ՀՅԴ ներկայացուցիչները հյուրընկալվել են Հայաստանում Եվրամիության պատվիրակության գրասենյակում
![ՀՅԴ ներկայացուցիչները հյուրընկալվել են Հայաստանում Եվրամիության պատվիրակության գրասենյակում](https://hraparak.am/uploads/images/73d2647f0fa1d653177bc8e800e9c045.jpg)
Այսօր՝ Հայաստանում Եվրամիության պատվիրակության գրասենյակում ՀՅԴ Հայաստանի Գերագույն մարմնի ներկայացուցիչներ Աղվան Վարդանյանն ու Լիլիթ Գալստյանը հանդիպել են Եվրամիության ընդլայնման և հարևանության քաղաքականության հարցերով նորանշանակ հանձնակատար Յոհաննես Հանին։
Հանձնակատարը ողջունելով հյուրերին, ցանկություն է հայտնել լսել նրանց տեսակետներն ու մոտեցումները երկրի ներքաղաքական կացության, եվրոպական հարևանության ձևաչափում նրանց սպասելիքների ու պատկերացումների ուղղությամբ։ Գոհունակություն հայտնելով հանդիպման հնարավորության համար, ՀՅԴ ԳՄ ներկայացուցիչ Աղվան Վարդանյանը համառոտ ներկայացրել է կուսակցության քաղաքական օրակարգի տվյալ պահի հիմնական առաջնահերթություններից երկուսը՝ շեշտը դնելով սահմանադրական բարեփոխումների ՀՅԴ մոտեցումների, ինչպես նաև սոցիալ-տնտեսական քաղաքականության առնչությամբ կուսակցության սկզբունքային դիրքորոշումների վրա։
Աղվան Վարդանյանը կարևորել է նաև Եվրամիության դերակատարությունն ու աջակցությունը եվրոպական չափանիշներով ընտրական օրենսգրքի մշակման և համապատասխանաբար՝ ընտրությունների կազմակերպման գործում։ Վարդանյանը նաև լավատեսություն է հայտնել Ռիգայի գագաթաժողովում քաղաքական օրակարգով նոր մակարդակի բանակցություններ սկսելու ուղղությամբ։
Լիլիթ Գալստյանը, հնչեցնելով ՀՅԴ ծրագրային փաստաթղթերում ամրագրված Եվրոպական արժեքների հավատարմության իրողությունը, կարևորել է Հայաստան-ԵՄ համագործակցության հետագա զարգացման անհրաժեշտությունը՝ այն դիտելով որպես երկրում սոցիալական ու քաղաքացիական շինարարության կենսական հիմք, երկրում ժողովրդավարության խորացման ու ամրացման, արմատական փոփոխությունների գրավական։
Հանդիպման ավարտին Աղվան Վարդանյանն իր գոհունակությունն է հայտնել ԵՄ հանձնակատարին «Եվրանեսթի» լիագումարին մասնակցելու ու Հայաստանում եվրոպական շաբաթին իր կարևոր մասնակցությունը բերելու համար։
ՀՅԴ ԳՄ մամլո դիվան
Կարծիքներ