Պաշտոնը «բրոնեժիլետ» չէ, սա պետք է հասկանան բոլորն անխտիր

Այսօր առավոտյան Հակակոռուպցիոն կոմիտեի կողմից ձերբակալվել են Երեւանի քաղաքապետարանի աշխատակազմի նախկին ղեկավար Սեյրան Մեջլումյանը եւ ճարտարապետության և քաղաքաշինության վարչության պետի տեղակալ, վարչության պետի պաշտոնակատար Դավիթ Դալլաքյանը։ Երևանի քաղաքապետարանի որոշ աշխատակիցներ էլ կանչվել են Հակակոռուպցիոն կոմիտե` հարցաքննության:

Երևանի քաղաքապետի ընտրություններից ամիսներ առաջ քաղաքապետարանի շուրջ ձևավորված թնջուկի մասին «Հրապարակը» զրուցել է փաստաբան, Երևանի ավագանու նախկին անդամ Ենոք Ազարյանի հետ:

- Երևանի քաղաքապետարանից արդեն որերորդ պաշտոնյային են ձերբակալում, կալանավորում: Այսօր էլ ձերբակալվել են քաղաքապետարանի աշխատակազմի նախկին ղեկավար Սեյրան Մեջլումյանը եւ ճարտարապետության և քաղաքաշինության վարչության պետի տեղակալ, վարչության պետի պաշտոնակատար Դավիթ Դալլաքյանը: Ի՞նչ իրավական գնահատական կտաք այս ձերբակալություններին:

- Մեր ժամանակներում ձերբակալելը շատ նորմալ, սովորական երևույթ է: Մեղադրանք են առաջադրում, հետո բաց թողում: Ես գնահատական տալ չեմ կարող այս ամենին:

- Եթե քաղաքապետարանի բարձրաստիճան պաշտոնյաները ձերբակալվում են ինչ-ինչ կոռուպցիոն գործողությունների համար, սա չի՞ ենթադրում, որ սլաքները պետք է ուղղվել քաղաքապետի ուղղությամբ, կոռուպցիոն շղթան նրան էլ է հասնելու:

- Մենք մի ժամանակաշրջանում ենք ապրում, երբ ոչնչից զարմանալ պետք չէ: Մեր օրերում ինչ-որ գործեր են հասնում դատարան, հետո պարզվում է՝ մի մասը կարող են դատապարտվել, մի մասը` ոչ:

- Ինչո՞վ է դա պայմանավորված:

- Պատժից անխուսափելիությունն է կարևոր, ոչ թե բուն պատիժը: Առհասարակ յուրաքանչյուր ոք պետք է հասկանա, որ եթե մի վատ բան է անում, պատիժն անխուսափելի է: Կապ չունի, թե որ արարքի համար ինչ տիպի պատիժ է նախատեսվում, կարևորն այն է, որ յուրաքանչյուր քաղաքացի հասկանա, որ եթե կատարում է հանրությանը վնասող արարք, ապա պետք է ենթարկվի պատասխանատվության: Մենք տեսնում ենք մի բան, որ փաստում է հակառակի մասին: Գործեր են հարուցվում, սակայն դրանք կամ ընթացք չեն ունենում, կամ վաղեմության հիմքով կարճվում են, կամ էլ դատարանում հանցակազմի բացակայության պատճառով գործը փակում են:

- Բայց դատաիրավական համակարգում մեծածավալ փոփոխություններ են արվում: Փորձառու, գրագետ դատավորներին փոխարինելու են գալիս անփորձ իշխանամերձները:

- Սա նշանակում է, որ քրեական արդարադատության հանդեպ վստահության դեֆիցիտ է: Մարդիկ պետք է հասկանան, որ ոչ մի անձ ապահովագրված չէ և պաշտոնը «բրոնեժիլետ» չէ: «Բրոնեժիլետներով» մարդիկ մտածում են, թե բարձրաստիճան պաշտոնյաներն ապահովագրված են, սակայն այդպես չպետք է լիներ: Դա սխալ է: Պաշտոնը զրահաբաճկոն չէ, սա պետք է հասկանան բոլորն անխտիր: Ոչ մեկը երաշխավորված չէ պատժից:

- Հնարավո՞ր է՝ քաղաքապետը ոչ մի բանից տեղյակ չլինի, սակայն իր ենթակա պաշտոնյաները կոռուպցիոն գործարքների մեջ լինեն:

- Նախաքննական մարմինն այդ ամենից տեղյակ կլինի: Ես հստակ ոչինչ ասել չեմ կարող: Եթե ասեմ, դա կլինի քաղաքական գնահատական, իսկ քաղաքական գնահատականը կարող է խանգարել գործին: Նորմալ իրավաբաններն առաջնորդվում են չվնասելու սկզբունքով:

