Կարծում եմ, որ ես կվերադառնամ առողջապահության համակարգ. Լարիսա Մադոյան
Վարչապետ Նիկոլ Փաշինյանի որոշմամբ Լարիսա Մադոյանն ազատվել է Կոտայքի փոխմարզպետի պաշտոնից: Նա պաշտոնը զբաղեցնում էր 2018 թվականի հուլիսից:
Մադոյանը ԲՀԿ անդամ է, նախքան փոխմարզպետի պաշտոնին նշանակվելը, եղել է «Աբովյանի ծննդատուն» ՊՓԲԸ տնօրենը։ ԱԺ-ի նախորդ ընտրություններում ԲՀԿ-ի կողմից առաջադրվել էր ռեյտինգային ցուցակով։
Փոխմարզպետի պաշտոնը քաղաքական-հայեցողական պաշտոն է։ Թավշյա հեղափոխությունից հետո ԲՀԿ-ի և ՔՊ-ի միջև համաձայնության կառավարություն ձևավորվեց, այդ ժամանակ պայմանավորվածություն եղավ, որ որոշակի տեղերում պետք է ԲՀԿ ներկայացուցիչ լինի, այդ թվում՝ Կոտայքի մարզպետարանում փոխմարզպետներից մեկը պետք է ԲՀԿ-ից լիներ։
Մեր տեղեկությաններով՝ Մադոյանը աշխատանքից ազատվել է քաղաքական որոշման արդյունքում, նա իշխող կուսակցության թիմից չէ, եւ ԲՀԿ քվոտայով պաշտոնյայի առկայությունը Կոտայքի մարզպետարանում այդքան էլ նպատակահարմար չի եղել:
Լարիսա Մադոյանին հարցրինք՝ աշխատանքից ազատվել է քաղաքական որոշման արդյո՞ւնքում. «Վարչապետի որոշման մեջ գրված է, թե օրենքի ո՞ր հոդվածով եմ ազատվել աշխատանքից: Այդ որոշման մեջ չկա, որ քաղաքական որոշում է դա»,-ասաց Մադոյանը: Թե հետագայում ի՞նչ գործունեություն կծավալի, Մադոյանն ասաց. «Դեռ չեմ որոշել, կարծում եմ, որ ես կվերադառնամ առողջապահության համակարգ»:
Կարծիքներ