Ադրբեջանցի պատգամավորները «հարձակվել են» իրենց գործընկերոջ վրա

Անցյալ շաբաթ ադրբեջանցի «փորձառու» (2005 թվականից) պատգամավոր Վահիդ Ահմեդովը ընդդիմադիր բլոգեր Մեհման Հուսեյնովին տված հարցազրույցում կտրուկ քննադատել է երկրի սոցիալ-տնտեսական իրավիճակը։ 

Նա, մասնավորապես, հայտարարել է, որ Ադրբեջանում բնակչության սոցիալական վիճակն այնքան էլ լավ չէ, շրջաններում մեծ գործազրկություն կա, «մարդիկ փախչում են Բաքու մի կտոր հացի համար», թոշակների, նպաստների և աշխատավարձերի և չափն անբավարար է։

Ահմեդովը հայտնի է պետական ​​կառույցների հասցեին քննադատությամբ։ Նրա խոսքով, Ադրբեջանում ընդամենը 3 մարդ է արդարացիորեն ձայն ստացել խորհրդարանական ընտրություններում։ Բացի այդ, պատգամավորը նշել է, որ «Միլի Մեջլիսում կան բիզնեսով զբաղվող պատգամավորներ»։

Դրանից հետո նրա հասցեին ադրբեջանցի պատգամավորների քննադատության մեծ ալիք է բարձրացել։ Նրան սկսեցին մեղադրել «նախագահի սոցիալական քաղաքականության վրա ստվեր գցելու», «մեջլիսի հեղինակությունը վնասելու» և նրա լեգիտիմությունը կասկածի տակ դնելու մեջ։ Նրան նույնիսկ անվանել են «բլոգերի հանցակից՝ վիրավորանքների, սպառնալիքների ու շանտաժի համար»։ Խորհրդարանի փոխխոսնակ Ֆազաիլ Իբրահիմլին նույնիսկ խորհուրդ է տվել Ահմեդովին հրաժարվել մանդատից։

«Եթե ինչ-որ բան քեզ դուր չի գալիս, մի ​​բան չես ընկալում, եթե քո խիղճը թույլ չի տալիս, ապա հրաժարվիր մանդատից և հեռացիր։ Ասա, որ ես չեմ կարող»,- ասել է նա։

Խորհրդարանի նախագահ Սահիբա Գաֆարովային նույնպես դուր չեն եկել Ահմեդովի բացահայտումները, ով հանձնարարել է կարգապահական հանձնաժողովի նիստ անցկացնել և այնտեղ կանչել նրան։ Գաֆարովան հանձնարարել է հանձնաժողովի նախագահին «շատ լուրջ» վերաբերվել այս հարցին։