ՀԱԿ-ում քաոսային իրավիճակ է

Քաղաքական դաշտի սպասողական տրամադրություններին զուգահեռ քաոսային իրավիճակ է ներկուսակցական մակարդակում: Այդ մասին գրում է «Իրատես de facto» թերթը։ «Թերեւս, ամենահանդարտը իշխող կուսակցությունում է, որովհետեւ գիտեն` ումով, ինչպես են գնալու ընտրությունների:



Ընդդիմադիր բեւեռում, մասնավորապես ՀԱԿ-ում, այնքան են սրված հարաբերությունները, որ աջ ձեռքը չգիտի` ինչ է անում ձախը:



ԲՀԿ-ի հետ համագործակցության անհրաժեշտության արձանագրումը որոշ կոնգրեսականների կտրուկ որոշումների առիթ է տվել:



Ավելին, վերջիններս այլեւս չեն թաքցնում, որ ՀԱԿ այլեւս գոյություն չունի, ու չկա այնտեղ ներգրավված կուսակցությունների համագործակցության որեւէ փաստաթուղթ: Լեւոն Տեր-Պետրոսյանը, ինչպես փոխանցում է մեր աղբյուրը, այսօր երկընտրանքի առջեւ է կանգնել՝ համագործակցել ԲՀԿ-ի հետ եւ ունենալ քաղաքական ռեսուրսի, համակիրների հերթական մեծ կորո՞ւստը, թե՞ հրապարակավ խզել բոլոր կապերը ԲՀԿ-ի հետ եւ պահպանել ՀԱԿ-ից դեռ մնացած «բեկորները»:



Իրավիճակի նման ձգձգումը, ըստ մեր աղբյուրի, փաստում է, որ ՀԱԿ-ի առաջնորդը դեռ չի կարողանում այս երկու տարբերակները նժարի վրա դնել, հասկանալու համար` ո՞րն է ավելի «ծանր»: Սրան նպաստում է նաեւ ԲՀԿ-ի անհստակ կեցվածքը՝ իշխանության «գի՞րկն» է վերադառնալու, թե՞ ընդդիմության «փշոտ» ճամփան է ընտրելու»,- գրում է «Իրատես de facto»-ն։