Գագիկ Ծառուկյանը կես ճանապարհից ետ է դառնում. ԲՀԿ առաջնորդի հայտարարությունը

Հիշեցնենք, որ ՀՀԿ-ԲՀԿ առճակատումց հետո «խաղաղապահ առաքելությամբ» Հայաստան էին ժամանել «Տաշիր գրուպի» սեփականատեր Սամվել Կարապետյանը՝ «Կալուգայի Սամոն» եւ Երեւանի նախկին քաղաքապետ Կարեն Կարապետյանը՝ «Գազի Կարենը»: Նրանք եկել էին Սարգսյանի եւ Ծառուկյանի միջեւ առաջացած խռովությունները հաշտեցնելու համար եւ կարծես դա հաջողվել է: Երեկ նրանց, ինչպես նաեւ ՀՅԴ-ական պատգամավորների մասնակցությամբ վարչապետ Հովիկ Աբրահամյանի առանձնատանը մինչեւ ուշ գիշեր բանակցություններ են ընթացել, կայացել է Սարգսյան-Ծառուկյան հանդիպում: Եւ դրա արդյունքում ծնվեց ԲՀԿ հայտարարությունը։

«Սիրելի հայրենակիցներ, Ինչպես ես բազմիցս ասել եմ, մեր բոլորի, և անձամբ իմ խնդիրը ես միշտ տեսել եմ մեր ժողովրդին, մեր երկրին օգտակար լինելու մեջ: Հայաստանում առկա խնդիրները լուծելու համար մեզ անհրաժեշտ է ոչ թե պատերազմել միմյանց դեմ, այլ հանգիստ, առանց միմյանց վիրավորելու աշխատել, ցույց տալ առկա բոլոր բացերը, գտնել լուծումներ և կյանքի կոչել դրանք: Միայն այդպես է հնարավոր վերացնել այն իրավիճակը, որն այսօր մենք ունենք մեր երկրում: Ցավով եմ նշում, որ վերջին օրերի ընթացքում գործընթացները մեր երկրում բոլորովին այլ ուղղությամբ են ընթանում: Սա որևէ բարի տեղ չտանող ուղղություն է:

Դժվար չէ պատկերացնել, թե այն, ինչ կատարվում է հիմա, ինչի կհանգեցնի ընդամենը մի քանի շաբաթների ընթացքում: Այսպես շարունակվելու դեպքում չի շահի ոչ մեկը և առաջին հերթին մեր ժողովուրդը: Այսպես շարունակել չի կարելի, հետո բոլորս մեղադրելու ենք ինքներս մեզ: Ինձ համար թանկ է մեր քաղաքացիներից յուրաքանչյուրի կյանքն ու արժանապատվությունը: Ոչ մի նպատակ չի կարող արդարացնել նույնիսկ մեկ անմեղ մարդու արյուն: Թե իշխանության, թե ընդդիմության խնդիրն է չանցնել ողջամտության սահմանը: Բոլոր խնդիրները պետք է լուծվեն խաղաղ, օրինական, քաղաքական ճանապարհով: ԲՀԿ նախագահ Գագիկ Ծառուկյան»: