդելու բոլոր այն կեղծ ու ստահոդ նյութերին և հրապարակումներին, որոնք միտված են թերի կամ աղավաղված տարբերակով ներկայացնելու 1915թ. դեպքերը: «Յուրաքանչյուր ոք, ով բացի այս գիրքն ու ծանոթանա ներկայացված լայնածավալ փաստագրական նյութերին, այլևս երբեք չի երկմտի, թե ինչ է տեղի ունեցել հայերի նկատմամբ 1915թ. Օսմանյան կայսրությունում», – համոզմունք է հայտնել Իգոր Բոնդորենկոն:

Շնորհանդեսին ելույթներով հանդես են եկել նաև «Ռուս-հայկական համագործակցություն» կազմակերպության ղեկավար, Հայոց ցեղասպանության 100-րդ տարելիցին նվիրված միջոցառումների համառուսաստանյան հանձնաժողովի քարտուղար Յուրի Նավոյանը, ՌԴ-ում ՀՀ դեսպանության խորհրդական Մարիա Բաբայանը, ՌԴ Դաշնային Խորհրդի նախագահին կից պետական մշակութային քաղաքականության խորհրդի անդամ, ՌԴ վաստակավոր իրավաբան Վալերի Նարինյանը, ՌԴ Պետական Դումայի փորձագետ Պավել Սուբբոտինը, Ռուսաստանյան Ազնվականների ժողովի փոխնախագահ Գեորգի Գրիշինը, ուրիշներ: