«Հրապարակ». ԿԳՄՍՆ-ից մարդ է եկել, ասել է. հեռացրեք զոհերի նկարները` աշակերտներին շեղում են

Այս օրերին տարբեր դպրոցներից, զորամասերից, հոսպիտալներից լուրեր են տարածվում, թե հանվում են հերոսների լուսանկարների պաստառները, փառքի անկյունները: Լուրերի մի մասը փորձում են հերքել: Իսկ Արարատի համայնքապետարանը, արձագանքելով շաբաթ օրվա մեր հրապարակմանը, թե քաղաքի կենտրոնից հեռացվել են հերոսների նկարները, հայտարարեց, որ, այո, հերոսների նկարները հեռացվել են, բայց դա վաղուց է եղել` քամուց, անձրեւներից դրանք վնասվել էին, հանել են, որ նորացնեն ու տեղադրեն, բայց... հավանաբար, մոռացել են: 
Մենք զրուցեցինք գրականագետ Սերժ Սրապիոնյանի հետ: Պարզվեց, որ նա նույնպես տեղեկացված է այս թեմայից: Մեզ հետ զրույցում Սերժ Սրապիոնյանն ասաց, որ Արմավիրի մարզի Ջանֆիդա համայնքի դպրոցից ինքը լուր է ստացել, որ նրանց եւս հրահանգ է իջեցվել՝ հեռացնել պատերազմում զոհված հերոսների նկարները, հանել «Փառքի անկյունը», բայց տնօրինությունը դիմադրել է։

Միայն Ջանֆիդայի դպրոցը չէ, որ նման հրահանգ է ստացել, մարզի բազմաթիվ այլ դպրոցներ եւս նման հրահանգ են ստացել։ «Ես ստուգել եմ՝ հավաստի է տեղեկությունը։ Դպրոցներում ասել են՝ հեռացնել փառքի անկյունները։ Մի քանի դպրոցների տնօրեններ դիմադրություն են ցույց տվել։ Մի խումբ է հիմա շրջում դպրոցներում, փորձում են ճշտել, թե քանի դպրոց է ենթարկվել այս ազգակործան հրամանին։ Արմավիրի գյուղական դպրոցների տնօրենները խոստովանել են՝ փառքի անկյունները հանելու հրահանգ են ստացել։ Օրինակ, Ջանֆիդայի դպրոցում կան պատերազմում զոհված հերոսների նկարներ՝ հերոսները հենց այդ գյուղից են եղել։ Դպրոցի տնօրինությունն ասել է՝ որեւէ դեպքում այդ նկարները չեն հեռացնի։ ԿԳՄՍՆ-ից մարդ է եկել, ասել է՝ հեռացրեք, դպրոցականներին շեղում են, անընդհատ հիշեցնում են զոհերին, նպատակահարմար չէ, որ մնան դպրոցների պատերին։ Այդպիսի քայլ առաջինն արեցին ադրբեջանցիները՝ Արցախում։ Համալսարանի պատերից հեռացրին բոլոր զոհված հերոսների նկարները»,- ասաց Սրապիոնյանը, սակայն չգաղտնազերծեց ԿԳՄՍՆ-ի որոշմանը դիմադրություն ցույց տված տնօրենների անունները։ Գրականագետը շեշտում է՝ դպրոցներից հերոսների նկարները հանելն այս իշխանության գծի ուղիղ շարունակությունն է՝ հիշողությունից քերել, ջնջել հերոսականության վերաբերյալ մեր պատկերացումները։ 

«Ըստ այս իշխանության՝ մեզ պետք են մարդիկ, որոնք կհաշտվեն հերոսականության ժխտման հետ։ Սրա հիմքը դրվել էր 2018-ին։ Երբ այս անձն ամբոխի միջոցով բռնազավթեց վարչապետի պաշտոնը, առաջին քայլերից մեկը եղավ ռազմական ուսուցման վերացումը դպրոցներից։ Ռազմահայրենասիրության դաստիարակության մասին ուղղակի հայտարարեցին, որ փչացնում է մեր երեխաներին, դարձնում է նացիոնալիստ, ու հանեցին դպրոցներից։ Նույն երեւույթի շարունակությունն է գնում։ Դուք պատկերացնո՞ւմ եք՝ Աբաջյանի, Ազգալդյանի եւ մյուս հերոսների մասին մի 5-10 տարի հետո որեւէ աշակերտ չի իմանա կամ կիմանա չնչին մասը, այն էլ՝ ծնողների շնորհիվ»,- ցավով արձանագրում է գրականագետը։ Սրապիոնյանի խոսքով՝ սա մի ծրագիր է, որը որոճում ու կազմում են արտերկրում, ինչն էլ իրագործում են Հայաստանի իշխանավորները։ 

«Սա դպրոցի քանդման ծրագրի բաղկացուցիչ մասն է։ Հայրենագիտական, հայրենասիրական առարկաները հանեցին, հիմա հերոսականությունն են հանում, վաղը սպասեք ավելի մեծ իրողությունների։ Օրինակ՝ տարածաշրջանի պատմության անվան տակ երեխաներին սովորեցնեն Թուրքիայի հերոսական էջերի պատմություն»,- նկատեց նա։