- Գուցե առաջիկայում քաղաքապետի ընտրություններ են, և սա՞ է նման բացահայտումների պատճառը:

- Քաղաքապետի ընտրություններին դեռ շատ կան: Հիմա ընտրությունների ժամանակը չի: Առհասարակ ես մի բան կասեմ, որը բոլորին է վերաբերում` բոլոր ժամանակներում. Քանի դեռ շեշտը չի դրվում պատժի անխուսափելիության վրա: Հոդվածներ փոխել, պատիժներ խստացնելն այս պարագայում այնքան էլ կարևոր չէ: Դրանք ապարդյուն բաներ են: Պատիժն անխուսափելի բան է, դա պետք է հասկանան բոլորը: Մարդկանց աչքին թոզ փչելը, շոու անելը ձևական բան է: Քանի դեռ մարդիկ իրենց արածների համար պատասխան չեն տվել, ոչ մեկը քրեական արդարադատությանը չի հավատալու և չի վստահելու:

- Կարծում եք՝ շոո՞ւ են անում:

- Առհասարակ միշտ այդպես է եղել: Ես չեմ խոսում կոնկրետ այս գործի մասին: Յուրացումների ու վատնումների մասին էր տարիներով խոսվում: Հիմա կա՞ն մարդիկ, որոնք իրենց արածների համար պատասխան են տվել:

- Կթվե՞ք մի քանի դեպք, երբ ինչ-որ բան է ասվել շոուի համար, սակայն ոչինչ չի արվել:

- Գրեթե հիշելու բան չկա, որովհետև բոլորն էլ ամեն ինչ հիշում են: Խոսքն այն մասին է, որ խոշոր գումարներ յուրացնելու համար մեղադրանք են առաջադրել ինչ-որ մարդկանց, հանրային հնչեղություն է գործը ստացել, ապա ոչինչ չի արվել: Ի՞նչ է դա, եթե ոչ շոու:

- Ակնարկում եք, որ նախկին իշխանություններին տարբեր հանցագործությունների մե՞ջ էին մեղադրում:

- Նախկին-ներկա, ըստ էության ոչինչ չի փոխվել: Այնպես չէ, որ մտածողության և վարքագծի մեջ փոփոխություններ կան: Ինձ համար օբյեկտիվ մոտեցումն է կարևոր: Քանի դեռ մոտեցումը պետականամետ չէ, այլ սուբյեկտիվ է, այս վիճակն է լինելու:

- Ի՞նչ առումով են մոտեցումները նույնը:

- Հիմա խոսում ենք իրավական համակարգի մասին: Խոսքն այն մասին է, որ մարդիկ հանցագործություններ են կատարում և չեն պատժվում: Եթե մեղադրանք է առաջադրվում, պետք է գործն ունենա հետևանք:

- Դուք բավականին երկար ժամանակ եղել եք Երևանի ավագանու անդամ: Այն ժամանակ քաղաքապետարանում նման սկանդալներ հիշո՞ւմ եք:

- Ես իրավական հարցերով հանձնաժողովի նախագահն եմ եղել: Մեր գործունեությունը եղել է հասարակական բնույթի: Ես աշխատավարձ չէի ստանում իմ կատարած աշխատանքի համար: Ես գործադիր մարմնում չեմ եղել, լծակներ չեմ ունեցել: Մեր հանձնաժողովում շատ ակտիվ էր օրինակ Ստյոպա Սաֆարյանը: Կար մի ժամանակ, երբ «Ելք» խմբակցությունն էր շատ ակտիվ: Կարեն Կարապետյանը, երբ քաղաքապետ էր, հիշում եմ, ինչ-որ գերեզմանատների վարիչների էին բռնում, թաղապետերի էին բռնում: Հիշում եմ նման դեպքեր: Միշտ էլ նման դեպքեր եղել են, սակայն դրանք ինձ համար արտառոց չեն եղել: Մարդիկ իրենց էությամբ շատ տարբեր են, տարբեր քայլեր են անում, տարբեր գայթակղությունների չեն դիմանում.... Այսօրվա չինովնիկները գուցե չեն հասկանում, որ իրենց գործողությունների մեջ կա հանցակազմ: Ինչպես նախկին իշխանությունների հետ վարվում են ներկա իշխանություններն, այնպես էլ իրենց հետ վարվելու են հաջորդ` նոր իշխանությունները, թող ոչ մեկին չթվա, թե դրանից խուսափելու է: Սա աստվածաշնչյան սկզբունք է՝ ինչ անում ես, վերադառնում է քեզ: Ոչ ոք ոչինչ չի մարսելու: Մարդն իր բնույթով պետք է լինի աստվածանման, ոչ թե կենդանանման: