Սևան Քոչարյանը հիվանդ է. նա կրկին նիստին չէր ներկայացել
Երևան քաղաքի ընդհանուր իրավասության դատարանի Ավանի նստավայրում՝ դատավոր Վահե Միսակյանի նախագահությամբ, այսօր կրկին հետաձգվեց Սերժ Սարգսյանի գործով հերթական նիստը:
Երրորդ նախագահ Սերժ Սարգսյանի եւ մյուսների գործով առանցքային վկա Սեւան Քոչարյանը, ինչպես նախորդ նիստին, այսօր եւս չէր ներկայացել դատական նիստին:
Դատավորն ընթերցեց Կոտայքի մարզային ոստիկանության աշխատակիցների կազմած արձանագրությունն առ այն, որ նրան բերման ենթարկելու վերաբերյալ որոշումը կատարելու համար այցելել են Սևան Քոչարյանի բնակարան, ով ոստիկաններին տեղեկացրել է, որ հիվանդ է քովիդով, դատարանին էր ներկայացրել քովիդ դրական թեստի արդյունքը:
Դատավորը հայտարարեց, որ կրկին կդիմեն ոստիկանություն՝ վկա Սևան Քոչարյանին հաջորդ նիստին բերման ենթարկելու համար: Մյուս վկան դատարանին տեղեկացրել էր, որ անձնական պատճառներով բացակայում է երկրից և չի կարող ներկա գտնվել նիստին:
Հիշեցնենք` Սերժ Սարգսյանը մեղադրվում է մոտ կես միլիարդ դրամ գումարի հափշտակության կատարումը կազմակերպելու համար:
Կարծիքներ