Ես եղել եմ լույսի վարչապետը

Նախագահական ընտրություններին մնաց երեք օր: Մոտ մեկ ամիս իշխանությունը, սուտ խոստումներ շռայլելով, շրջեց մարզերով մեկ, իսկ հուսահատության մեջ հայտնված ժողովրդին փորձեցին հույս ու հավատ ներշնչել ընդդիմադիր թեկնածուները:



 



Նախագահի թեկնածու, արմատական ընդդիմադիր,  «Ազատություն» կուսակցության առաջնորդ Հրանտ Բագրատյանն արդեն չորս շաբաթ հնարավորինս մանրամասն ու մասնագիտական թվաբանությամբ քաղաքացիներին բացատրեց, թե ինչ աղետալի վիճակում է իրականում երկիրը, եւ այդ վիճակից դուրս գալու ինչ իրատեսական քայլեր կան: Արդյո՞ք այս հանդիպումներով ու հանրապետության մասին իրական նկարագրություններով հնարավոր եղավ ազդել ժողովրդի տրամադրությունների վրա, ո՞ւմ են հակված ընտրելու ՀՀ քաղաքացիները եւ ինչո՞ւ: Այս մասին մեզ հետ զրույցում պատմեց Հրանտ Բագրատյանը:



 



 - Պարոն Բագրատյան, ավելի քան երեք շաբաթ շրջում եք մարզերով, հանդիպում ընտրողների հետ, ի՞նչ տրամադրություններ են հանրության շրջանում: Շատ է խոսվում ընտրությունների հանդեպ ժողովրդի  անտարբերության մասին: Քարոզարշավի ընթացում նկատե՞լ  եք նման բան:



 



- Բացարձակապես, աճում է, եւս մի որոշ ժամանակ, եւ կծավալվեն մեծ փոփոխություններ, ժողովրդական ալիք:



 



- Հետընտրական զարգացումնե՞ր են սպասվում:



 



- Դե, էդտեղ նշանակություն կունենան նաեւ, թե 18-ին ինչ կորոշեն, կթողնե՞ն մեր տոկոսները մեզ: Այնուամենայնիվ, թվերի հետ աճպարարություն անելու բոլոր մեխանիզմները գտնվում են իշխանության ձեռքում: Տեսնենք ինչ են անում, իրականում իշխանությունը ամսի 18-ին շատ լուրջ պարտություն պետք է կրի:



 



- Պարոն  Բագրատյան, ՀԱԿ ներկայացուցիչները շարունակում են Ձեզ մեղադրել, թե Դուք առաջադրվելու որոշումը կայացրել եք առանց Լեւոն Տեր-Պետրոսյանի հետ քննարկելու: Ի վերջո կմանրամասնե՞ք, թե ինչն ինչպես է եղել: 



 



- Լեւոն Տեր-Պետրոսյանի հետ մենք քննարկել ենք, ես նրանց ասել եմ` Լեւոն Տեր-Պետրոսյանն ինձ երկու-երեք անգամ ասել է, որ համարյա թե հավանականություն չկա, որ ինքն առաջադրվի: Մի անգամ սեպտեմբեր-հոկտեմբերին է ասել, մյուս անգամ` նոյեմբերին: Որեւէ չքննարկված հարց չկա, ՀԱԿ ֆրակցիայում էլ երկու անգամ քննարկվել է: Կա ուրիշ պրոբլեմ. կան մարդիկ, այդ թվում Ձեր ասած ներկայացուցիչը, որոնք ուզում են, որ իրենք առաջադրվեն, կա սեւ նախանձ, մարդիկ իրենց հաշիվ չեն տալիս, թե իրենցից ինչ են ներկայացնում: Սա է խնդիրը: Եվ այս մարդիկ հայկական քաղաքականության դաշտում տոտալ դեզինֆորմացիա են հաղորդում:



 



 - Պարոն  Բագրատյան, կարելի է ասել՝ այս ընտրություններում, որպես ընդդիմադիր գործիչ, թեկնածու, մենակ եք քարոզարշավն իրականացնում:  Ձեր կողքին չկանգնեց ընդդիմությունն ու անգամ նրանցից անջատված ուժերը: Սա հաշվի առնելով՝  ինչպե՞ս է ընթանում քարոզարշավը, ի՞նչ արդյունքներ եք ակնկալում:



 



- Վեց-յոթ կուսակցություն ունենք, որոնք մեզ օժանդակում են: Մենք լուրջ վարկանիշ ունենք, կամ առաջին, կամ երկրորդ, հազվագյուտ` երրորդ տեղն ենք լինում, նայած ովքեր են հարցումներն իրականացնում: Ընդհանուր առմամբ, ես գոհ եմ քարոզարշավից։ Հաշվի առնենք նաեւ, որ ես ստիպված էի սպասել մինչեւ դեկտեմբերի վերջը, եւ նախապատրաստական աշխատանքներն ավելի ուշ սկսվեցին:



 



