Սահմանադրության՝ թղթի վրա մնացած դրույթները
Հոդված 86. Պետության քաղաքականության հիմնական նպատակների մեջ թվարկվում է՝ սպառողների շահերի պաշտպանությունը, ապրանքների, ծառայությունների եւ աշխատանքների որակի նկատմամբ վերահսկողությունը, տարածքային համաչափ զարգացումը.
Իրականում - Սպառողի իրավունքների պաշտպանության բնագավառում գործող տասնյակ կազմակերպություններ կան. ո՞ր մեկն է գոհ այսօրվա վիճակից: Նրանք միաբերան փաստում են, որ աշխատանքը միակողմանի է, չեն կարողանում լեզու գտնել սպառողի շահերը ոտնահարողների հետ:
Ինչ վերաբերում է տարածքային համաչափ զարգացմանը, ապա փաստ է, որ ոչ միայն տարածքները համաչափ չեն զարգանում, այլեւ՝ Երեւանը, որտեղ ամեն ինչ կենտրոնացված է կենտրոնում:
Անվճար բարձրագույն եւ այլ մասնագիտական կրթության զարգացումը:
Իրականում - Ամեն տարի մեծանում է բուհերում վճարովի տեղերի թիվը՝ անվճարների հաշվին: Կան բաժիններ, որոնցում ընդհանրապես չկա պետպատվերով տեղ, ինչը հակասում է սահմանադրությանը:
Հոդված 94. Պատգամավորը ներկայացնում է ամբողջ ժողովրդին եւ կաշկանդված չէ որեւէ ցուցումով:
Իրականում - ԱԺ 131 պատգամավորից առնվազն 110-ն այլ բան կասեն:
Հոդված 95. Պատգամավորը չի կարող զբաղեցնել իր լիազորություններով չպայմանավորված որեւէ պաշտոն այլ պետական կամ տեղական ինքնակառավարման մարմիններում, պաշտոն առեւտրային կազմակերպություններում, կատարել այլ վճարովի աշխատանք, բացի գիտական, կրթական եւ ստեղծագործական աշխատանքից: Պատգամավորը չի կարող զբաղվել ձեռնարկատիրական գործունեությամբ:
Իրականում - Մեզանում ավելի հեշտ կլինի թվարկելն այն պատգամավորներին, ովքեր բիզնես չունեն: Հայաստանում մեկ անգամ կարելի է հիշել, երբ պատգամավորն զբաղվել է ձեռնարկատիրական գործունեությամբ եւ զրկվել մանդատից՝ ՀՀ վարչապետի եղբայրը: Պատճառն էլ այն էր, որ Հովիկ Աբրահամյանն այլեւս չէր ուզում նախարար լինել, այլ ուզում էր դառնալ ԱԺ նախագահ, եւ մեծամասնականով մանդատ էր պետք: Մնացած բոլոր դեպքերում պատգամավորներն շտապում են խորհրդարան՝ բիզնեսը կարգավորելու:
Հոդված 104. Ազգային ժողովի նախագահը ներկայացնում է Ազգային ժողովը եւ ապահովում նրա բնականոն գործունեությունը:
Իրականում - Կա՞ մարդ, որը մտածում է, թե Գալուստ Սահակյանն ապահովում է ԱԺ բնականոն գործունեությունը: Ազգային ժողովի՝ բարձրագույն օրենսդիր մարմնի հեղինակությունն այսքան ընկած չի եղել երբեւէ:
Հոդված 109. Օրենսդրական նախաձեռնության իրավունք ունեն պատգամավորը, Ազգային ժողովի խմբակցությունը եւ կառավարությունը:
Իրականում - 5-րդ գումարման ԱԺ 5-րդ նստաշրջանը ռեկորդներ է սահմանել նախաձեռնողականության պակասի ու «շըփ-թըփ» ռեժիմի առումով։
Մեկ նստաշրջանի ընթացքում ընդունված 143 օրենքներից միայն 7-ն է պատգամավորների հեղինակմամբ, 136-ը կառավարությանն է: Այսինքն՝ մեր օրենսդիրների գործը կառավարության ներկայացրած նախագծերը հաստատելն է:
Սեւակ ՀԱԿՈԲՅԱՆ
Շարունակելի
Կարծիքներ