Միջազգային որոշ առաջատար լրատվամիջոցներ հերթական անգամ զոհ գնացին ադրբեջանական պաշտոնական կեղծիքին. Արծրուն Հովհաննիսյան
ՀՀ պաշտպանության նախարարի մամուլի խոսնակ Արծրուն Հովհաննիսյանը Tert.am–ի հետ զրույցում անդրադարձել է ս.թ. մարտի 19-ին ՊԲ հյուսիսային ուղղղությամբ հակառակորդի ձեռնարկած դիվերսիայի առնչությամբ միջազգային որոշ լրատվամիջոցներում տարածված ապատեղեկատվությանը։
«Ցավոք` միջազգային որոշ առաջատար լրատվամիջոցներ հերթական անգամ զոհ գնացին ադրբեջանական պաշտոնական կեղծիքին` ծուղակն ընկնելով ու տարածելով ապատեղակատվություն: Այս կապակցությամբ պաշտոնապես հայտնում ենք, որ հայկական կողմը, ինչպես միշտ, տվել է ամփոփ և սպառիչ տեղեկատվություն ինչպես մարտական իրավիճակի, այնպես էլ` դեպքի ու սեփական կորուստների վերաբերյալ»,- նշել է Ա. Հովհաննիսյանը::
Նրա խոսքով՝ Ժուռնալիստական էթիկան պահանջում է, որ տվյալ լրատվամիջոցները կողմերի կորուստների վերաբերյալ ճշտումներ անեին պաշտոնական աղբյուրներից, այլ ոչ թե կուրորեն կրկնեն ապատեղեկատվությամբ մշտապես աչքի ընկնող ադրբեջանական լրատվամիջոցներին:
«Այս կապակցությամբ հերթական անգամ ստիպված ենք ընդգծել, որ հայկական կողմը, ավանդաբար բարձր գնահատելով հայրենիքի համար ամեն պահի կյանքը վտանգի ենթարկող իր որդիներից յուրաքանչյուրին, ի տարբերություն «մարտական խնդիրները» քանակի հաշվին և կորուստները հաշվի չառնելու գնով լուծող մեր հարևանների, նրանցից ամեն մեկի կորստին արձագանքում է խորը վշտով ու ափսոսանքով և երբեք չի ուրանա նրանց անունն ու սխրագործությունը»,- ասել է մամլո խոսնակը:
Կարծիքներ