  -  Կարծիքներ կան, թե երկրում տիրող վիճակը քաղաքացիներին բացատրում եք նեղ մասնագիտական տերմինաբանությամբ, եւ այդ լուրջ թվաբանությունը բարդ է ու անմատչելի ժողովրդին, Ձեր ասելիքը չի հասկացվում: Ծագո՞ւմ են նման խնդիրներ:



 



- Նման բաները վերեւից է ասվում, նույնիսկ ասում են` շատ խելոք բաներ է ասում Բագրատյանը, այսինքն, քիչ է մնում ասեն` արի բթամիտ բաներ ասա, որ ավելի մեծ վարկանիշ չունենաս: Իրականում այդպես չի, բոլորն էլ հասկանում են ծրագրերը եւ վիճակը, բոլորն էլ շատ լավ հասկանում են, թե ինչի մասին է խոսքը: Քանի որ ճար չկա, տեսնում են, որ Բագրատյանը տրամաբանական, ռացիոնալ բաներ է ասում, հիմա էլ ասում են` շատ ռացիոնալ է ու խելոք, որն իր թերությունն է: Դա արդեն չեղավ:



 



  - Պարոն Բագրատյան, կարծիքներ կան, որ ժողովուրդը Ձեզ ասոցացնում է 90-ականների մութ ու ցուրտ, վատ տարիների հետ, բացի այդ, Ձեզ մեղադրում են սեփականաշնորհման գործընթացների մեջ եւ այլն, ինչը խանգարում է ավելի մեծ թվով քվեներ ստանալուն...



 



- Ոչ, սուտ են ասում, ես եղել եմ լույսի վարչապետը:  Մութ ու ցուրտը 91-92-ին էր, ես եմ լուծել, 32-33 տարեկանում, հանրապետությունում 24-ժամյա հոսանք մատակարարելու խնդիրը: Առաջին անգամ՝ Արցախում, երկրորդը՝ Հայաստանում: Չեմ ասում, թե մենակ լուծեցի, բայց իմ կառավարությունը լուծեց: Իսկ սեփականաշնորհումը բոլորը գովում են, ասում են` պարոն Բագրատյան, Ձեզանից հող ստացանք: Ձեզանից մենք ստացանք վաուչերներ, փայ, որոնք հետագայում մեր ձեռքից խլել են: Մարդկանց մոտ ես ունեմ բարի, չթալանած, չգրպանած մարդու իմիջ, այսպիսի մարդիկ, բարեբախտաբար այն ժամանակ` մեր օրոք, շատ կային:



 



 - Պարոն Բագրատյան, ինչո՞ւ չիրականացավ իշխանության դեմ մեկ միասնական թեկնածուով հանդես գալու իդեան, ի՞նչն էր խանգարում Հրանտ Բագրատյանի, Պարույր Հայրիկյանի եւ Րաֆֆի Հովհաննիսյանի միավորմանը:



 



- Մենք երեքով թուղթ էինք տորագրել, ես պիտի հասկանայի՝ նրանք ընդդիմությո՞ւն են, թե՞ ոչ: Այս պահի դրությամբ երկուսն էլ այս կամ այն առիթով հայտարարել են` կշնորհավորեն Սերժ Սարգսյանին: Գիտեք, ինքնանպատակ չի չշնորհավորելը, եթե մեկը կարող է հաղթել, թող շնորհավորեն, իրենց գործն է, բայց չէ՞ որ այդ թղթով ես մտցրել էի այն կետը ցուցակների վերաբերյալ (խոսքը ընտրացուցակները նախապես հրապարակելու մասին է)։ Այդ հասարակ խնդրանքն իշխանությունները չհարգեցին: Մենք երեքով քննարկում էինք, որ եթե այս կետը չհարգվի, սա նշանակում է, որ բացառված են մաքուր, արդար ընտրությունները: Հիմա, երբ իմ գործընկերները հայտարարում են միասնական թեկնածուի մասին, ես սկսում եմ կասկածել: Իմ իրավունքն է կասկածելը, ես չեմ ասում, թե իրենք սխալ են: Իմ իրավունքն է կասկածելը, որ միասնական թեկնածուի գաղափարը գալիս է վերեւից, որպեսզի Բագրատյանն ի վերջո թեկնածությունը հանի, որպեսզի տակը մնան նրանք, ովքեր վաղը ինչ տոկոս էլ ստանան, կշնորհավորեն:



 



- Ձեր գնահատմամբ, Հայրիկյանի նկատմամբ մահափորձն ի՞նչ հետք թողեց 2013 թվականի ընտրությունների վրա:



 



- Դա մեզ շեղեց, եւ ով որ դա կազմակերպել էր, նրա մոտ  դա մեծ հաջողությամբ ստացվեց:



 



- Պարոն Բագրատյան, ընտրողների հետ ամեն հանդիպման վերջում Սերժ Սարգսյանը հայտարարում է, թե այս ընտրություններն աննախադեպ են լինելու, համապատասխան դեմոկրատական չափանիշներին: Ձեր կարծիքով, դա որքանո՞վ է հաջողվելու Սերժ Սարգսյանին:



