Վերջում քիչ խոսեք, լավ չե՞ք հասկանում. Վարչապետը բարկացավ Արփինե Հովհաննիսյանին չլսողների վրա
Արդարադատության նախարար Արփինե Հովհաննիսյանն այսօր՝ նոյեմբերի 19-ին, Կառավարության նիստում առաջարկեց մերժել պատգամավոր Տիգրան Ուրիխանյանի առաջարկը՝ ընտրական տեղամասերը Հայաստանի օրհներգով բացելու եւ փակելու վերաբերյալ:
Առարկությունը հետեւյալն է՝ «ՀՀ Օրհներգի մասին» օրենքը սահմանում է, որ այն պետք է հնչի առավել կարեւոր իրադարձությունների ժամանակ, երբ ներկա են երկրի առաջին դեմքերը, այլ պետությունների ղեկավարներ, բարձրաստիճան հյուրեր, իսկ տեղամասային կենտրոնների բացումը նման դեպքերից չէ: Դրանից բացի՝ տեղամասային կենտրոնները բացվում են ժամը 8.00-ին եւ փակվում 20.00-ին, իսկ ընտրատարածքային հանձնաժողովները սկսում են իրենց աշխատանքը ժամը 07.00-ին, իսկ 20.00-ից հետո բոլոր տեղամասերում և հանձնաժողովներում դեռ ձայների հաշվարկ է կատարվում, իսկ այդքան անգամ հիմն հնչեցնելն աննպատակահարմար է:
Մյուս նախագծով Արփինե Հովհաննիսյանը առաջարկեց 20 միավորով ավելացնել ԴԱՀԿ-ի ծառայողական մեքենաները: Այժմ ԴԱՀԿ-ն տրամադրության տակ ունի 34 մեքենա, ինչը բավարար չէ եւ, Արփինե Հովհաննիսյանի խոսքով, վերջին շրջանում ԴԱՀԿ-ի ծանրաբեռնվածությունը 6 անգամ ավելացել է: Ըստ նրա ՝ ԴԱՀԿ աշխատողների աշխատանքը ծախսատար է, եւ այդ մեքենաները ոչ թե մեկ անձին է տրամադրվում, այլ հատկացվում են ծառայությանը արդյունավետ գործելու համար։
Նա վստահեցրեց, որ սա նպատակահարմար ծախս է, իսկ Կառավարությունը հավատաց ու հաստատեց: Նիստի ժամանակ վարչապետը բարկացավ այն նախարարների վրա, ովքեր լավ չէին լսում Արփինե Հովհաննիսյանին ու կոպիտ դիտողություն արեց․ «Վերջում քիչ խոսեք, լավ չե՞ք հասկանում»:
Կարծիքներ