Արփա-Սևան թունելով Սևան է մտել մոտ 6 միլիարդ խորանարդ մետր ջուր
Անուշ Դաշտենց
17 Հուլիս 2019 | 10:43
0
Գեղարքունիքի մարզպետ Գնել Սանոսյանը երեկ պատասխանել էր նախկին վարչապետ Հրանտ Բագրատյանի հարցադրմանը՝ Սեւանի մակարդակի իջեցման եւ թունելներով Սեւան ջուր բաց թողնելու հետ կապված։ Մարզպետը հայտարարել էր, որ Որոտան-Արփա ջրատար թունելով տարեկան 175 մլն մ³ ջուր պետք է Սեւան տեղափոխվեր, բայց ոչ մի կաթիլ ջուր Որոտանից չի հասել Սեւան։
«Հրապարակը» զրուցեց ԱԺ նախկին Հանրապետական խմբակցության պատգամավոր, Արփա-Սեւան թունելի նախկին տնօրեն Հակոբ Հակոբյանի հետ։ Նրա փոխանցմամբ՝ 1981 թվականից այս կողմ, այսինքն՝ այն ժամանակից, երբ թունելի շինարարությունը շահագործման է հանձնվել, թունելով 6 միլիարդ խորանարդ մետր ջուր է հոսել դեպի Սեւան։ Հիշեցնենք, որ ամեն տարի Սեւանից ոռոգման համար վերցվում է 170 միլիոն խորանարդ մետր ջուր, ինչը մի շարք բնապահպաններ համարում են նոնսենս՝ նշելով, որ ի սկզբանե օրենսդրական մակարդակով ապօրինություն է արվել՝ ֆիքսելով 170 միլիոնը։ Մինչդեռ 55 միլիոն խորանարդից ավելի չէր կարելի։ Ինչեւէ, ըստ Հակոբ Հակոբյանի՝ թունելից ջրի բացթողումները կազմում են միջին տարեկանով 170-200 միլիոն խորանարդ։ Միայն վերջին տարիներին թիվն իջել է՝ հասնելով 140 միլիոն խմ-ի։
Կարծիքներ