 



- Ես գիտեմ մի պատմություն՝ ցուցակների հետ կապված, որ որեւէ փոփոխություն չեղավ: Օրինակ, կաշառքի մասով կարծես խոստում չեն տվել, քանի որ գյուղացիներ կան, ովքեր հարցնում են` բա մեզ կաշառք չե՞ն տալու։ Կարող է պատահի նախկինում իրենց իսկ կողմից ստեղծված արատավոր քայլերից մեկը կամ երկուսը չանեն: Բայց, դրա հետ մեկտեղ, գոնե նախկինում ծրագիր էին ասում, հիմա դա էլ չկա:  Պատահական չէ, որ «Ազատություն» ռադիոկայանը կազմակերպեց բանավեճ, եւ Սերժ Սարգսյանը նամակով գրել էր, թե չի կարող ներկայանալ, մյուսները եւս չէին ներկայացել, որպեսզի չգնար գործնական խոսակցություն ծրագրերի խորության մասին:



 



- Պարոն Բագրատյան, նախօրեին Սերժ Սարգսյանը  քաղաքացիների հետ հարցուպատասխանի ժամանակ ստվերի վերաբերյալ ասաց, թե այն տնտեսության բաղկացուցիչ մաս է, եւ ողջ խնդիրը ստվերի մենաշնորհն  է, անհավասարաչափ բաշխվածությունը: Այդպե՞ս է:



 



- Ոչ, այդպես չէ, տնտեսության բաղկացուցիչ մասը պիտի լինի տնտեսությունը: Իրականում Հայաստանի համար իր ասածը ճիշտ է, որովհետեւ ստվերն ավելին է, քան տնտեսությունը: Տնտեսության ավելի օրինաչափ  հատվածը ստվերն է, ոչ օրինաչափը, պատահական հատվածը` ոչ ստվերը, իրական տնտեսությունը: Սա ցավալի է, որովհետեւ ստվերը մեր երկրում 51 տոկոս է կազմում, իսկ իրականում պետք է լինի առավելագույնը մինչեւ 10 տոկոս: Եվ չեմ կարծում, որ երկրի ղեկավարն այդպիսի հայտարարություններ անելու իրավունք ունի:



 



- Ավելին, Սերժ Սարգսյանը հայտարարեց, որ հարյուր տոկսով չի կարողանում ստվերում գործող մարդկանց անուններն ասել, եթե իրենց տեղն իմանար, մեկ շաբաթում կգային հարկային դաշտ: Կարո՞ղ էր երկրի ղեկավարը դա չիմանալ:



 



- Սերժ Սարգսյանին փոխանցեք մեր շտաբի համարը,  թող զանգեն, ես մեծ հաճույքով կասեմ, թե ստվերը որտեղ է:



 



- Պարոն Բագրատյան, հետագայում հնարավո՞ր է Ձեր համագործակցությունը Լեւոն Տեր-Պետրոսյանի գլխավորած ուժի հետ:



 



- ՀԱԿ շարքային համախոհները, շուրջ կեսից ավելին, մեզ հետ են։ Առաջին նախագահին հարգանքով եմ վերաբերվում։ Նրա հետ համագործակցելը խնդիր չէ։ Բայց այնտեղ կան մարդիկ, որոնք ինձ համար անընդունելի են: Տեսնենք։



 



- Պարոն Բագրատյան, 2008-ի նախագահական ընտրությունների քարոզարշավին ակտիվ մասնակցում էիք որպես առանցքային ներկայացուցիչ, ի՞նչ տարբերություն կա այն ժամանակվա եւ այս ընտրությունների միջեւ՝  հասարակական տրամադրությունների առումով:



 



- Նա մասսայական էր, մեծ միտինգ էր, հիմա մի քիչ ուրիշ է, ավելի անմիջական: Մարդիկ խորն են, շատ հետաքրքիր է: Երեկ, օրինակ, Անգեղակոթում շատ մարդիկ էին հավաքվել, անմիջական խոսում էինք, թե ոնց ենք էդ կոոպերացիան ստեղծում, ոնց էին բոլորի աչքերը փայլում, դա պարզապես ֆանտաստիկ էր։



 



- Ընտրողներին Ձեր ուղերձով էլ ավարտենք զրույցը:



 



- Մի բան պատմեմ: Երեկ Արտաշատից գալուց արագ էի քշում մեքենան, ոստիկանության մեքենան կանգնեցրեց, կանգնեցի, մոտեցավ մի ոստիկան` ավագ լեյտենանտ, դուռը բացեցի, ճանաչեց ինձ, մեկ էլ ասաց` ինչո՞վ կարող եմ Ձեզ օգնել, պարոն Բագրատյան: Ես անմիջապես նրան ասացի` գնացեք եւ ընտրեք ինձ: