Սերժ Սարգսյանի համար «կարված կոստյումից» ազատվելո՞ւ եք, թե՞ ոչ

Ինչպես հայտնի է՝ իշխանությունը նախաձեռնել է սահմանադրական փոփոխություններ իրականացնել, որը մշակող մասնագիտական հանձնաժողովը դեռ ձեւավորման փուլում է, հավանաբար, մեկ ամսվա ընթացքում կազմը պատրաստ կինի։

Արդարադատության նախարար Ռուստամ Բադասյանի կարծիքով՝ փոփոխությունների շրջանակում քննարկվելու է դատական մարմինների, այդ թվում՝ ՍԴ-ի, ԲԴԽ-ի, վճռաբեկ դատարանի հանդեպ հանրության վստահության վերականգնման հարցը, որով հույս ունեն լուծել նաեւ ՍԴ-ի շուրջ առաջացած «ճգնաժամը», որը ՍԴ դատավորները եւ մի շարք իրավաբաններ բնավ էլ ճգնաժամ չեն համարում։ Բադասյանը նաեւ մեր հարցին, թե այդ փոփոխություններով վերադարձ կիսանախագահական մոդելին հնարավո՞ր է, ասաց․ «Կարծում եմ՝ ոչ, այդ հարցը չպետք է քննարկվի»։

ԱԺ իշխող «Իմ քայլը» խմբակցության ղեկավար Լիլիթ Մակունցը համաձայն է Բադասյանի հետ դատաիրավական համակարգի մասով՝ համարելով, որ սահմանադրական փոփոխությունների փաթեթը քննարկելիս իրենց ուշադրության կենտրոնում պետք է լինի հենց դատաիրավական համակարգը։

- Տիկին Մակունց, կարո՞ղ ենք ասել, որ ՍԴ անդամների վաղ կենսաթոշակի անցնելու մասին օրենքը, որն ընդունեց խորհրդարանը՝ իբրեւ ՍԴ-ում առաջացած ճգնաժամը լուծելու նպատակով, չաշխատեց, եւ հիմա սահմանադրական փոփոխություններով եք փորձում լուծել այդ «ճգնաժամը»։

- Մենք, եթե հիշում եք, առիթ ունեցել ենք խոսելու այս մասին, եւ նշել եմ, որ վաղաժամ կենսաթոշակի գնալու գաղափարը, նախ այդ ինստիտուտը կար նախկինում, բայց այն առաջարկները, որոնք մենք ներկայացնում էինք, ոչ թե միտում ունեին լուծել Սահմանադրական դատարանի շուրջ ստեղծված վստահության ճգնաժամը, այլ միտում ունեին ընդառաջ քայլ անել եւ հնարավորություն տալ նաեւ դատարանին եւ դատավորներին՝ ընդառաջ գնալ մեր նախաձեռնությանը։ Բայց, իհարկե, մենք երբեւէ չենք նշել, որ դա լուծելու է որեւէ վստահության ճգնաժամ։

- Ամեն դեպքում, դուք այդ խնդիրը դրե՞լ եք ձեր առջեւ, որ սահմանադրական փոփոխություններով վերջապես ձերբազատվեք Հրայր Թովմասյանից ու նրա ղեկավարած Սահմանադրական դատարանից։

- Մեր դատաիրավական համակարգում բարեփոխումներ իրականացնելու մղումները երբեք միտված չեն եղել անձերի նկատմամբ, ես չեմ ուզում, որ որեւէ կերպ թիրախավորենք անձերը։ Էստեղ մենք ավելի շատ բովանդակային քննարկման անհրաժեշտություն ունենք, եւ աշխատանքային խումբը, որը քննարկելու է փոփոխությունների փաթեթը, կտեսնենք, թե իրենք ինչ խնդիրներ կառաջադրեն։

- Պարզապես տպավորություն է, թե սահմանադրական փոփոխությունները վերջին շանսն են՝ ազատվելու գործող ՍԴ-ից։

- Սահմանադրական փոփոխությունները միտում ունեն կարգավորելու եւ ամբողջականացնելու այն բարեփոխումների օրակարգը դատաիրավական համակարգում, որն ունի այսօր իր առջեւ դրած մեր քաղաքական թիմը։

- Արդարադատության նախարարի համար դեռ պարզ չէ, թե ինչ ասել է սուպերվարչապետական համակարգ։ Ձեզ համար պա՞րզ է, թե սուպերվարչապետականը որն է։

- Կարող ենք ունենալ տարբեր տեսակետներ, եւ ես իսկապես կարեւորում եմ, որ բոլորս սկսենք խոսել այս մասին, թե ինչ նկատի ունենք, ինչ վտանգներ ենք տեսնում՝ անվանելով որեւէ համակարգ սուպերվարչապետական, եւ ինչ մոտեցումներ եւ լուծման տարբերակներ ունենք թե՛ ինստիտուցիոնալ մակարդակում, օրենքների շրջանակներում եւ թե՛ քաղաքական կամք դրսեւորելու եւ դա ավանդույթ դարձնելու առումով։

- Այդ փոփոխությունների արդյունքում վերադարձ կիսանախագահական համակարգին հնարավո՞ր է, թե՞ ոչ։

- Մենք հիմա նոր սկսել ենք աշխատել, ապրել խորհրդարանական հանրապետությունում, որտեղ դեռ չգիտենք՝ այս մոդելն արդյունավե՞տ է, թե՞ ոչ։ Անձամբ ես իսկապես չգիտեմ։ Մենք դեռ փորձում ենք բարձրացնել խորհրդարանի դերը, պատգամավորների դերը։ Եվ այս պահին, եթե Դուք ինձ հարցնեք, ես չգիտեմ՝ նպատակահարմարությունը կա՞, թե՞ ոչ։ Դրա համար հակված եմ մտածելու, որ այս պահին չկա։ Այս պահին իմ մոտեցումն այն է, որ դրա անհրաժեշտությունը ես այս պահին չեմ տեսնում։

- Տեսակետ կա, որ Նիկոլ Փաշինյանը մտադիր է կիսանախագահական համակարգին վերադառնալ, որպեսզի ավելի ուժեղ իշխանություն իր ձեռքում ունենա, խոսվում է նաեւ Լեւոն Տեր-Պետրոսյանի վերադարձի մասին։

- Տարբեր վարկածներ են հնչում, ես չեմ կարող որեւէ կերպ հաստատել դա, որովհետեւ դա իրականությանը չհամապատասխանող թեզ է, վարկած է, մենք նման քննարկում չենք ունեցել։

- Տիկին Մակունց, ձեր քաղաքական թիմը նպատակ ունի՞ Նիկոլ Փաշինյանին ազատել Սերժ Սարգսյանի համար «կարած կոստյումից»։

- Այն, ինչ ես նկատի ունեցել եմ եւ նկատի ունեմ, թե ինչպիսի մոտեցում պիտի ունենանք նման համակարգ չունենալու համար, ես քիչ առաջ շարադրեցի եւ կարեւորում եմ երկու ուղղություններով աշխատելը՝ թե՛ ինստիտուցիոնալ, օրենսդրական եւ իրավական գործիքակազմ կիրառելով եւ թե՛, միաժամանակ, քաղաքական կամք դրսեւորելով։

- Հիմա այդ «կոստյումից» ազատվելու խնդիր դրե՞լ եք, թե՞ ոչ։

- Ես արդեն պատասխանեցի Ձեր հարցին։