Ես իշխանությունների հետ երբեւէ գործ չեմ ունեցել
hraparak
16 Փետրվար 2011 | 12:15
0
Երեկ Ժողովրդական կուսակցության համաժողովից հետո Տիգրան Կարապետյանը պատասխանեց լրագրողների հարցերին:- Պարոն Կարապետյան, համաժողովին քաղաքական այլ ուժերի ներկայացուցիչների չե՞ք հրավիրել:
- Ո՞ւմ նկատի ունեք: ՀԱԿ-ի՞ն, որ ամեն տեղ ման ա գալիս ու մեզ վարկաբեկում ա: Ո՞ւմ հրավիրեինք:
- Մամուլում հրապարակում կար, որ Դուք հանդիպել եւ զրուցել եք «Բարգավաճ Հայաստան» կուսակցության առաջնորդ Գագիկ Ծառուկյանի հետ:
- Այդպիսի բան չկա ընդհանրապես: Ես կոալիցիոն կուսակցությունների հետ ընդհանրապես չեմ հանդիպում: Ծառուկյանի հետ մի տարի առաջ եմ հանդիպել: Նոր տարվա դահլիճում: Մեր մեջ կապ չկա:
- Մամուլում նաեւ գրվել էր, որ Գյումրիում Վարդան Ղուկասյանի հետ եք հանդիպել եւ միասին կերուխումի եք մասնակցել: Նրա հետ էլ չեք հանդիպե՞լ:
- Աստված վկա, որ չեմ հանդիպել: Ով որ գրել ա, ով որ հանդիպել ա՝ Աստված թող նրան պատժի: Ես իշխանավորների հետ ընդհանրապես գործ չունեմ եւ չեմ էլ ունեցել երբեւէ, 10 տարվա ընթացքում: ...Իշխանությունը չի լինում նախկին եւ այսօրվա: Իշխանությունը միշտ ստոր է եղել եւ ստոր էլ կլինի: Եվ մենք տեսնում ենք այդ ստորությունները:
- ՀԱԿ-ի հետ համագործակցությունը հնարավոր համարո՞ւմ եք:
- ՀԱԿ-ի հետ՝ այո, իսկ ՀՀՇ-ի հետ՝ ոչ: Ընդդիմադիր յուրաքանչյուր ուժի հետ պատրաստ ենք համագործակցելու, բայց ոչ այն ուժերի, որոնք ձգտում են վարկաբեկել մեզ, վարկաբեկող թռուցիկներ են բաժանում:
- Ո՞ւմ նկատի ունեք: Ո՞ւմ թռուցիկներն են Ձեզ վարկաբեկում:
- Օրինակ ՀՀՇ-ի թերթը, էդ թռուցիկը, որ կա: Ինչպես նաեւ որոշ թերթեր:
- Պարոն Կարապետյան, կարծիք կա, որ Դուք իշխանությունների պրոյեկտն եք եւ ներդրվել եք ընդդիմադիր դաշտը տարանջատելու համար: Այդ մասին ի՞նչ կասեք:
- Եթե իշխանության պրոյեկտ լինեինք, ապա ճանապարհները բաց կլինեին եւ ստեղ էսօր իշխանությունները մարդ կբերեին, ոնց որ ասում էր ՀԱԿ-ը: Բա ո՞ւր ա էդ ժողովուրդը:
- Իսկ առաջիկայում ի՞նչ պլաններ ունեք: Ինչպե՞ս եք պատկերացնում Ձեր հետագա պայքարը ընդդիմադիր դաշտում:
- Մենք պայքարում ենք արդեն: Բոլոր գործողությունները կատարելու ենք՝ հանրահավաքներ, պիկետներ, երթեր:
Կարծիքներ