«Հրապարակ». Մի փորձեք սադրել` ո՞նց կարող են մեզ չհարգել

Երեկ հայտնի դարձավ, որ «Սիներջի» ընկերությանը եւ էկոնոմիկայի նախարարությանն առնչվող քրեական վարույթը քննող դատախազը սեփական նախաձեռնությամբ փոխել է ընկերության կին աշխատակիցների խափանման միջոցը, ըստ այդմ՝ Ալեն Սիմոնյանի եղբոր կինը՝ Անի Գեւորգյանն ու «Սիներջիի» աշխատակից Լիլի Մկրյանն ազատ  են արձակվել։ Մեզ հայտնի դարձավ նաեւ, որ ՔՊ խմբակցության երաշխավորագիրը, որով միջնորդել էին ոչ միայն կանանց, այլեւ ընկերության տնօրեն Աշոտ Հովհաննիսյանի կալանքը փոխել, դատախազությունը չի քննարկել, ինչը մերժմանը հավասար է։ Զրուցել ենք երաշխավորագիր ներկայացնելու նախաձեռնության հեղինակ՝ ՔՊ-ական պատգամավոր Հովիկ Աղազարյանի հետ։

- Ձեր միջնորդությունը դատախազությունն առանց քննության է թողել, որը նման է մերժելուն, արհամարհելուն, սեփական նախաձեռնությամբ է մեղմել կանանց խափանման միջոցը, ինչպե՞ս կմեկնաբանեք այդ փաստը։ Սա վերաբերմունք է օրենսդիր մարմնի, ավելի կոնկրետ ՔՊ-ականների՞ նկատմամբ, Ձեզ, ըստ էության, ասում են, որ տեղներդ նստեք, գործոն չեք ու չեք կարող դառնալ, թե՞ միջնորդության:

- Ոչ, չեմ կարծում, թե դա մեր նկատմամբ վերաբերմունք է, ինձ համար երկրորդական է՝ ով է միջնորդել, կարեւորն այն է, որ, ընդհանուր առմամբ, դատախազությունն ընդունելի մոտեցում է ցուցաբերել, եւ ես կարող եմ ասել, որ ինչ-որ իմաստով  տարբերակել է երկու կանանց նկատմամբ մի դիրքորոշում, մեկ այլ տղամարդու նկատմամբ՝ մեկ այլ դիրքորոշում, դա հասկանալի եւ ըմբռնելի է, ու այստեղ հարված, ապտակ չկա օրենսդիր իշխանությանը, օրենսդիր իշխանության կարծիքն էլ այս բնագավատում իմպերատիվ չէր, կարող էր հարգվել, կարող էր չհարգվել։ Տվյալ դեպքում գուցե հաշվի առնելով իմ նշած հանգամանքները, դրա համար են գնացել այդ որոշմանը, ես լիովին բավարարված եմ այս մոտեցմամբ՝ որպես պատգամավոր, որպես օրենսդիր մարմնի անդամ։

- Այսինքն՝ եթե միայն կանանց մասով միջնորդություն ներկայացնեիք՝ չներառելով նաեւ տնօրենի հանգամանքը, ձեր դիմումը կբավարարեի՞ն։

- Ես չեմ ուզում պատասխանել այդ հարցին, չեմ մեկնաբանում։

- Կարող էին ձեր միջնորդությամբ կանանց դեպքում դրական որոշում կայացնել, տնօրենի պարագայում` բացասական, հետեւաբար, դրա համար եմ հարցնում՝ ձեզ վիրավորված չե՞ք զգում, որ որպես պատգամավորի՝ ձեր կարծիքը, ձեր երաշխավորությունը հաշվի չի առնվում, հայտարարում են, որ դատախազը սեփական նախաձեռնությամբ է գործընթաց սկսում։

- Գուցե ես իրավաբանությունից լավ չեմ հասկանում, բայց, իմ պատկերացմամբ, միջնորդությունը քննում է դատարանը եւ ինքն է որոշում, բայց տվյալ պարագայում կարող եմ ասել, որ, ի պատիվ դատախազության եւ իրենց ղեկավարի, այդ պատասխանատվությունը վերցրել են իրենց վրա՝ չթողնելով պատասխանատվություն Քննչական կոմիտեի, դատարանների  վրա։

- Նախաքննության փուլում դատախազությանն է վերապահված այդ գործառույթը, դրա համար եմ ասում, որ գլխավոր դատախազը ձեզ՝ պատգամավորներիդ կոնկրետ ուղերձ փոխանցեց։

