Մարդիկ անձերին են ընտրելու, ոչ թե կուսակցություններին

Նոր Ընտրական օրենսգրքի նախագծով, բացի Երեւանից, նաեւ Գյումրիի եւ Վանաձորի ավագանու ընտրություններում այլեւս անհատներ չեն կարողանալու մասնակցել: Այսուհետ, ինչպես Երեւանում, այնպես էլ այդ քաղաքներում ընտրությունները լինելու են համամասնական ընտրակարգով, իսկ քաղաքապետերը կընտրվեն ավագանու ցանկից: Այսինքն՝ բոլոր անկուսակցական անհատները պետք է կամ անդամագրվեն որեւէ կուսակցության, կամ մտնեն որեւէ կուսակցության համամասնական ցուցակ, եթե ուզում են քաղաքապետ դառնալ: Արդեն մի քանի ամիս է՝ տեղեկություններ են շրջանառվում, որ սեպտեմբերին ընտրվելիք Գյումրիի քաղաքապետի պաշտոնին հավակնում է նաեւ անկուսակցական, ԲՀԿ խմբակցության պատգամավոր Մարտուն Գրիգորյանը:

Փետրվարյան հայտնի իրադարձություններից հետո Գագիկ Ծառուկյանի քայլին հետեւեց նաեւ Մարտուն Գրիգորյանը՝ լքելով ԲՀԿ-ն: Չնայած օրեր առաջ մամուլում տեղեկություններ հայտնվեցին, թե ՀՀԿ-ն որոշում է կայացրել ոչ Սամվել Բալասանյանին եւ ոչ էլ Մարտուն Գրիգորյանին չընդգրկել իր ցուցակում, այլ ընտրությունների գնալ սեփական ցուցակով եւ այլ քաղաքապետացուով, որը գյումրեցի է լինելու, սակայն վերջին օրերին խոսվում է նաեւ, որ գործող քաղաքապետ Սամվել Բալասանյանն իր հարցերը «լուծել» է, եւ հենց նա է առաջադրվելու ՀՀԿ ցուցակով։ Ի՞նչ պլաններ ունի Մարտուն Գրիգորյանը, շարունակո՞ւմ է հավակնել այդ պաշտոնին, եթե այո՝ ո՞ր կուսակցության հետ։

- Պարոն Գրիգորյան, հնարավո՞ր է, որ այլեւս փոշմանել եք, չեք մասնակցելու ընտրական գործընթացներին, որովհետեւ քիչ ժամանակ է մնացել, բայց Դուք դեռեւս չեք կողմնորոշվել։

- Իհարկե ոչ, դուրս չենք մնալու, պետք է ուսումնասիրենք նախ այդ օրենքը, պետք է կողմնորոշվենք ու որոշում կայացնենք։

- Իսկ հակված եք նորի՞ց կուսակցական դառնալ, թե՞ ընդգրկվել որեւէ ուժի ցուցակում։

- Կուսակցության անդամակցելու մասին դեռեւս ոչինչ չեմ կարող ասել, բայց քանի որ օրենքը կա, ու այլեւս անհատապես հնարավոր չէ որեւէ ընտրության մասնակցել, օրենքը պարտադրում է համամասնական ցուցակ ընդգրկվել, դա է ուսումնասիրվելու։

- Շարունակո՞ւմ եք հավակնել Գյումրու քաղաքապետի պաշտոնին ու ո՞ր ուժի հետ եք գնալու։

- Մենք դեռ պետք է Ընտրական օրենսգրքի նախագիծն ուսումնասիրենք, հասկանանք, որովհետեւ սա մեզ համար նոր ընտրակարգ է, ու նաեւ պետք է նայենք, հասկանանք կոնկրետ քաղաքապետի ընտրություններին մասնակցելու ցանկություն ունեցող կուսակցություններին, սա այդ թիմերի համար մտածելու առիթ է, ուսումնասիրելու-հասկանալու, քանի որ գյումրեցիները մինչ այս ընտրություն են կատարել անձով պայմանավորված, այսօր պետք է հասկանանք նաեւ ընդհանուր ժողովրդի տրամադրությունները։ Ինչ վերաբերում է իմ առաջադրվել-չառաջադրվելուն, քանի որ հիմա պրոցեսն ավելի քաղաքական է, ու կուսակցական խնդիրներ են առաջ գալիս, պետք է ուսումնասիրել ու հասկանալ խնդիրը, նոր որոշում կայացնել։

