Վերահսկիչ պալատի նախագահի ընտրության վերաբերյալ Լևոն Զուրաբյանի ելույթը ՀԱԿ խմբակցության անունից

Մենք արդեն երկար տարիներ հետևում ենք Վերահսկիչ պալատի գործունեությանը և պետք է հանուն ճշմարտության արձանագրենք, որ Իշխան Զաքարյանի ղեկավարության օրոք պատրաստված նյութերը լուրջ աշխատանք են և պարունակում են բացահայտումներ և բավական լուրջ փաստեր չարաշահումների, պետական բյուջեի վատնումների և մսխումների մասին: Ընդ որում դրանք ցույցեն տալիս, որ չարաշահումները և կոռուպցիան կրում են համակարգային բնույթ, բայց նաև տրվել են շատ կոնկրետ գործերով կամ դրվագներով բավականին մեծ աղմուկ հանած բացահայտումներ:

Մենք օգտագործել ենք ՎՊ զեկույցները տարբեր փաստաթղթերում, սկսած «Արտահերթ նախագահ. և խորհրդարանական ընտրությունների անցկացման և լեգիտիմ իշխանության ձևավորման անհրաժեշտության հիմնավորում» փաստաթղթից, որ ներկայացրել ենք երկխոսության ժամանակ: Ավելին, այն ժամանակ շնորհիվ ՎՊ զեկույցների, մենք կարողացանք անգամ տալ պետական միջոցների թալանի հետ կապված ամփոփ պատկերը, և անգամ հանդես գալ գնահատականներով, որ տարեկան թալանվում է կես միլիարդ դոլար: Սակայն, մենք նկատել ենք, որ այնուհետև ՎՊ զեկույցներից հեռացվել են այնպիսի ձևակերպումներ, որ կարող էին ընդհանրական քանական գնահատականներ տալ:

Ակնհայտ է, որ իշխող մեծամասնության ճնշումների պատճառով դուք հրաժարվել եք այնպիսի եզրակացությունների հրապարակումից, որ կարող են կոպիտ ասած՝ ընդդիմության բերանը երկար լեզու դնել: Ավելին, ինչպես ես արդեն ասացի, անցյալ զեկույցի քննարկումներից հետո տեղի ունեցավ հայտնի խորհրդակցությունը, որի ընթացքում Սերժ Սարգսյանը, խախտելով ձեր ղեկավարած մարմնի անկախությունը, հրապարակային բացահայտ ճնշումներ գործադրեց ձեզ վրա և անգամ ցուցումներ տվեց, թե ինչպես պետք է դատախազությունն արձագանքի ՎՊ զեկույցներում տեղ գտած բացահայտումներին:

Եվ ուրեմն՝ ընդունելով, որ կոռուպցիայի մեջ թաղված պետական մարմինների ֆոնի վրա ՎՊ-ն առանձնանում է այնպիսի աշխատանքով, որ ըստ էության, նպաստում է նույն այդ կոռուպցիայի բացահայտմանը, մենք այնուամենայնիվ, արձանագրում ենք հետևյալ իրողությունները.

Առաջին՝ Իշխան Զաքարյանի թեկնածությունը ներկայացված է Սերժ Սարգսյանի կողմից, որի գործունեության մեջ մենք ոչ միայն չենք տեսնում կոռուպցիայի դեմ պայքարի որևէ նշույլ, օրինակ՝ իմ հարցում նշված օլիգարխներին հարկեր մուծել տալու ուղղությամբ /ի դեպ, նշելով ռեժիմի կողմից ապօրինաբար հովանավորվող և ապօրինի արտոնություններով օգտվող Սամվել Ալեքսանյանի, Բարսեղ Բեգլարյանի, Գագիկ Խաչատրյանի անունները, ես ուղղակի մոռացա տալ նաև հենց գործող նախագահի այնպիսի ազգականների անուններ, ինչպիսիք են նրա եղբայր Սաշիկ միգուցե Ալեքսանդր Սարգսյանի և նրա փեսա Միքայել Մինասյանի անունները/, այլև համարում ենք, որ ինքն ուղղակիորեն ղեկավարում է կոռուպցիոն այս բուրգը և նրա բոլոր նշանակումները դիտարկում ենք հենց այս կոնտեքստում:

