«Ռեստարտ» նախաձեռնության անդամները դատարանում արդարացվել են

Երեւանի ընդհանուր իրավասության դատարանի Ավան եւ Նոր Նորք նստավայրում՝ դատավոր Դավիթ Հարությունյանի նախագահությամբ, քիչ առաջ ավարտվեց «Ռեստարտ» նախաձեռնության անդամների եւ Նարեկ Մալյանի գործով դատական նիստը: Մալյանի պաշտպան Տիգրան Աթանեսյանը մեզ հետ զրույցում նշեց, որ դատարանն արդարացրել է «Ռեստարտ» նախաձեռնության անդամներին, սակայն միանշանակ վճիռը բողոքարկվելու է:

«Դատավճիռը դեռևս չեմ ընթերցել, սակայն միանշանակ բողոքարկելու ենք: Հարցն իրավական տիրույթում է: Դատարանը տեսնում է 119-րդ հոդվածի երկրորդ մաս` խոշտանգման հանցակազմ»:

Հիշեցնենք, որ դեպքը տեղի էր ունեցել 2020 թվականի մարտի լույս 4-ի գիշերը։ Նարեկ Մալյանը ֆեյսբուքյան իր էջում գրել էր, որ «Ռեստարտ» նախաձեռնության անդամների կողմից ենթարկվել է հարձակման: Միջադեպից հետո ֆեյսբուքյան ուղիղ եթերում դեպքին անդրադարձել էին նաեւ «Ռեստարտ»-ի անդամները։

Մասնավորապես Դավիթ Պետրոսյանը պատմել էր, որ ի պատասխան Մալյանի՝ իրենց հասցեին հնչեցրած վիրավորանքների՝ փորձել են նրան գցել աղբամանը, ապա տարածել են նաեւ միջադեպի վերաբերյալ տեսագրությունը։ Նույն օրը դեպքի առթիվ հարուցվել էր քրեական գործ ՀՀ ՔՕ-ի 258-րդ հոդվածի 3-րդ մասի 1-ին կետով (մի խումբ անձանց կամ կազմակերպված խմբի կողմից խուլիգանությունը): Օրեր անց երիտասարդներին մեղադրանք էր առաջադրվել ՀՀ ՔՕ-ի 34-131-րդ հոդվածի 2-րդ մասի 1-ին կետով (մի խումբ անձանց կողմից նախնական համաձայնությամբ առեւանգման փորձը): Հարուցված քրեական գործի շրջանակում Նարեկ Մալյանը ճանաչվել է տուժող: Գործով ամբաստանյալի կարգավիճակում են Դավիթ Պետրոսյանը, Գարիկ Միսկարյանը, Յուրի Ավագյանը, Դավիթ Սիմոնյանը, Հրաչյա Խլղաթյանը, Արամայիս Պետրոսյանը: