Դա կապ չունի աղետի գոտուն ընդհանրապես. նախարարը՝ բնակարանի կարիք ունեցողների մասին
![Դա կապ չունի աղետի գոտուն ընդհանրապես. նախարարը՝ բնակարանի կարիք ունեցողների մասին](https://hraparak.am/uploads/images/d34fffc9408b64ab7fd13b0020e0ddee.jpg)
Քաղաքաշինության նախարար Նարեկ Սարգսյանը, ամփոփելով անցնող տարին, թվարկում էր այն համալիրները, որոնք ավարտին են հասցվել և հանձնվել շահագործման, մեծամասամբ նախարարը մատնանշում էր հյուրանոցների անուններ, իսկ երբ հերթը հասավ աղետի գոտուն, ապա գործերն ավարտին կհասցվեն միայն 2016-ին. «Ոչ միայն Գյումրիում և աղետի գոտում կան բնակարանի կարիք ունեցող մարդիկ: Սոցիալական ապահովության նախարարությունն ունի այդ ամբողջ տվյալները, այսինքն՝ դա կապ չունի աղետի գոտուն ընդհանրապես: Հայաստանի բոլոր մարզերում էլ վթարային շենքեր կան և Եղեգնաձորում, և Ապարանում, և Սիսիանում, և Երևանում, և Գյումրիում, միայն 4-րդ, 3-րդ վթարային կարգի շենքեր կան շուրջ 100 հատ և Վանաձորում, և Գյումրիում: Այսինքն՝ այդ խնդիրն ամբողջ Հայաստանի խնդիրն է, այս տեսակետով նախարարությունն իրապես խորն ուսումնասիրություններ է արել: Անձամբ ես 30-ից ավել նոր տեխնոլոգիաներ առաջարկող ընկերությունների հետ եմ հանդիպել, մեր ծառայությունները լրջորեն քննարկել են: Խնդիրն ինչում է, որպեսզի մենք գտնենք նոր տեխնոլոգիաներ, որ կարողանանք արագ կառուցել և ավելի մատչելի գներով: Այսօր մոտավորապես այդ տիպի բնակարանի 1 քառակուսի մետրն արժենում է մոտավորապես 250 հազար դրամ: Առաջարկներ կան, հիմա գործարան է կառուցվում, որը մեզ առաջարկելու է 40 տոկոս ավելի էժան գներով»:
Ըստ պաշտոնական տեղեկատվության՝ աղետի գոտում շահառու ճանաչված 5363 ընտանիքից 4398 ընտանիքի բնակարանային խնդիրները լուծվել են: Երևանում էլ առկա կիսակառույց շենքերի խնդիրները նույնպես թողել են հաջորդ տարվան, իսկ թե կոնկրետ որքան կարժենա այդ շենքերին ավարտուն տեսք տալու գործընթացը, Նարեկ Սարգսյանը դեռ չգիտի. «Ավարտվել է մեր կողմից այդ շենքերի տեխնիկական եզրակացությունները, և 2016 թվականի հենց սկզբից նախարարության գերակա խնդիրների մեջ է գտնվում՝ մշակել և առաջարկություններ ներկայացնել այդ շենքերի հետագա վերակառուցման և շահագործման վերաբերյալ: Կոնկրետ ինչ արդյունք կունենա և որքան կարժենա, կարող եմ ասել մի քանի ամիս հետո: Դա մենք դիտարկում ենք որպես լուրջ ռեզերվ, դրանք վերակառուցելով, կարծում եմ, մենք լուրջ խնդիրներ կարող ենք լուծել և սոցիալական ենթակառուցվածքների, և վթարային շենքերի բնակիչների համար»:
Բուզանդ-Տերյան խաչմերուկում գտնվող շենքը, որի համար բազմաթիվ մարդիկ երկար ժամանակ պայքարում էին, արդեն վեր է խոյանում, սակայն ավելի բարձրահարկ է, քան պետք է լիներ. «Ցավոք սրտի, որպեսզի տեղավորվի բոլոր խնդիրները և ի վերջո այդ շենքը կառուցվի, կառավարությունը համապատասխան որոշում է կայացրել, դրա հիման վրա քաղաքապետարանը տվել է թույլտվություն: Դա միանշանակ ոչ վարչապետի, ոչ էլ իր ընտանիքի անդամների հետ կապված չէր»:
Կարծիքներ