Եթե իրենց թալանի մի մասը դնեին բանակի վրա, մենք պրոբլեմ չէինք ունենա

Հարցազրույց ՀԱԿ վարչության անդամ, ԱԺ նախկին պատգամավոր Հակոբ Հակոբյանի (Լեդի Հակոբ) հետ։

- Պարոն Հակոբյան, տեղեկացանք, որ Մալաթիա-Սեբաստիա վարչական շրջանի դատարանի շենքի արգելափակմանն անձամբ էիք մասնակցում։ 

- Ես էնտեղ եղել եմ, էնքան մարդ կար, ինչի՞ պետք է արգելափակեի, ժամը 9։30-ը կլիներ, գնացի, արդեն փակ էր, ժամը 8-ից արդեն փակ էր։ 

- Այդ քայլը, ըստ իրավաբանների գերակշիռ մեծամասնության, հակասահմանադրական էր, եւ պատահական չէ, որ Եվրախորհրդից դատապարտող հայտարարություն եղավ, միջազգային հեղինակավոր իրավապաշտպան կազմակերպություններից մեկը Նիկոլ Փաշինյանին ուղղակի ասաց՝ մի՛ արեք այդ բանը։ Չե՞ք կարծում, որ հարվածի տակ է դրվում Հայաստանի միջազգային վարկն ու շատ այլ բաներ։

- Չգիտեմ, իմ մտածածով՝ լրիվ ճիշտ էր, 100 տոկոսով, պտի շուտ աներ, վերջը համոզվեց, որ նույն մաֆիան է, որ մի տեղից է կառավարվում։ Ու մտածում եմ՝ թող նույն կազմակերպությունները տեսակետներ հայտնեն, վերջը մեկ-երկու տարի հետո իրենք էլ կհամոզվեն։ 

- Նույն մաֆիա ասելով նկատի ունեք Քոչարյան-դատավորներ․․․

- Ինչի՞ մենակ՝ դատախազություն, մյուս կառույցներ․ բոլորը միասնական անցել են մի թրի տակով՝ հատիկ-հատիկ։ Ստուգված, երդումներ տված։

- Ղարաբաղի նախկին ու ներկա նախագահները Ռոբերտ Քոչարյանի համար երաշխավորագիր ներկայացրին։

- Ասել եմ՝ իրենք իրենց պաշտպանության համար են արել, ամբողջը մի թիմ են եղել։ Քոչարյանին պաշտպանելով՝ իրենց են պաշտպանել։ 

- Ասում են՝ սեպ է խրվում Արցախ-Հայաստան հարաբերություններում։ Չեմ սիրում «թուրքը կուրախանա» արտահայտությունը, ռաբիս է, բայց այս դեպքում կարծես թե տեղին է, քանի որ ադրբեջանական կայքերում նման չարախնդություն հանդիպում է։

- Ոչ մեկն էլ չի կարա ուրախանա, տենց բան չի կարա լինի, իրենք լավ գիտեն, որ հին իշխանություններն իրենց մաֆիան է էլել։ Բոլորը լավ հասկանում են՝ երկիրն ինչ վիճակի են հասցրել։ Եթե իրանք՝ իրենց տերերով հանդերձ, երկրի մասին մտածեին, իրանց թալանածի ինչ-որ մաս դնեին երկրի վրա՝ Ղարաբաղի վրա, սաղս էլ գիտենք, որ էդ վիճակը 2016 թվականին չէր լինի՝ պատերազմական, ոչ էլ էդքան զոհեր կունենայինք։ Քիչ կունենայինք, տարածքներ չէինք կորցնի, այլ կգրավեինք։ Այդ ժամանակ Ադրբեջանն էդքան մեծ-մեծ չէր խոսա, օդերից էլ Ալիեւը կիջներ ներքեւ, կզգար ինչ է։ Առնվազն մի 20-30 տարի կմոռանային պատերազմի մասին։ Իսկ հիմա իրենք անընդհատ պատերազմով են ուլտիմատում տալիս։ Էտի էն էր, որ երկրի նախագահն էլ էն ժամանակ հայտարարեց, որ 80-ականների զենքերով էինք կռվում։ Ի՞նչն էր խանգարում, որ ամենավերջին մակարդակի զենքերով կռվեինք։ Մենք պրոբլեմ չէինք ունենա, եթե իրենց թալանի մի մասը դնեին բանակի վրա։ Բայց լավ գիտենք, որ 16 թվականին ինչ վիճակ էր բանակի վիճակը։

