Աքսյոնովը պիտի գա, բա ինչո՞ւ են Բակո Սահակյանին ընդունում
Երեկ ռուսական լրատվամիջոցները տեղեկություն են տարածվել, որ Հայաստան կժամանի Ղրիմի ղեկավար Սերգեյ Աքսյոնովը, ընդ որում՝ հաղորդվում է, որ այցը կլինի պաշտոնական: Ռուսաստանի նախագահին առընթեր Ղրիմի Հանրապետության մշտական ներկայացուցիչ Գեորգի Մուրադովը Ղրիմի կառավարության նիստում ասել է, որ Հայաստանում տեղի է ունենալու միջտարածաշրջանային համաժողով, որտեղ ներկայացված կլինի ղրիմյան մեծ ստենդ: «Մենք պայմանավորվել ենք, որ դուք մասնակցելու եք Հայաստանում կայանալիք համաժողովին: Սոչի ուղևորության ընթացքում դուք այցելելու եք Աբխազիա»,- ասել է Մուրադովը՝ դիմելով Աքսյոնովին։
Ռուսաստանին միացված Ղրիմի, միջազգային հանրության կողմից չճանաչված ղեկավար Աքսյոնովը, ինչպես հայտնի է, գտնվում է միջազգային սեւ ցուցակում, եւ նրա մուտքը ԱՄՆ կամ եվրոպական երկրներ արգելված է: Հետեւաբար՝ պաշտոնական այցով Աքսյոնովին հյուրընկալող Հայաստանը հերթական անգամ կարող է միջազգային դիվանագիտական սկանդալի թեմա դառնալ, վտանգի տակ դնել Հայաստանի միջազգային վարկը եւ այլ երկրների հետ միջպետական հարաբերությունների հեռանկարը: Պաշտոնական Երևանն առայժմ չի արձագանքել Աքսյոնովի Երևան կատարելիք այցի մասին տեղեկատվությանը:
Անցած տարի Հայաստանը ՄԱԿ-ի Գլխավոր վեհաժողովում ի հեճուկս մեծամասնության դեմ քվեարկեց Ուկրաինայի ներկայացրած բանաձևին, որով անօրինական է ճանաչվում Ղրիմում անցկացված անցած տարվա մարտի 16-ի հանրաքվեն: Բանաձեւին կողմ էր քվեարկել 100 երկիր, ձեռնպահ՝ 58-ը, դեմ՝ 11-ը, որոնց թվում՝ Հայաստանը:
ԱԺ արտաքին հարաբերությունների մշտական հանձնաժողովի անդամ, ՀՀԿ-ական Համլետ Հարությունյանը ոչ մի խնդիր չի տեսնում Աքսյոնովի այցի հետ կապված.«Բա ինչո՞ւ են Բակո Սահակյանին ընդունում», հարցով հակադարձեց Համլետ Հարությունյանը.«Չճանաչված հանրապետության նախագահ է չէ՞ Բակո Սահակյանը, այո, շատ ճիշտ կանենք, որ Աքսյոնովին ընդունենք, որովհետեւ մենք ունենք նման պրոբլեմ», պնդում է Համլետ Հարությունյանը՝ չհամաձայնելով Արցախի ու Ղրիմի կարգավիճակների տարբերության մասին մեր պնդումներին.«Ի՞նչն ենք բռնակցել, դե հիմի ամեն մեկը մի ձեւով վերցրել է»: Այլ երկրների հետ միջպետական հարաբերություններ փչացնելու եւ դիվանագիտական սկանդալի հեռանկարի առիթով էլ Հարությունյանն ասաց.«Ինչի՞, որ ամեն օր Ադրբեջանը սպանում է խաղաղ բնակիչներին, զինվորներին, դա սկանդալ չի, բայց որ Հայաստանը ընդունում է չճանաչված պետության ղեկավարին, դա սկանդա՞լ է»:
«ՀՀԿ-ականները որ հարցերում են խնդիր տեսնում, որ մի հատ էլ այս հարցում տեսնեն», չզարմացավ քաղաքական վերլուծաբան Ստյոպա Սաֆարյանը: Իրականում Սաֆարյանի գնահատմամբ՝ Ռուսաստանը նման «սիմվոլիկ դեմոնստրատիվ քայլերով» ուզում է ցույց տալ, որ Հայաստանը ճանաչել է Ղրիմը. «Ռուսաստանը էլ ավելի է փորձում կոնսոլիդացնել Ղրիմի հետ կապված դիրքորոշումները: Ղրիմի հարցով Հայաստանի դիրքորոշումը ըստ էության չի դրսեւորվել, դրա մասին քիչ է խոսվում, թերեւս այդ խնդրի մասին լռություն պահպանելով Արեւմուտքը փորձում է ցույց տալ, որ այդ ամենը պարտադրված է եղել Մոսկվայի կողմից, բայց անցած տարի Հայաստանում դիվանագիտական կորպուսները գնահատականներ հայտնեցին եւ կարծում եմ, որ դրանք դեռ ուժի մեջ են»:
Հիշեցնենք, որ այս տարվա մայիսին Հայաստանը նմանատիպ սկանդալի մեջ հայտնվեց, հայ-վրացական հարաբերությունները խզվելու եզրին հայտնվեցին Գալուստ Սահակյանի՝ Հարավային Օսեթիայի չճանաչված հանրապետության խորհրդարանի խոսնակի հետ պաշտոնական հանդիպման պատճառով:
Կարծիքներ