Զոհված զինծառայողի շրթունքը պատռված է, քիթը՝ քերծված, իսկ մարմնի վրա կապտուկներ կան

Հարավարեւելյան ուղղությամբ տեղակայված զորամասերից մեկում՝ Մարտունիում զոհված զինծառայող Հրանտ Գրիգորյանի մահվան պատճառը հայտնի չէ, նրա մարմինը դեռեւս դիահերձարանում է: Այս մասին Hraparak.am-ի հետ զրույցում ասաց Մրգավանի գյուղապետ Արմեն Հարությունյանը: Զինծառայողի ազգականներից մեկն էլ՝ Զարզանդ Ավագյանը հայտնեց, որ զինվորի հայրը տեսել է զոհված որդու մարմինը ու ասել, որ մարմնի վրա տարբեր հետքեր կային, մասնավորապես՝ կապտուկներ ոտքերի եւ թեւերի վրա, քիթը քերծված էր, շրթունքը պատռված, կրակած՝ բերանի մեջ: Նրա պատմելով՝ զորավարժությունների գնալու ճանապարհին Գրիգորյանն իրեն վատ է զգացել, եւ դեռեւս անհայտ հանգամանքներում տեղի է ունեցել մահը: «Ինքնասպանությունը ընդամենը վարկած է»,-ասաց Զարզանդ Ավագյանը:

Նա նշեց, որ զինծառայողի ընտանիքը երկար տարիներ է՝ վարձով բնակվում է Արարատի մարզկենտրոն Արտաշատ քաղաքում, բայց զինծառայողը ծնունդով Մրգավան գյուղից է: Նա ընտանիքի միակ արու զավակն էր, ուներ իրենից մեծ քույր: «Խելացի երեխա էր, ավարտել էր Արտաշատի ուսումնարանի ատամատեխնիկական բաժինը, մտադիր էր ուսումը շարունակել, դառնալ ատամնաբույժ: Ամսի 20-ին պիտի լրանար 11 ամիսը, ինչ ծառայում էր»,-ասաց զինծառայողի ազգականը՝ տատիկի եղբորորդին: Հ. Գրիգորյանի մայրը՝  Լիանուշը, մասնագիտությամբ ուսուցչուհի է, սակայն կրճատվել է ու այժմ չի աշխատում: Իսկ հայրը՝ Գարուշ Գրիգորյանը, Ռուսաստանում արտագնա աշխատանքի էր մեկնել եւ որդու մահվան հետ կապված վերադարձել է Հայաստան: Զինծառայողի հոգեհանգիստը տեղի կունենա վաղը՝ Մրգավանի Սուրբ Հակոբ եկեղեցում, այս մասին մեզ փոխանցեց Մրգավանի գյուղապետը:

Հիշեցնենք, որ ԼՂՀ ՊԲ հաղորդագրության համաձայն՝ Հ. Գրիգորյանը մահացել է մարզումների անցկացման վայրում, դեռեւս չպարզված հանգամանքներում: Նա մահացու հրազենային գնդակային վիրավորում է ստացել: Դեպքը տեղի է ունեցել հունիսի 17-ին` ժամը 10:45-ի սահմանում: Ըստ Քննչական կոմիտեի հաղորդագրության՝ «նախնական տվյալներով՝ զինծառայող Հ.Գրիգորյանին ամրակցված ինքնաձիգից կրակոց է արձակվել բերանի շրջանում, որի հետևանքով ստացած մարմնական վնասվածքից նա տեղում մահացել է: Երկրորդ կայազորային քննչական բաժնում, ինքնասպանության հասցնելու դեպքի առթիվ, հարուցվել է քրեական գործ: Կատարվում է նախաքննություն, ձեռնարկվում են անհրաժեշտ քննչական գործողություններ՝ դեպքի բազմակողմանի, լրիվ և օբյեկտիվ հետազոտումն ապահովելու ուղղությամբ»։