Իսկ դուք հաշվե՞լ եք, թե Գյումրիում քանի ՀՀԿ-ական կար

Ծնունդով գյումրեցի, ԱԺ ՀՀԿ-ական պատգամավոր Սամվել Նիկոյանն ընդհատակ չի անցել հունվարի 12-ին Գյումրիում Ավետիսյանների ընտանիքի սպանդին հաջորդող օրերին, նա եղել է Գյումրիում եւ զրուցել շատերի հետ, պարզապես լրատվամիջոցները չեն նկատել նրան: Այդ մասին մեզ փոխանցեց ինքը՝ պատգամավորը:

- Պարոն Նիկոյան, ինչո՞ւ իշխանություններն այդքան երկչոտ ու անտարբեր պահեցին իրենց այս ահասարսուռ միջադեպի վերաբերյալ:

- Ես իմ մասին կարող եմ ասել, իմ վարքագիծը պայմանավորված չէ նրանով, թե ինչպես կգնահատի մամուլը, որովհետեւ մամուլը կգնահատի այնպես, ինչպես ինքն է ուզում, եւ որը կարող է բացարձակապես կապ չունենալ տվյալ իրողության հետ: Ես եղել եմ Գյումրիում, կանգնել եմ ժողովրդի մեջ, այդ ամբողջ արարողության ընթացքում կանգնել եմ մարդկանց մեջ, հետո շրջել հրապարակում, եկեղեցամերձ շրջանում, որտեղ մարդիկ կուտակված էին, զրուցել-խոսել ենք, հանդիպել ենք ծանոթների հետ, որից հետո շատ երկար խորհրդակցել ենք, քննարկել իրավիճակը Շիրակի թեմի առաջնորդի հետ: Մնացածը, թե ինչպիսի գնահատականներ կտա մամուլը կամ որեւիցե մեկը…

- Բայց ամենավտանգավոր պահին Դուք ժողովրդի կողքին չէիք, ցուցարարների եւ ոստիկանների բախման ժամանակ կային այլ պատգամավորներ, բայց Դուք՝ ոչ:

- Ոոոչ, ես այնտեղ եմ եղել, հուղարկավորության ժամանակ ես եղել եմ ժողովրդի մեջ, բազմության մեջ կանգնած եմ եղել մենակ, միայն դրանից հետո եմ ես հանդիպել իմ գործընկերներին, ծանոթներին, Ռուբիկ Հակոբյանին եւ այլոց… Մի խոսքով, ես այդ ամենը չեմ անում մամուլի համար, ինձ բացարձակապես պետք չէ մամուլի գնահատականը: Ինձ պետք է իմ հոգու պարտքը, իսկ իմ հոգու պարտքը ես տվել եմ այնպես, ինչպես գտել եմ ճիշտ:

- Ձեր մասնակցությունը գուցե աննկատ մնար, Դուք ճի՞շտ եք համարում իշխանության ղեկավար այրերի եւ հատկապես նախագահի բացակայությունն այդ հուղարկավորությանը, ինչպես նաեւ սուգ չհայտարարելու փաստը: Էլ ի՞նչ պետք է լիներ, որ ղեկավար այրերը մասնակցեին, համազգային սուգ հայտարարվեր, մինչդեռ դրա փոխարեն լուրեր տարածվեցին, թե Սերժ Սարգսյանը տոնական միջոցառումների է մասնակցել: Չե՞ք անհանգստանում ձեր վարկանիշի համար:

- Ես Ձեր հարցերին արդեն պատասխանեցի, շնորհակալություն, որ ինձ հիշեցիք:

- Պարոն Նիկոյան, փաստորեն, ընդունում եք ՀՀԿ-ի հասցեին ուղղված քննադատությունները, որ դուք միայն խնջույքների, հարսանիքների ու տոնական հանդիսությունների նկատմամբ եք ադեկվատ, իսկ մյուս հարցերում…

- Լսեք, ես իրավասու չեմ ՀՀԿ-ի փոխարեն պատասխանելու, Դուք ինձ եք հարց տալիս, ես պատասխանում եմ իմ վարքագիծը, իմ մտածելակերպը:

- Այդուհանդերձ, չե՞ք կարծում, որ դիտողությունը տեղին է:

- Իսկ դուք հաշվե՞լ եք այնտեղ, կուսակցական տոմսերն ստուգե՞լ եք, Գյումրիում այդ հավաքված մարդկանց մեջ կայի՞ն ՀՀԿ-ականներ, թե՞ չէ:

- Շարմազանովը հայտարարեց, որ մի ներկայացուցիչ ունեիք՝ ի դեմս ԱԺ նախագահի…

- Դե, եթե մամուլի խոսնակի պատասխանն ունեք, էլ ինչի՞ եք ինձ հարցնում: Ես պատասխանեցի իմ մասով, թե իմ վարքագիծն ինչպիսի դրսեւորումներ է ունեցել: Ես գյումրեցու հոգեբանությունը հասկանում եմ եւ գիտեի այդ օրվա իրավիճակի ամբողջ կարեւորությունը եւ ես ուզում էի հասկանալ՝ ինչպիսի հնարավոր զարգացում… Դրա համար ես գնացել-կանգնել եմ մարդկանց մեջ եւ շփվում էի մարդկանց հետ: Ես ուզում էի, որ գոնե այն մարդկանց, որոնց հետ շփվում էի, փորձել նրանց վիշտը կամ զայրույթը մեղմել:

- Իսկ հաջողվե՞ց, որովհետեւ ՀՀԿ-ի պահվածքից, ասում են՝ գյումրեցիներն ահավոր վրդովված էին, այնքան, որ մերժել են անգամ Սերժ Սարգսյանի անունից ուղարկված ծաղկեպսակը:

- Ես խնդրում եմ, խնդրում եմ, ես ասում եմ՝ այն մարդկանց հետ, ում հետ հանդիպել եմ, զրուցել ենք շատ անկեղծ, միմյանց հասկացել ենք շատ նորմալ ձեւով: Հիմա, եթե դուք գտնում եք, որ չպիտի իմ հետ նորմալ վարվեին, չարաչար սխալվում եք: Եթե մարդկանց դու հարգում ես, հարգանքն անպայման կստանաս: Ես հարգում եմ, եւ այն եղել է իմ մանկության քաղաքը: