Մեր երեխեքն էլ երևանցի երեխեքից պակաս չեն․Գյումրու ավագանին նախորդ տարվանից շատ գումար հատկացրեց ամանորյա ծախսերի համար
![Մեր երեխեքն էլ երևանցի երեխեքից պակաս չեն․Գյումրու ավագանին նախորդ տարվանից շատ գումար հատկացրեց ամանորյա ծախսերի համար](https://hraparak.am/uploads/images/image_750x_61aa0d997bf71.jpg)
Այսօր Գյումրու ավագանու հերթական նիստին ընդունվեց ամանորյա միջոցառումների համար նախատեսված ծախսերի որոշումը: 2022-ը դիմավորելու համար Գյումրու բյուջեից կհատկացվի 10 մլն 400 հզր․դրամ, որից 5 մլնը կհատկացվի հրապարակի գլխավոր տոնածառը տեղադրելուն, 3 մլն-ը կծախսվի ամանորյա պարկեր ձեռք բերելու համար, 900 հզր-ը՝ լույսերի վառման, 600 հզրը՝ հյուրասիրության նպատակով: Համայնքապետարանի ֆինանսական բաժնի պետ Լենա Ջիլավյանը մինչ որոշման նախագիծը զեկուցելը, ընդգծեց․« Չեմ ասում՝ շքեղ պիտի տոնենք, բայց համեստ լինելու է: Երեկ տեսա, որ Երևանը տոնածառ է դնելու հրապարակում, մեր երեխեքն էլ երևանցի երեխեքից պակաս չեն, ուրախ եմ, որ մենք էլ պիտի տոնածառ դնենք: Ճիշտ է, մահը՝ մահ, բայց երեխեքի ուրախությունն էլ՝ ուրախություն:
10 մլն-ից քաղաքի որոշակի փողոցների դեկորային գեղեցկություն կհաղորդվի, ֆուրշետ դահլիճում մեր աշխատակիցներին ու ավագանիներին հյուրասիրություն կարվի»,-ասաց ֆինանսական բաժնի պետը:
Հենց այստեղ ավագանու անդամ Վարդևան Հակոբյանը նկատեց, որ Երևանում հյուրասիրությունից եւ լուսավորությունից հրաժարվեցին, որոշում կայացվեց տեղադրել միայն գլխավոր տոնածառը: Տիկին Ջիլավյանն հակադարձեց .«Մեր ավագանիների ու ընտրված քաղաքապետի առաջին նոր տարին է․․․, մի տարի միայն բարի լույս ու ցտեսություն ենք ասել իրար, 600 հզր դրամն ինչ է էսքան կոլեկտիվի համար»: Ավագանու անդամն էլ իր հերթին համառեց․ «Ես էսքան կոլեկտիվին ավելի լավ առաջարկ ունեմ․․․»:
Նշենք, որ ավագանու անդամները նկատեցին, որ 2019 թ-ին ամանորյա ծախսերի համար բյուջեից հատկացվել էր 7 մլն․ դրամ, որը 3 մլն-ով պակաս էր այս տարվանից, այն դեպքում, երբ այս տարի անգամ հրավառություն նախատեսված չէ, որի արժեքը 1մլն դրամ է: Հիշեցնենք, որ 2020-ին համայնքի բյուջեից ընդհանրապես գումար չհատկացվեց, քանի որ Ամանորը հասկանալի պատճառներով ողջ Հանրապետությունը չտոնեց:
Այս տարվա ծախսերի ավելացումն էլ պատճառաբանվեց, որ ձայնային տեխնիկան Երևանից է բերվելու, ինչպես նաև որոշ դեկորներ շարքից դուրս են եկել, քանի որ անցյալ տարի դրանք չեն օգտագործվել:
Ի դեպ, ավագանու անդամաներից մեկն էլ դեմ արտահայտվեց քաղաքի լուսավորության համար գումար խնայելուն՝ համարելով, որ Գյումրին տուրիստական քաղաք է, եւ ամանորյա դեկորները քաղաքն էլ ավելի գրավիչ են դարձնելու:
Կարծիքներ