- Փաշինյանը երեկ առաջարկեց ԱԺ քննիչ հանձնաժողով ստեղծել, եթե ստեղծվի ու իրավական-քաղաքական գնահատական տրվի, մեղավորներ հայտնվելու դեպքում պե՞տք է դատվեն՝ դատական ատյաններո՞վ, թե՞ պատերազմի օրենքով։

- Մեղավորները կան, բայց ի՞նչն է փոխում, որ մեղավորները պատժվեն կամ եսիմինչ․․․ Տարածքներ կորցրինք, դիրքեր, տղերքի արյան գնով, երեւի էդքանը պահվեց։ Բա որ հանկարծ եսիմի՞նչ լիներ․․․ Աստված չանի՝ ունենայինք ավելի շատ զոհեր ու ավելի շատ տարածքներ կորցնեինք։ Ի՞նչը պտի փոխվեր դրանից հետո։ Դրա համար Նիկոլ Փաշինյանն ինչ անում ա,  շատ ճիշտ է անում։ Օրենք են ասում, Սահմանադրություն․ էսօր երկրին պտի իրոք տեր լինել, երկրին սրտացավ, հոգատար մարդ լինել։ Դա ինքն ա, ինքը սաղ փորձություններով անցել ա, հոգատար է։ Կարող է ինչ-որ տեղեր, ինչ-որ բաներ չի ստացվում ճիշտ, բայց, համենայնդեպս, երկրի մասին է մտածում, ժողովրդի մասին։ Ղարաբաղն էլ՝ հետը։

- Փաշինյանի կադրային քաղաքականությունից գո՞հ եք։ Ինչո՞ւ ՀԱԿ-ականներին աշխատանքի չի հրավիրում, բայց Հանրային խորհրդի նախագահ է նշանակում Վազգեն Մանուկյանին։

- Էդքան չեմ ուզում մանրանամ, ես չեմ ուզում էդ մասին, ես, որպես կամավորական զինվոր, Ղարաբաղի հետ կապված՝ կարող եմ ասել, որ ինչ անում է, անում է, որ հետագայում երկրի համար լավ լինի։ Ես տենց եմ համոզված։

- Իսկ չե՞ք կարծում, որ նոր իշխանության հանդեպ վստահության պաշարը սպառվում է։

- Էդ պաշարը սպառվելը ժամանակի խնդիր է, իսկ ռեալ քայլերի դեպքում իրենք բոլորն էլ համոզվելու են։ Ուղղակի, մեր ժողովրդի մոտ էն «հիմա, հիմա» խասյաթը կա, որ միշտ ասվել է։ Բոլորն ուզում են, որ միանգամից լինի, բայց միանգամից էդ մաֆիայի դեմը՝ 20 տարվա ստեղծած, անհնարին ա։ Ես լավ գիտեմ իրենց ստեղծածի ստրուկտուրաները, թե ոնց ա եղել։ Հեշտ չի։ Ժողովո՛ւրդ, ես ներսը եղել եմ, ես տեսել եմ, էսքան տարի ԱԺ-ում, ըտեղ, լրիվ տեսել եմ՝ ինչ  է կատարվում։ Դրա համար հեշտ չի դա, ժամանակ ա պահանջում։ Դրա համար ուղղակի պտի թալանչիներին բռնի, սահմանադրական կլինի, հակասահմանադրական կլինի, ձեռներից գումարները վերցնի, Ղարաբաղի վրա ներդնի։ Ուրիշ ելք չեմ գտնում։