Լրագրային շանսոն
***
Լուրեր են պտտվում, որ ԿԳ նախարարությունում փոխում են պարկետը: Բնականաբար` ԿԳ նախարար Արմեն Աշոտյանին պարկետին իջեցնելու կապակցությամբ:
***
Գալուստ Գրիգորիչը ոչ մի կերպ չի կարողանում իր մեծությունը զետեղել քաղաքական փոքրամասնության շարքերում եւ, ինչպես փոքրամասնությունն է վարվում` խոսել ուրիշ կուսակցության ճշտից ու սխալից: Իսկ ահա՝ խորհուրդներ տալ սիրում է: «Ուժեղի վրա մատ թափ չեն տալիս, այլ թույլ են տալիս, որ նա իրենց ուտի,- ասել է Գրիգորիչն ու հավելել։- Դա ես չեմ ասում, Խնկո Ապերն է ասել»:
***
ՀՀ ԱԺ-ում գողը գոռում է` բռնեք գողին, իսկ «ֆեյքը»` բռնեք «ֆեյքին»…
***
Թերթերի գլխավոր խմբագիրները թերթերից իմացել են, որ իրենք դիմել են Նաիրա Զոհրաբյանին, որ Նաիրա Զոհրաբյանն ու նրա մի շարք պատգամավոր կոլեգաներ հանդես գան մամուլի դեմ նոր օրինագծով:
***
Փաստորեն այլընտրանք` նշանակում է ընդդիմության շոգեքա՞րշ:
***
Այս օրերին երբ ասում են` ԲՀԿ, հասկանում են Բաբայան, երբ ասում են՝ Բաբայան, հասկանում են բարիկադ, երբ ասում են` բարիկադ, հասկանում են Բաղրամյան, բայց երբ ասում են` Բաղրամյան, չգիտես ինչու, հասկանում են կառավարություն:
***
Աղվան Վարդանյանի հայտարարությունը, որ չկա «հրաշալի քառյակ», մոռացեք, կան չորս քաղաքական ուժեր, որոնք որոշակի հարցերի շուրջ համագործակցում են, առանձնապես լույս չի սփռել ՀՀԿ-ական հոգիների վրա:
***
Հարգելի քաղաքական փոքրամասնություն, գիտենք, որ վճռական եք տրամադրված, բայց երեք օրով շուրջօրյա հանրահավաք-ցույց չի լինում: Շուրջօրյա՝ նշանակում է շուրջօրյա, մինչեւ վերջ, իսկ երեք օրը նշանակում է ընդամենը երեք օր, որից հետո, ինչպես կասեր Լեւոն պապին, գնում ենք տուն:
Էդիկ ԱՆԴՐԵԱՍՅԱՆ
Կարծիքներ