Ռոբերտ Նազարյան․ «Եթե սակագինը մեկ լումայով իջեցնելու հնարավորություն գտնեինք, կանեինք դա»

Հանրային ծառայությունների սակագները կարգավորող հանձնաժողովի նախագահ Ռոբերտ Նազարյանը քիչ առաջ պատասխանեց «Հրապարակի» հարցին, թե հնարավոր է արդյոք, որ հանձնաժողովն այնուամենայնիվ փոխի իր որոշումը։

- Ես արդեն ասել եմ, որ մենք այսօր էներգետիկ համակարգը կայուն պահելու խնդիր ունենք, հուսալի, անվտանգ շահագործելու խնդիր ունենք, և սա ոչ միայն «Ցանցերին» է վերաբերում, այլ նաև կայաններին։ Ասել եմ նաև, որ հարցի գինը սա է։ Բոլոր լսումների ժամանակ, որոնց ես մասնակցել եմ, այդ հարցն ինձ ուղղել են, և ես ասել եմ՝ կարելի է, եթե երկու աղբյուր լինի։ Մեկը՝ եթե երկարաժամկետ, արտոնյալ վարկ ճարեք, բերեք-դնեք և տարիների ընթացքում մարեք, և բեռը թեթևանա, մյուսն էլ՝ սակագնի բարձրացումն է։ Մենք 5 հոգուց կազմված կոլեգիալ մարմին ենք և մեր դիրքորոշումը հայտնել ենք։ Եթե որևէ մեկն այդ գումարը կգտնի և կասի՝ տալիս եմ ձեզ և տեղադրեք, ոնց որ եղավ ժամանակին գազի սակագնի հետ, երբ մեզ ասեցին՝ սպառողի վրա ոչ թե 270 դոլար հաշվեք, այլ 189, բնականաբար, կվերանայենք։ Բայց այդ գումարը չկա, աղբյուրը չկա։

-Հիմա թվեր են հրապարակվում։ Ասում են, որ, օրինակ, «ՌԱՕ ԵԷՍ»-ի 2014 թվականի տարեկան հաշվետվության մեջ 14, 4 մլն ռուբլու եկամուտ է ներկայացված «ՀԷՑ»-ի մասով։ Բայց մեզ ասում են, որ վնաս են կրել։ 

- Ստահոդ ինֆորմացիա է։ Կարծում եմ, որ «ՌԱՕ ԵԷՍ»-ի  ամբողջ ընկերության շահույթի մասին է խոսվել, ոչ թե «Ցանցերի»։ 2013 թվականի աուդիտի եզրակացությամբ 9 մլրդ դրամի վնաս են ունեցել «Ցանցերը», մեր կայքում տեղադրված է։ 

—Իսկ եթե նորից ստուգեք ամբողջությամբ նրանց ֆինանսական վիճակը, այլ ռեսուրսներ չե՞ք գտնի։ 

- Եթե մեր ամբողջ վերլուծությունների արդյուքնում սակագինը գոնե մեկ լումայով իջեցնելու հնարավորություն գտնեինք, մենք այդ մի լուման էլ կիջեցնեինք։ 

-Մի խոսքով, դուք ասում եք, որ այս ակցիաները արդյուքն չե՞ն ունենալու, և սակագինը չ՞ի փոխվելու։

-Ես ասում եմ հետևյալը։ Մենք մեր ուսումնասիրությունների արդյուքնում կատարել ենք մասնագիտական խորը վերլուծություն և մեր դիրքորոշումը հայտնել ենք, բազմաթիվ հրապարակային լսումների ենք մասնակցել, որտեղ տվել ենք մեր պարզաբանումներն ու մեկնաբանությւոնները։