Առուշ Առուշանյանը ազատ կարձակվի՞. դատարանն հեռացավ որոշում կայացնելու

Վերաքննիչ քրեական դատարանը քիչ առաջ հեռացավ խորհրդակցական սենյակ՝ Գորիսի համայնքապետ Առուշ Առուշանյանի խափանման միջոցի վերաբերյալ որոշում կայացնելու։ Դատարանի որոշումը կհրապարակվի օգոստոսի 5-ին՝ ժամը 12։30-ին։
 
Հիշեցնենք՝ պաշտպանական կողմը դիմել էր դատարան՝ կալանավորումը որպես խափանման միջոց ընտրելու որոշման դեմ բողոք ներկայացնելով։ Բողոքը մակագրվել էր դատավոր Մնացական Հարությունյանին։
 
Առուշանյանին կալանավորելու որոշման դեմ բողոքը դատարանը քննել է առանց պաշտպանների։ Էրիկ Ալեքսանյանը դատարանին ինքնաբացարկ հայտնելու մասին միջնորդություն էր ներկայացրել՝ մտահոգություն հայտնելով բողոքի մակագրման գործընթացի վերաբերյալ։ Դատավոր Հարությունյանը՝ մերժել էր, ինչից հետո պաշտպանական կողմը բոյկոտել էր քննությունը և դուրս եկել նիստերիդահլիճից։

Հիշեցնենք, որ Գորիսի համայնքապետին մեղադրանք է առաջադրվել ՀՀ ՔՕ 35-154.2-րդ հոդվածի 4-րդ մասի 2-րդ կետով, 38-149-րդ հոդվածի 2-րդ մասի 4-րդ կետով եւ 38-154.2-րդ հոդվածի 3-րդ մասով:

Ըստ ՀՔԾ հաղորդագրության՝ Սյունիքի մարզի Գորիս համայնքի ղեկավար, «Հայաստան» դաշինքի ընտրական ցուցակի 32-րդ համարը զբաղեցնող Ա.Ա.-ն, հիշյալ դաշինքի օգտին առավելագույն քվեներ ապահովելու եւ ընտրություններում ցանկալի արդյունք արձանագրելու անձնական եւ խմբային շահերից ելնելով` նախապատրաստել է ծանր հանցագործություն, այն է` երկու եւ ավելի ընտրողի կաշառք տալը: