Իրավունք ունեմ մի օր էլ բացակայել. Անի Զախարյան

Այսօր առավոտյան որոշ լրատվամիջոցներ տեղեկացրել էին, որ Նոր քաղաքական մշակույթ կուսակցության նախագահ Անի Զախարյանը չի մասնակցելու «Դեմ եմ» հասարակական շարժման հանրահավաքին և դրա համար պատճառներ ունի: Փրձեցինք պարզել այդ պատճառները:

-Ինչու այսօր չմասնակցեցիք «Դեմ եմ»-ի հանրահավաքին և դրան հաջորդած երթին:

- Չմասնակցեցի, քանզի հստակ գիտեի, թե ինչի մասին պետք է խոսվի, խնդիրը նույնն էր, որևէ հավելում չկար և, բացի այդ, արդեն 7-8 ամիս է ֆիզիկապես բաց չեմ թողել ոչ մի հանրահավաք, կարծում եմ, իրավունք ունեմ մի օր էլ բացակայել:

-Ավելի վաղ հայտարարություն էիք արել, թե գիտեք ով է ֆինանսավորում «Դեմ եմ» շարժումը: Գրել էին, թե Դուք Ռոբերտ Քոչարյանին նկատի ունեք: Ուզում ենք հարցնել՝ ի՞նչ կարևոր է, թե ով է ֆինանսավորում: Եթե պահանջներն արդար են, եթե այդքան փորձառու քաղաքական գործիչներ են մասնակցում, չե՞ք կարծում, որ իբրև շարժում «Դեմ եմ»-ը բավականին լուրջ և ընկալված շարժում է:

-Ես նման բան չեմ ասել: Ես ասել եմ՝ լսել եմ նման բան, բայց քանի որ փաստեր չունեմ, պնդել չեմ կարող: Ընդամենը լսել եմ:

-Եթե Քոչարյանը ֆինանսավորեր, դա պատճառ կդառնա՞ր, որ չմասնակցեիք:

-Այո

-Կպատճառաբանե՞ք:

- Քոչարյանի վերադարձին ակտիվ քաղաքականություն միանշանակ դեմ եմ, այո դեմ եմ, և, եթե նմանատիպ նախաձեռնությունները պիտի սպասարկեն նրա քաղաքական շահերին, ես այդտեղ անելիք չունեմ: Սակայն պատրաստ եմ գնահատել շարժման որոշ անդամների պոտենցիալը և շատ կցանկանամ նրանց տեսնել ակտիվ գործելիս՝ հանուն Հայաստանի շահերի և ոչ որևէ անհատի քաղաքական ծրագրերի:

-Շնորհակալություն:

Զրույցը վարեց՝

Աշոտ Սահակյան