ՀՀ գյուղատնտեսության նախարարն ընդունել է Հայաստանում ԱՄՆ նորանշանակ դեսպան Ռիչարդ Միլսին

ՀՀ գյուղատնտեսության նախարար Սերգո Կարապետյանն այսօր ընդունել է Հայաստանում ԱՄՆ նորանշանակ արտակարգ և լիազոր դեսպան Ռիչարդ Միլսին:
Շնորհավորելով հյուրին մեր երկրում դիվանագիտական առաքելությունն ստանձնելու կապակցությամբ` նախարարը համոզմունք է հայտնել, որ նրա պաշտոնավարման ընթացքում հայ-ամերիկյան հարաբերությունները նոր լիցք կստանան:

«Տարիների ընթացքում արդյունավետ հարաբերություններ են ձևավորվել ՀՀ գյուղատնտեսության նախարարության, ԱՄՆ դեսպանատան և մեր հանրապետությունում գործող ամերիկյան միջազգային կառույցների միջև: Վստահ եմ, որ այդ փոխգործակցությունը կկրի շարունակական բնույթ», – նշել է իր խոսքում նախարարը:

Հանդիպման ժամանակ նախարարը հանգամանորեն ներկայացրել է դեսպանին հանրապետության գյուղատնտեսության ոլորտի ներկա վիճակը, վերջին տարիներին գրանցված արդյունքները, իրականացվող ընթացիկ ու առաջիկա ծրագրերը:
Ոլորտի առաջնային խնդիրների շարքում նախարարը, մասնավորապես, առանձնացրել է կոոպերատիվների ստեղծման, ոռոգման ժամանակակից համակարգերի ու հակակարկտային ցանցերի ներդրման, տոհմային գործի բարելավման, պտղատու նոր այգիների ստեղծման, ինչպես նաև գյուղացիական տնտեսություններին նորագույն գյուղտեխնիկայով ապահովելու անհրաժեշտությունը:
Դեսպան Ռիչարդ Միլսն իր հերթին գոհունակություն է հայտնել գյուղատնտեսության ոլորտում ձևավորված հայ-ամերիկյան համագործակցության բարձր մակարդակով և վստահեցրել, որ իր պաշտոնավարման ընթացքում կներդնի առավելագույն ջանքեր այս ուղղությամբ փոխգործակցությունը խորացնելու նպատակով:
ՀՀ գյուղատնտեսության նախարարության տեղեկատվության և
հասարակայնության հետ կապերի բաժին