Ազգային ժողովն իրավունք չուներ որևէ մեկին թույլ տալ օրենքը խախտելով խոսել

ԱԺ նախկին նախագահ Գալուստ Սահակյանը կարծում է, որ ինքն էնպիսի բան չի խոսում հեռախոսով, որ անհանգստանա՝ կգաղտնալսե՞ն, թե՞ ոչ։ Այդ առումով անհանգստանալու կարիք չունի։ Նկատեցինք, որ գաղտնալսման մշակույթը նոր չէ Հայաստանում, իրենց իշխանության օրոք էլ են գաղտնալսել, բայց նա կարծում է, որ իրենց ժամանակ գաղտնալսելը դժվար էր՝ «այդպիսի տեխնոլոգիաներ չկային»։



«Էդ գաղտնալսումներն էս ժամանակի առաջացրած գործոն են։ Դրանից առաջ բոլորս էլ բոլոր տեղերում ամեն ինչ ասում էինք»։



**-Այդ դեպքում Հրանտ Բագրատյանին, Զուրաբյանին, մյուսներին ինչպե՞ս են գաղտնալսել։**



-Դա ոչ թե գաղտնալսում է ինչ-որ ապարատուրայի միջոցով, այլ ինչ-որ տեղ նստած խոսել են, եւ այդ խոսակցությունը տեղում ձայնագրել, ներկայացրել են։



**-Ասում են՝ հնարավոր է Փաշինյան-Սերժ Սարգսյան խոսակցություններն էլ են գաղտնալսվել եւ կարող են հրապարակվել։**



-Տեղյակ չեմ ես, որ նման խոսակցություն է եղել, կամ համատեղ խոսել են։ Կարծում եմ՝ նման խոսակցություններ չեն եղել։



**-Ի՞նչ եք կարծում՝ Հայաստանո՞ւմ են գաղտնալսել, թե՞ դրսի ուժերի մասնակցությամբ։**



-Չեմ կարող դա ասել, հետո՝ խնդիրներն այնպիսին են, որ վերաբերում են միայն Հայաստանին։ Դրսի ուժերին ո՞ւմ պիտի հետաքրքրեր Հայաստանում կատարված եղելությունները։



-**Այդ գաղտնալսումն ի՞նչ տվեց մեզ։**



-Պետությանը մեծ չարիք տվեց։ Սա պետության համար, ասեմ, բավականին լուրջ հետեւանքներ է ունենալու, մեկը նա, որ գաղտնալսում են, որը չէր կարելի, եւ մյուսը՝ այդ գաղտնալսման ժամանակ մոտեցումները, թե մարդկանց ինչպես կարելի է բռնել եւ բանտարկել․․․



-**Բայց դա նորությո՞ւն էր ձեզ համար, ասում են՝ ՀՀԿ-ի օրոք էլ են զանգերով արդարադատություն իրականացրել՝ ում բռնել, ում բաց թողնել։**



-Դա միայն ասում են։ Նման իրավիճակ չենք ունեցել, եւ կարծում եմ՝ ժամանակը կգա, երբ ընդհանրապես չենք ունենա։



-**Նիկոլ Փաշինյանը երեկ ամբիոնից բացատրեց, թե ինչ խոսակցություն է եղել իրականում։ Ձեզ բավարարեցի՞ն նրա պատասխանները։**



-Ես, ճիշտն ասած, չեմ լսել, բայց գիտեմ, որ այդ թույլ տալը օրենքի խստիվ խախտում է, եւ Ազգային ժողովն իրավունք չուներ որեւէ մեկին թույլ տալ օրենքը խախտելով խոսել։ Բայց խոսակցության իմաստը դեռեւս չգիտեմ։



**-Բաբլոյանը, օրենքը խախտելով, երկարացրեց վարչապետի խոսելու ժամանակը, որ հանրությունն ԱԺ ամբիոնից լսի այդ ամենը, ոչ թե հանրահավաքում։ Սա կարո՞ղ է դեմոկրատական մոտեցում դիտվել ձեր կողմից։**



-Օրենք խախտելը դեմոկրատական մոտեցում չի։ Իսկ եթե ինչ-որ մի բան ժողովրդին հաճելի է, թող լինի հաճելի։



**-Փաստորեն, Արա Բաբլոյանն արեց այնպես, որ ժողովրդի՞ն հաճելի լինի։**



-Ես չգիտեմ՝ Արա Բաբլոյանն է արել, ով է արել, ինձ ասացին, որ ժամանակ տվեցին, ինքը երկար ու երկար խոսեց, որը ես ասացի՝ օրենք է խախտել։



-**Դուք չէի՞ք տրամադրի այդ ժամանակը։**



-Չէ, իհարկե, երբեւիցե չի եղել, որ ես տրամադրեմ։



**Վահե ՄԱԿԱՐՅԱՆ**