Այնպիսի պատիժ պետք է տալ, որ պատժվողը երանի տա ականջները կտրած շան թուլին

Երկրում ահագնացած քաղաքական բռնության ալիքի եւ քաղաքական այլախոհների դեմ սկսված մարդաորսից հետո իշխանական օրենսդիրները երեկ մի ուրիշ կարգի խելոքացել էին եւ աշխատում էին հնարավորինս հեռու մնալ լրագրողներից, հավանաբար, որպեսզի իրենց «փայ» ականջները չկտրվեին՝ Սերժ Սարգսյանի ու իշխանությունների հասցեին սխալ արտահայտությունների համար, ընդհանրապես ողջ օրվա ընթացքում ՀՀԿ-ի «խրամատները» դատարկ էին, տեղերում մնացել էին ՀՀԿ-ի «հրաձիգները»: Զրուցեցինք նրանցից մեկի՝ ՀՀԿ խմբակցության քարտուղար Գագիկ Մելիքյանի հետ:

- Ինչո՞վ կպայմանավորեք վերջին օրերին ահանգնացած բռնության ալիքը:
- Իսկ ո՞վ է ասում, որ բռնության ալիք կա. ամեն մարդ պետք է տեսնի, թե իր նկատմամբ ինչու է նման գործողություն իրականացվում:
- Իսկ Դուք ի՞նչ եք տեսնում՝ անձնակա՞ն դրդապատճառներ:
- Ես կարծում եմ, որ զուտ անձնական խնդիրներ են:
- Այսինքն, բոլորը միաժամանակ անձնական խնդիրնե՞ր ունեցան նույն ժամանակահատվածում:

- Ես չեմ կարող ասել, քննություն է գնում, կիմանանք շուտով:
- Ազատամարտիկների բռնության հետ առնչվող Լեւոն Երանոսյանի, Արամ Մանուկյանի ծեծի հետ առնչվող Առաքել Մովսիսյանի հայտարարություններն այդ դեպքում ինչպե՞ս կբացատրեք: Բացահայտ ասացին, որ Սերժ Սարգսյանի դեմ ցանկացած խոսք անպատիժ չի մնալու:
- Ցանկացած դեմ խոսք ցանկացած քաղաքացու, այդ թվում նաեւ ՀՀ նախագահի նկատմամբ, օրենքով սահմանված կարգով պետք է պատիժ ստանա, եւ կարծում եմ, որ այնպիսի պատիժ պետք է ստանա, որ պատժվողը նույնիսկ երանի տա ականջները կտրված շան թուլին:
- Հիմա բռնություն է կիրառվել, եւ հետքերը տանում են դեպի իշխանություն:
- Ես չգիտեմ, քննություն է կիրառվում, իրավապահները կպարզեն, թե իրականում ինչ խնդիր է տեղի ունեցել: Համենայնդեպս, դա իշխանություններին ձեռնտու վիճակ չէ, հակառակը՝ դա ձեռնտու է ընդդիմությանը, որպեսզի ցեխ շպրտեն իշխանության վրա:

ՀՀԿ-ական պատգամավոր Վարդան Այվազյանը դատապարտում է ցանկացած բռնություն եւ համարում, որ վերջին հաշվով բոլորս ենք պատասխանատու, բայց ոչ իշխանականների համոզմունքը, թե կատարվածը քաղաքական հողի վրա է, չի ընդունում. «Դա պրիմիտիվ դաշտից է: Օրինակ ի՞նչ խնդիր ունի Երանոսյանը կամ մյուսը, որ նման բան անի, բացարձակ»: Այվազյանին հիշեցրինք Երանոսյանի, Շմայսի հայտարարությունները՝ նկատելով, որ խնդիր կա: Բայց ՀՀԿ-ական պատգամավորը նորից կրկնեց, որ դա «պրիմիտիվ դաշտից» է:

- Հնարավո՞ր է եռյակի՝ համաժողովրդական շարժումը կանխելու նպատակով իշխանությունները վախի մթնոլորտ են ուզում ստեղծել:
- Չե՞ս տեսնում՝ ես վախից կուչ եմ եկել, էնքան ենք վախեցել: Հիմա էդ մարդը որ եկել է Ռուսաստանից ու Արամ Մանուկյանին հարվածել, իշխանությունը Ռուսաստանից իրեն բերել է, որ Արամ Մանուկյանին հարվածե՞ր:
- Իսկ ո՞ւմ համար էր «հայրենասիրական ապտակ» տալիս Մանուկյանին, ինչպես ինքն է հայտարարել իրավապահներին:
- Այսինքն դա նշանակում է, որ իշխանության կողմից է, հա՞, սադրած:

ԲՀԿ-ական պատգամավոր Վահագն Մախսուդյան
- Պարոն Մախսուդյան, իշխանության ներկայացուցիչներն ասում են՝ «պրիմիտիվ» է այն վարկածը, որ իշխանությունն է բռնություն գործադրում Սերժ Սարգսյանի հասցեին քննադատությունների համար: Դուք կիսո՞ւմ եք այդ վարկածը:
- Ես չգիտեմ, ի՞նչ իմանամ, կարող է հորինել են, սկի Սերժ Սարգսյանի անունն էլ չի տվել, ինչի՞ մասին է խոսքը:
- Ո՞վ է հորինել:
- Ծեծողները, որ իբր դրա համար են ծեծել:
- Լեւոն Զուրաբյանը եւ ՀԱԿ մյուս ներկայացուցիչները նույնպիսի հայտարարություններ են արել:

- Դե ծեծողն էլ ասել է, որ հայրենասիրական ապտակ եմ տվել, թող պարզեն, ի՞նչ ասեմ:
Մի բան գիտեմ, որ իշխանություններն էսօր ուզում են ցույց տալ, որ տեսեք՝ բոլորդ էս օրին կընկնեք, մեզանից չխոսեք:
- Բայց դուք հիմա չեք էլ խոսում, հանրահավաքներ էլ չեք անում, շարժման ապագան էլ անորոշ է, ինչո՞վ եք վտանգ ներկայացնում:
- Նրանք վտանգը հեռուն են տեսնում, մենք օրինական կարգով ուզում ենք երկրի վիճակը փոխենք, կարգերը փոխենք, որ ժողովուրդը շնչի: Դոլարը հասավ 500-ի:
- Իսկ չե՞ք կարծում, որ հենց հիմա շատ նպաստավոր պայմաններ կան շարժումն առաջ տանելու, մարդկանց դժգոհությունն առանց այն էլ մեծ է, ինչո՞ւ չեք ակտիվանում, եթե իսկապես փոխել եք ուզում:

- Հիմա որոշում չունենք, ես էդ մասին չեմ կարող խոսել: Հիմա էլ Նոր տարի է, ժողովրդին ի՞նչ բերենք: Մենք հաստատակամ ենք, իսկ իշխանությունը մտածում է այդ մասին: Հիմա քանի որ ազատամարտիկներն էլ են մերը, իրենք ուզում են այսպես ասել՝ «Փարչիկ, քեզ կասեմ, կժիկ, դու լսի»:
- Իսկ հնարավոր համարո՞ւմ եք, որ ԲՀԿ-ականների նկատմամբ էլ կիրառվի բռնություն:
- Կարող ա, ի՞նչ ասեմ: