Թող ավելի լավ կադրեր գան խորհրդարան, քան մենք ենք

Նախընտրական աժիոտաժը` սահմանադրական փոփոխություններով պայմանավորված, սպասվածից շուտ է սկսվել, գրեթե բոլորը քաղաքական նոր հեռանկարների եւ 2017-ի խորհրդարանում տեղի փնտրտուքների մեջ են: Հատկապես մեծամասնական ընտրակարգից հրաժարումը եւ ընտրատարածքների խոշորացումը բարդացնելու են օրենսդրական գործունեությամբ չփայլող, մանդատը սեփական շահերին ծառայեցնողների հարցը: Հիմիկվանից բոլորը նորից «դաբրո» ստանալու «տասովկեքի» մեջ են: Ապարանի թիվ 14 ընտրատարածքից մանդատ վերցրած ՀՀԿ-ական Վրեժ Մարկոսյանը գրեթե համակերպվել է հաջորդ խորհրդարանում չլինելու մտքին եւ պատրաստ է աջակցել մեկ այլ ոչ անհայտ ապարանցու թեկնածությանը: Lուրեր կան, որ Սամվել Ալեքսանյանն այս անգամ Ապարանից է առաջադրվելու, իսկ Մալաթիայում աշխատելու է իր փեսա Կորյուն Նահապետյանի համար:

- Պարոն Մարկոսյան, Ձեր պաշտպանած նոր Սահմանադրությունը, փաստորեն, անցանկալի է համարում մեծամասնական ընտրակարգը, որը հիմնականում ծառայել է ՀՀԿ-ականներին: Ի՞նչ եք անելու հաջորդ ընտրություններին:

- Նորմալ է, եթե այդպես են որոշել, ժամանակը կգա՝ կորոշենք:

- Համաձա՞յն եք, որ անարդյունավետ ընտրակարգ է, եւ, որպես կանոն, մեծամասնականով ընտրվածները չեն փայլում օրենսդրական գործունեությամբ:

- Ճիշտ ա:

- Դուք Ձեր փորձի՞ց եք ասում:

- Այո:

- Փաստորեն, չեք աշխատել այս տարիներին:

- Հնարավորինս աշխատել եմ, ինչքան հնարավորություն է եղել, բայց թող ավելի լավ կադրեր գան, քան մենք:

- Մեծամասնականով ընտրված պատգամավորների ներկայությունը, այսինքն, անիմա՞ստ է:

- Անիմաստ չէ, բայց շատ դրական չէ:

- Իսկ Ձեզ ինչո՞ւ էր պետք մանդատը:

- Չեմ պատասխանի:

- Հավատո՞ւմ եք, որ իշխանությունն ամբողջովին կազատվի կոճակ սեղմողներից, մականունավորներից:

- Լավ կլինի, հաջորդ խորհրդարանն ավելի լավ կլինի:

- Բայց «արտոնյալներն» էլի կլինեն, օրինակ՝ Ապարանից ասում են, Սամվել Ալեքսանյանին են բերելու:

- Ավելի լավ:

- Փաստորեն, ինքն ավելի լա՞վ պատգամավոր է, քան Դուք:
(Ծիծաղում է եւ չի պատասխանում):

- Չե՞ք խանդում, որ նրան են նախապատվություն տալու:

- Չեմ խանդում, իմ համերկրացին է, իրա համար կաշխատենք:

- ՀՀԿ-ն կոալիցիայի առաջարկ է արել Դաշնակցությանը, կո՞ղմ եք համագործակցությանը:

- Նորմալ եմ վերաբերվում, ինչքան շատ լինի կոալիցիան տարբեր կուսակցությունների հետ, այնքան լավ կլինի երկրի համար, ժողովրդին ավելի մոտ կլինի:

- Երեկ ՀՅԴ-ից իշխանության հեղինակազրկված լինելու մասին հայտարարություն հնչեց, կիսո՞ւմ եք այդ տեսակետը:

- Ես համամիտ չեմ այդ գնահատականի հետ:

- Ասել են, որ կոալիցիա են կազմելու, որ իշխանության որակը բարձրացնեն-փոխեն:

- Դե թող գան՝ կտեսնենք:

- Դուք պատրա՞ստ եք ՀՅԴ-ի օգնությամբ դաստիարակվելու, փոխվելու, նրանց կհաջողվի՞ ձեր հեղինակությունը բարձրացնել:

- Չեմ կարող ասել, մինչեւ չլինի:

- Փաստորեն ընդունում եք, որ իշխանությունը հեղինակազրկված է:

- Ոչ, հաստատ ոչ:

- Այդ դեպքում ինչպե՞ս եք պատրաստվում ձեզ «պախարակող» ուժի հետ կոալիցիա կազմել:

- Դե, որովհետեւ կբերեն նոր գաղափարներ, նոր ուժ՝ ժողովրդին ի նպաստ, կարող է մարդիկ մի գաղտնիք ունեն, որ չեն բացահայտել մինչեւ հիմա: