Այդպես էլ չկարողացանք գնահատել մեր հզորներին
Այսօր հրապարակել էր Հայաստանի ազգային հավաքական հրավիրված ֆուտբոլիստների ցուցակը, որոնք կմասնակցեն Խորվաթիայի ու Շվեդիայի հետ կայանալիք ընկերական խաղերին։ Զարմանալիորեն հավաքական հրավիրված ֆուտբոլիստների ցանկից բացակայում է նաեւ Հայաստանի հավաքականի առաջատար և ավագ, «Ռոմայում» ոչ պակաս առաջատար Հենրիխ Մխիթարյանը։ Մինչ մամուլում լուրեր էին շրջանառում, թե Մխիթարյանը ինքն է հերթական անգամ ինչ-ինչ պատճառներից ելնելով հրաժարվել միանալ հավաքին, հայազգի աստղը անձամբ է անդրադարձել խնդիրն՝ բացառելով վերոնշյալը։
«Ի զարմանս ինձ, Հայաստանի ազգային հավաքականի մարզչական շտաբից ինձ տեղեկացրել են, որ, ինչ-ինչ պատճառներով ես չեմ հրավիրել առաջիկա ընկերական խաղերին: Տրամադրված պատճառներն ինձ համար համոզիչ չեն: Այնուամենայնիվ, ես կանգնած եմ մեր տղաների կողքին և հաջողություն եմ մաղթում նրանց առաջիկա խաղերում»,- գրել է Մխիթարյանն իր ֆեյսբուքյան էջում։
Համացանցում քննարկումները չեն դադարում Մխիթարյանի՝ հավաքական չհրավիրվելու պատճառների մասին։
Օրինակ Հայաստանի ազգային հավաքականի նախկին կիսապաշտպան Լևոն Պաչաջյանը ֆեյսբուքյան էջում գրել է .
«Հենոյի պարզաբանումը ինձ համար առավել քան հստակ է և հավաստի!
Խնդիրը մարզչական ինչ-ինչ հաշվարկների մեջ է, և ես հակված եմ մտածել, որ Ազգային Հավաքականի ավագը պարտադիր պետք է լինի մեր թիմում: Մարզիչը կարող է հազար ու մի պատճառ բերել նրան չհրավիրելու համար, բայց դրանք այս պահին ոչ մի կերպ ըստ իս արդարացված չեն: Հուսով եմ գալիք պաշտոնական խաղերին Մխիթարյանը կառաջնորդի մեր Հավաքականին դեպի նորանոր հաղթանակներ»,- գրել է Պաչաջյանը։
Հայաստանի ազգային հավաքականի նախկին ֆուտբոլիստ, Հայաստանի Մ-19 հավաքականի նախկին գլխավոր մարզիչ Արթուր Ոսկանյանը ֆեյսբուքյան էջում գրել է.
«Մենք հայ ենք․․․ Մենք այդպես էլ մեր ամբողջ գոյության ընթացքում չկարողացանք ճիշտ գնահատել ՄԵՐ ՀԶՈՐՆԵՐԻՆ․․․»,- գրել է Ոսկանյանը և Հենրիխի հետ լուսանկար հրապարակել։
Հետաքրքիր է, թե ՀՖՖ-ն այս անգամ ինչպես է փորձելու քողարկել Մխիթարյանի ու ֆեդերացիայի ղեկավար կազմի միջեւ եղած բավականին լուրջ տարաձայնությունները, մանավանդ երբ Մխիթարյանը իր գրառմամբ հերքման որևէ հանարավորություն չի թողել։
Կարծիքներ