- Ի՞նչ կարծիքի եք նոր ընտրակարգի վերաբերյալ, համաձայն որի՝ Գյումրիում այսուհետ ուղիղ ընտրություններ չեն լինի, եւ կուսակցություններից ընտրված ավագանին կընտրի քաղաքապետին։

- Մեծ հաշվով՝ անձերի ընտրություն է լինելու, մանավանդ փոքր քաղաքներում, այսինքն՝ մարդիկ անձերին են ընտրելու, ցուցակների առաջին համարներին։

- Բայց, հաշվի առնելով, որ Շիրակում եւ հատկապես Գյումրիում ոչ իշխանական տրամադրություններ են գերիշխում, ինչը փաստվում է բոլոր ընտրություններին, հնարավո՞ր է որեւէ ընդդիմադիր կուսակցության ցուցակ մտնեք։ Մանավանդ որ նոր կուսակցություն է կարծես Գյումրիում ստեղծվում։

- Չեմ կարող չափել, թե կոնկրետ որ տրամադրություններն են գերակշռում իմ դեպքում։ Բայց ժողովուրդն ինձ ձայն է տվել եւ իմ պատգամավորական աշխատանքը տեսել է, ու 2012-ին էլ տեսաք, թե ինչ մրցապայքարում ինձ ձայն տվեցին, իսկ կոնկրետ ընդդիմադիր, թե իշխանական կուսակցությունների մասով պետք է դեռ իրավիճակ հասկանանք։

- Օրինակ, հնարավո՞ր է նորից ԲՀԿ վերադառնաք։

- Էլի եմ ասում, ժամանակ ունենք մտածելու։

- Ամեն դեպքում չեք բացառում, որ հանուն պաշտոնի կամ մանդատի վերադառնաք մի տեղ, որտեղից ընդամենը ամիսներ առաջ եք դուրս եկել։

- Ուրեմն էլի եմ ասում, քաղաքապետի ընտրությունների հետ կապված կոնկրետ որոշում չկա, իսկ ԱԺ ընտրությունների հետ կապված՝ դեռ ժամանակ կա։

- Ձեր անձնական տեսակետն եմ հարցնում, ոչ թիմի։ Օրինակ՝ տեսնո՞ւմ եք բազում կուսակցություններ, որոնց հետ կուզենայիք ճանապարհ անցնել, թե՞ որոշումը Ձեզնից կախված չէ։

- Հասկանալի է, բայց որոշում չկա։

- Շիրակի մարզը վստահել են ՀՅԴ-ին, մարզպետ է նշանակվել դաշնակցական Հովսեփ Սիմոնյանը, քննարկո՞ւմ եք, օրինակ, այդ կուսակցության ցուցակով գնալու հարցը, թե՞ ավելի հակված եք ՀՀԿ-ի տարբերակին եւ սպասում եք առաջարկի։

- Եթե ես հիմա ասեմ՝ էս մեկին համակրում եմ, էն մեկին համակրում եմ, նյութի վերնագիրը դառնալու է «Մարտուն Գրիգորյանը, հավանաբար, մասնակցելու է այսինչ կուսակցությունով»։ Բայց եթե քաղաքականության մեջ մնալու ենք, հաստատ մի տեղ լինելու ենք, թե որտեղ, օրը կմոտենա, հստակ կորոշենք։

- Իսկ ինչո՞ւ պիտի որեւէ կուսակցություն, օրինակ՝ ՀՀԿ-ն, Ձեզ ընդգրկի իր ցուցակի առաջին հորիզոնականում՝ ցույց տալով, որ ինքը համապատասխան ռեսուրս չունի եւ անկուսակցականի է տանում։

- Ես այդ հարցին չեմ պատասխանի, եւ, այո, այնպես էլ չէ, որ որոշեցինք այսինչ կուսակցությունով, այդ կուսակցությունով էլ պիտի մասնակցենք, նաեւ պետք է քննարկենք տվյալ կուսակցության հետ, հրավեր ստանաս կամ առաջարկ անես։

- Դուք պատրա՞ստ եք կուսակցական դառնալ հանուն...

- Էլի եմ ասում՝ գլխավորը ոչ թե կուսակցական դառնալն է, այլ ցուցակում ընդգրկվելը։ Բայց պետք է նայել, թե տվյալ կուսակցությունն ինչ պահանջներ ու պայմաններ ունի։ Իհարկե, ավելի նախընտրելի է ոչ կուսակցականի կարգավիճակը։