- Ես համաձայն չեմ, էլի եմ կրկնում՝ ես վստահ չեմ՝ արդյոք դատախազը կարո՞ղ է մեզ մերժել, բայց գուցե որոշումը ձեռքի տակ ունենամ, կարդամ, ապա նոր հասկանալի կլինի։

- Այս գործընթացում քաղաքական բաղադրիչ չե՞ք տեսնում, սա ուղերձ չէ՞ որոշակի իմաստով, որ դուք՝ շարքային ՔՊ-ականներդ, պատգամավորներդ, ոչինչ չեք կարող որոշել, այս երկրում մեկ մարդ է որոշում, կուզի՝ խափանման միջոց փոխելու հրահանգ կտա, կուզի՝ կկալանավորի, որ ձեր նկատմամբ էլ երբ եւ ինչ ուզեն, կանեն, հետեւաբար՝ հանգիստ նստեք տեղներդ։

- Ոչ, ոչ, ինչ քաղաքական․․․ Երբ նախաձեռնում էինք, ես նաեւ կանխատեսում էի, որ կմերժեն, որովհետեւ ես իրավաբան չեմ, ես այդքան տեղեկատվություն չունեմ իրավական գործի հետ կապված, ու գուցե իրավապահ մարմիններն ավելին են տիրապետում եւ գտնեն, որ նպատակահարմար չէ։ Ինչ վերաբերում է մեզ, ապա իմացեք, որ մենք գործոն ենք, մենք պետության բարձրագույն իշխանությունն ենք՝ ժողովրդի կողմից մանդատ ստացած, եւ իշխանության բոլոր ճյուղերը ձեւավորվում են մեր միջոցով։ Այնպես որ՝ մի փորձեք սադրել, ո՞նց կարող են մեզ չհարգել։ Այս որոշումը բացարձակապես չի նսեմացնում ԱԺ-ի դերը։

- Այդ միջնորդություններն այն նպատակով չեն, որ իրավապահներից պահանջեք արդարացնել, ընդամենը նախնական կալանքն եք առաջարկում փոխել, ձեր ասածի տրամաբանությամբ՝ ընդհանրապես չպետք է միջնորդություն ներկայացնել։

- Անչափահաս երեխաների մայրերին կալանքի տակ պահելը պետք է այնպիսի հիմնավորումներ ունենա, որ անառարկելի լինի, պետք է հիմնավորել, որ հասարակության համար տվյալ անձը վտանգ է ներկայացնում եւ այլն, հակառակ դեպքում այլընտրանքային միջոցներ կան, ասենք՝ տնային կալանքը եւ այլն։ Ես պաշտոնապես հայտարարում եմ, որ ցանկացած մայրիկի դեպքում կարող եմ նման միջնորդությամբ հանդես գալ, իհարկե, այլ հարց է՝ իրավապահները կմերժե՞ն, թե՞ չէ, բայց ես պատրաստ եմ։ Այսինքն՝ սա այնքան ակնառու դեպք էր, դրա համար մի փորձեք քաղաքական ուղով տանել․․․
Ես մի գաղտնիք բացեմ. մենք որոշում ունեինք, որ որեւէ գործով չպետք է միջնորդեինք, բայց եթե դեպք կլինի, որ կլինի շատ արտառոց, կարանք քննարկենք եւ պատգամավորներով միասին որոշում կայացնենք։ Սա այդ դեպքն էր։

- Դուք մի կողմից ասում եք՝ մի քաղաքականացրեք, բայց ինքներդ եք փաստում, որ գործ ունենք քաղաքական գործի հետ, օրինակ՝ եթե կալանավորվածը չլիներ Ալեն Սիմոնյանի հարսը,  եւ դուք էլ ծանոթ չլինեիք գործի բնույթին, չմտահոգվեիք, որ վաղը ձեր գլխին են սարքելու, կմիջնորդեի՞ք: Եթե այո, ապա ինչո՞ւ Տաթեւ Վիրաբյանի դեպքում չմիջնորդեցիք, նա էլ իր խնամքին մանկահասակ երեխաներ ունի։

- Դա (նկատի ունի Տաթեւ Վիրաբյանի կալանավորումը` Լ. Շ.), իմ գնահատմամբ, եղել է կոպիտ սխալ, բայց մի վերապահումով, որ իրավապահ մարմինները լավ գիտեն՝ որ դեպքում ինչ անել։