Կցանկանայի հաջորդ ընտրություններում դրսից ուժեր չխառնվեին. Տիգրան Հարությունյան
Թալինում երեկ տեղի ունեցած քաղաքապետի ընտրություններում ՀՅԴ կուսակցության կողմից առաջադրված Տիգրան Հարությունյանը հավաքել էր 1036 ձայն և պարտվել գործող քաղաքապետ Սարգիս Արամյանին, ում օգտին քվեարկել էին 1993 թալինցիներ: Ինչևէ, Տիգրան Հարությունյանն արդեն հասցրել է շնորհավորել իր մրցակցին:
Hraparak.am-ը հետաքրքրվեց Տիգրան Հարությունյանից, թե ինչպե՞ս է գնահատում ընտրությունները, իրենց շտաբն ընտրակեղծիքներ գրանցե՞լ է. «Արձանագրություններ կազմվել են, որ խոշոր չափի ընտրակեղծիքներ չեն արձանագրվել: Ես փաստեր չունեմ ինչ-որ փող բաժանելու, ճնշումներն էլ չեմ կարող ասել: Ուղղակի կարող եմ ասել, որ կցանկանայի հաջորդ ընտրություններում դրսից ուժեր չխառնվեն, թողնեն մեր բնակչությունն ինքը որոշի ով կկանգնի, ում կուզենա տեսնել որպես քաղաքապետ: Իսկ դրսի ուժերը, երբ խառնվում են, ես կցանկանայի, որ դրանից հետո գոնե մի անգամ տարվա մեջ ամեն մեկն իր փոքր լուման ներդներ քաղաքի զարգացման հարցում: Ընդամենը սա».- նշեց Տիգրան Հարությունյանը, ով նկատի ուներ վարչապետ Հովիկ Աբրահամյանի և Երևանի քաղաքապետ Տարոն Մարգարյանի այցը Թալին:«Մեծ թվով մարդկանց հետ են եղել, որոնք ընդհանրապես երևի առաջին ու վերջին անգամ են եղել Թալինում և հարց է կլինե՞ն, թե՞ ոչ»:
Երեկ մի շարք համայնքներում տեղի ունեցած ընտրությունների արդյունքում հիմնականում ընտրվեցին նույն ղեկավարներըը, մեր հասարակությունը փոփոխություններ չի՞ սիրում. «Այդ հարցը երևի մարդկանց տաք: Գործող քաղաքապետի հետ միշտ էլ դժվար է պայքարել, որովհետև հասկանալի պատճառներով քաղաքապետարանի աշխատողներ և այլն և այլն, բնականաբար մարդիկ կցանկանան նորից նույն կազմով աշխատել, դա արդեն ինքնին ռեսուրս է ներկայացնում: Սիրել, չսիրելու պարագան չեմ կարող ասել, ուղղակի երևի թե ավելի շատ բարեկամ-ընկեր մի տեղ աշխատում են, ավելի շատ կարծես դրանով են առաջնորդվում: Ոչ թե հակված են քաղաքում դրական փոփոխություններ լինեն, այլ հակված են, որ իրենց բարեկամը, կամ ընկերը մնա, շարունակի աշխատելը, անկախ նրանից իրենք ինչ կունենան դրանից, կամ չեն ունենա»: Տիգրան Հարությունյանի խոսքերով պարտությունն ինքը ծանր չի տարել. «Ես ընդհանրապես ծանր չեմ տարել, ընտրողներին շատ մեծ շնորհակալություն եմ հայտնում, ով որ վստահել է ինձ, իր քվեն տվել է ինձ: Հուսանք, որ գործող քաղաքապետն ավելի արդյունավետ կփորձի աշխատել և դրական տեղաշարժեր կնկատենք»:
Հիշեցնենք նաև, որ ընտրություններին մասնակցում էր ՕԵԿ-ից «Հայկական վերածնունդ» վերակազմավորված կուսակցության ներկայացուցիչ գուրգեն Գրիգորյանը, ով հավաքել էր 168 ձայն: Տեղեկացնենք, որ ՀՅԴ-ի թեկնածու Տիգրան Հարությունյանը Արծվիկ Մինասյանի բաջանաղն է
Լուսանկարը՝ yerkir.am-ի:
Սիրան Հունանյան
Կարծիքներ