Երկրորդ՝ մենք որևէ երաշխիք չունենք, հետևաբար, որ ձեր վերանշանակումը չի կատարվում այն պայմաններով, որ դուք այսուհետև շատ ավելի կաշկանդված ուսումնասիրություններ կանցկացնեք: Ընդ որում, ցանկանում եմ ձեզ հենց հիմա հավաստիացնել, որ մենք որևէ նախապաշարմունք չունենք, և եթե ակնկալիքը չարդարանա, մենք առաջինը օբյեկտիվորեն կնշենք ձեր ապագա զեկույցների արդյունավետությունը: Ուստի, Հայ Ազգային Կոնգրես խմբակցությունը որոշում է ընդունել, որ մենք դեմ ենք Սերժ Սարգսյանի ներկայացրած թեկնածությանը, ինչն առաջին հերթին պետք է ընկալեք որպես վերաբերմունք մեր կողմից մերժվող բուրգային կոռուպցիայի համակարգին:

Միևնույն ժամանակ ես ցանկանում եմ մեր խմբակցության անունից անել կարևոր մի հայտարարություն՝ առաջիկա քվեարկության մասին:

Մի քանի շաբաթ առաջ տեղի ունեցավ գլխավոր դատախազի թեկնածուի քվեարկություն: Մեղադրանքներ հնչեցին, թե որոշ ընդդիմադիրներ հրապարակավ հայտարարելով, որ դեմ են և հրապարակավ քննադատելով Գագիկ Կոստանյանին, այնուամենայնիվ, կողմ են քվեարկել:

Որևէ իրողություն գնահատելիս ես առաջնորդվում եմ պարզ տրամաբանությամբ:

Կարելի է հասկանալ, որ հնարավոր է հրապարակայնորեն ասել, որ կողմ ես, բայց թաքուն դեմ քվեարկել: Փակ քվեարկությունները ստեղծված են հենց դրա համար, որ մարդիկ կարողանան ազատորեն դեմ քվեարկել այն դեպքերում, երբ նրանց նկատմամբ հնարավոր են ճնշումներ:

Բայց պետք է իսկապես շատ աղճատված տրամաբանություն ունենալ պնդելու համար, որ հնարավոր է հակառակը: Այսինքն, որ հրապարակավ դեմ արտահայտվողը կարող է թաքուն կողմ քվեարկել մի վիճակում, երբ պարզ է, որ ներկայացված թեկնածուն հաստատվելու է ջախջախիչ մեծամասնությամբ: Այս առումով ես որևէ կասկած չեմ ընծայում հրապարակայնորեն հնչած բոլոր հավաստիացումներին և հավատում եմ և Ալիկ Արզումանյանին, և Ռուբիկ Հակոբյանին, և Նիկոլ Փաշինյանին, և Հրանտ Բագրատյանին, և Լյուդմիլա Սարգսյանին, և Գագիկ Ջհանգիրյանին, և Արամ Մանուկյանին, և Ստեփան Դեմիրճյանին, երբ նրանք հրապարակավ պնդում են, որ քվեարկել են Գ.Կոստանյանի թեկնածության դեմ:

Միակ բացատրությունն այն իրողությանը, որ դեմ քվեաթերթիկների թիվը կազմել է 3 կամ 4, դա այն է, որ տեղի է ունեցել խայտառակ կեղծարարություն՝ հենց ԱԺ պատերում, որի միակ նպատակը եղել է ընդդիմության վարկաբեկումը և ընդդիմության մեջ փոխադարձ մեղադրանքների հրահրումը:

Ուստի, մենք որոշում ենք ընդունել չմասնակցելու կեղծարարության այս ֆարսին, որպեսզի ՀՀԿ-ական կեղծարարները չստանան նորից մի հնարավորություն՝ ընդդիմության դեմ կեղտոտ խաղ խաղալու: